.jpg)
ឡាច ច័ន្ទដារ៉ា ទទួលវិញ្ញាបនបត្រពីប្រធានសហព័ន្ធ លោក អូន ព័ន្ធមុនីរ័ត្ន។ ឈន ណន
ភ្នំពេញ៖ ដោយមានប្រភពចេញពីក្មេងក្រីក្រមកពីជនបទ លោក ឡាច ច័ន្ទដារ៉ា បានផ្សារភ្ជាប់ខ្លួនជាមួយកីឡាការ៉ាតេ អស់រយៈពេល ៣៧ ឆ្នាំមកហើយ ដោយលោកបានខំប្រឹងប្រែងកែប្រែវាសនារបស់ខ្លួនពីកីឡាករ រហូតក្លាយជាគ្រូបង្វឹកដ៏មានបទពិសោធ និងជាថ្នាក់ដឹកនាំម្នាក់ នៅក្នុងសហព័ន្ធកីឡាការ៉ាតេកម្ពុជា ដែលមានខ្សែក្រវាត់ខ្មៅ ៨ ដាន់ និងជាម្ចាស់ក្លិបសុរិយាការ៉ាតេដូ ដែលមានទីតាំងនៅមុខមន្ទីរពេទ្យរុស្ស៊ី ក្នុងសង្កាត់បឹងទំពុន រាជធានីភ្នំពេញផងដែរ ប៉ុន្តែការងារស្នូលរបស់លោក ជាឧត្តមសេនីយ៍ត្រី មានតួនាទី ជាអនុប្រធានស្ថាប័នអយ្យការតុលាការយោធា។
នៅក្នុងបទសម្ភាសជាមួយ ភ្នំពេញ ប៉ុស្តិ៍ លោក ឡាច ច័ន្ទដារ៉ា បានប្រាប់ថា លោកមានប្រភពចេញពីក្មេងជនបទក្រីក្រ ១ រូប នៅភូមិព្រែកតាម៉ិម ឃុំទឹកវិល ស្រុកស្អាង ខេត្តកណ្តាល។ លោកមានបងប្អូនលេងកីឡាចំនួន ៣ នាក់ ក្នុងចំណោមបងប្អូន ៨ នាក់ ដែលបានចាកចេញមករៀននៅវិទ្យាល័យទួលគោកក្នុងក្រុងភ្នំពេញ ហើយបានចាប់ចិត្តលើកីឡាការ៉ាតេដូនេះ នៅឆ្នាំ ១៩៨៣ ដោយធ្លាប់ហាត់នៅក្បែររង្វង់មូលមាន់ចែ និងលើរោងភាពយន្តសុរិយាក្រៅម៉ោងពេលសិក្សា។
លោក ឡាច ច័ន្ទដារ៉ា បាននិយាយថា៖ «ខ្ញុំចូលចិត្តហាត់ និងលេងកីឡាតាំងពីក្មេង ហើយសម្រេចចិត្តជ្រើសរើសយកកីឡាការ៉ាតេ ដើម្បីហ្វឹកហាត់រាល់ថ្ងៃជារៀងរហូត ដោយចាប់ផ្តើមដំបូងនៅថ្ងៃទី ២០ ខែ កញ្ញា ឆ្នាំ ១៩៨៣ ហើយមកដល់បច្ចុប្បន្ន ខ្ញុំមានខ្សែក្រវាត់ខ្មៅ ៨ ដាន់ និងមានក្លិបផ្ទាល់ខ្លួនឈ្មោះសុរិយាការ៉ាតេដូ។ ឈ្មោះក្លិបនេះ គឺ ដើម្បីរំឭកពីទីតាំង និងអនុស្សាវរីយ៍នៃការហ្វឹកហាត់ពេលខ្ញុំទទួលខ្សែក្រវាត់ខ្មៅលើកដំបូង នៅលើដំបូលរោងភាពយន្តសុរិយាជិតផ្សារថ្មី»។
លោកបានលម្អិតពីប្រវត្តិក្នុងសកម្មភាពកីឡាការ៉ាតេនេះថា៖ «ខ្ញុំចាប់ហ្វឹកហាត់កីឡានេះ ចាប់ពីឆ្នាំ ១៩៨៣ ដល់ឆ្នាំ ១៩៨៥ ជាមួយលោកគ្រូ សាមឌី ស៊ីវឌ្ឍនា ដោយទទួលបានខ្សែក្រវាត់ខ្មៅ ១ ដាន់ ហើយពីឆ្នាំ ១៩៩១ ដល់ឆ្នាំ ១៩៩៣ ខ្ញុំបានធ្វើជាគ្រូជំនួយ។ ក្រោយមកខ្ញុំទៅហ្វឹកហាត់បន្ថែមជាមួយលោកគ្រូ យាន ងួន (បច្ចុប្បន្នជាគ្រូកីឡាគូបូដូ) និងបន្តហាត់ជាមួយគ្រូមកពីប្រទេសស្វ៊ីស ដោយទទួលបានខ្សែក្រវាត់ខ្មៅ ៧ ដាន់»។
«ខ្ញុំបានជាប់ជាកីឡាករជម្រើសជាតិ ដែលប្រមូលផ្តុំជាលើកដំបូង ក្នុងឆ្នាំ ១៩៩៦ និងបានចេញប្រកួតជាច្រើននៅក្រៅប្រទេស ពិសេសក្នុងតំបន់អាស៊ីអាគ្នេយ៍។ ក្នុងរយៈពេល ១០ ឆ្នាំ គឺពីឆ្នាំ ២០០៨ ដល់ឆ្នាំ ២០១៨ ខ្ញុំជាប់ជាគ្រូជម្រើសជាតិ និងជាអគ្គលេខាធិការរងសហព័ន្ធកីឡាការ៉ាតេកម្ពុជា ហើយជាមួយគោលបំណង ដើម្បីជួយអភិវឌ្ឍ និងជំរុញឱ្យកីឡាការ៉ាតេ កាន់តែមានភាពរីកចម្រើនឈានទៅដណ្តើមមេដាយ ក្នុងព្រឹត្តិការណ៍ស៊ីហ្គេមលើកទី៣២ ឆ្នាំ ២០២៣ ដែលកម្ពុជាធ្វើម្ចាស់ផ្ទះនោះ សហព័ន្ធបានលើកទឹកចិត្តឱ្យខ្ញុំមកកាន់ជានាយករងខាងបច្ចេកទេសវិញ»។
លោក ឡាច ច័ន្ទដារ៉ា (កណ្តាល) ពេលថតជាមួយកូន និងកូនសិស្សរបស់គាត់។ រូបថត សហការី
ជុំវិញការផ្លាស់ប្តូរតួនាទីនៅក្នុងសហព័ន្ធនេះ លោក ឡាច ច័ន្ទដារ៉ា បានបញ្ជាក់ថា៖ «ខ្ញុំសប្បាយចិត្ត ព្រោះខ្ញុំមានពេលវេលាគ្រប់គ្រាន់ ដើម្បីទៅជួយបង្វឹកអត្តពលិករបស់សមាគមកីឡាការ៉ាតេក្រសួងមហាផ្ទៃ ក្រោមការជួយឧបត្ថម្ភរបស់លោក ជា ប៊ុនហេង ជាប្រធានអង្គភាពកីឡាក្រសួងមហាផ្ទៃ ហើយខ្ញុំក៏មានពេលវេលាធ្វើជាគ្រូបង្វឹកប្រចាំក្លិបផ្ទាល់ខ្លួន និងជាគ្រូបង្វឹកឱ្យអត្តពលិកជាលក្ខណៈឯកជននៅតាមផ្ទះផងដែរ»។
ទាក់ទងនឹងសំណួរថា លោកគ្រូបានលះបង់ពេលវេលា ធ្វើសកម្មភាពស្វិតស្វាញជាមួយកីឡាការ៉ាតេនេះ តើទទួលបាននូវស្នាដៃ ឬផលប្រយោជន៍អ្វីជាដុំកំភួនទេ ក្នុងរយៈពេលជាង ៣៧ ឆ្នាំនេះ?
លោក ឡាច ច័ន្ទដារ៉ា បានឆ្លើយតបថា៖ «ជាទូទៅ អ្នកស្រឡាញ់ និងចូលចិត្តកីឡា គឺត្រូវតែហ៊ានលះបង់ពេលវេលា កម្លាំងកាយចិត្ត និងថវិកាជាមុនសិន បន្ទាប់មកវាបានផ្តល់ឱ្យយើងវិញនូវអ្វីដែលយើងពេញចិត្តជាក្រោយ»។
«បច្ចុប្បន្នខ្ញុំទទួលបានតម្លៃពលកម្មពីការទៅបង្ហាត់កូនសិស្សតាមផ្ទះ ដោយទទួលបានប្រាក់ចំណូលសមរម្យ តាមសិស្សជូនក្នុងនោះអាចថា បាន ពី ៣០០ ទៅ ៥០០ ដុល្លារ ទៅតាមចំនួនសិស្សតិច ឬច្រើនក្នុង ១ ខែៗ តែចំណូលទាំងនេះ ខ្ញុំមិនទាន់និយាយពីការបង្ហាត់សិស្សនៅក្នុងក្លិប ដែលកំពុងត្រូវផ្អាក ដោយសារបញ្ហាជំងឺកូវីដ ១៩ ផងទេ។ ជាទូទៅនៅក្នុងក្លិបសុរិយារបស់ខ្ញុំ ទទួលបង្ហាត់ក្មេងៗក្រីក្រ និងកូនកំព្រាខ្លះ ដោយមិនយកលុយ គឺមុនពេលកូវីដ ១៩ មានជាង ៣០ នាក់»។ នេះជាការប្រាប់បន្តរបស់លោក ច័ន្ទដារ៉ា។
លោក ច័ន្ទដារ៉ា បានបន្ថែមជាចុងក្រោយថា៖ «ចំពោះស្នាដៃចុងក្រោយរបស់ខ្ញុំថ្មីៗនេះ គឺកាលពីឆ្នាំ ២០១៨ ខ្ញុំបានដឹកនាំការ៉ាតេដូ ទៅប្រកួតកីឡាប៉ូលិសអន្តរជាតិនៅឆឹងទូរបស់ប្រទេសចិន ហើយជាលទ្ធផលយើងដណ្តើមបានមេដាយមាស ប្រាក់ និងសំរឹទ្ធ ជូនក្រសួងមហាផ្ទៃ ក៏ដូចជាជាតិមាតុភូមិ។ ហេតុនេះកីឡាការ៉ាតេ បានផ្តល់ឱ្យខ្ញុំទាំងសុខភាពល្អ កិត្តិយស ក្តីស្រឡាញ់ ព្រមទាំងប្រាក់ចំណូលសមរម្យ តាមតម្លៃពលកម្មក្នុងឋានៈជាគ្រូបង្វឹកដែលមានបទពិសោធយូរឆ្នាំ កំពុងមានសិស្សជាច្រើនត្រូវការខ្ញុំបង្ហាត់ពួកគេ»៕
