ភ្នំពេញ: កីឡាករប្រដាល់ជើងចាស់ល្បីឈ្មោះ ឡុង សុភី មកពីក្លិបប្រដាល់សាលវ័ន្តកីឡាត្រូវបានចៅក្រមសម្រេចឲ្យចាញ់ពិន្ទុកីឡាករថៃ Chai Suo ក្រោយពីប្រកួតសងសឹកគ្នាជាលើកទី ៤ យ៉ាងស្វិតស្វាញរយៈពេលចំនួន ៥ ទឹកពេញកាលពីយប់ថ្ងៃសៅរ៍ ទី ១ ខែកញ្ញា ឆ្នាំ ២០១៨ នៅសង្វៀនអាស៊ីអាគ្នេយ៍។ ការចាញ់នេះធ្វើឲ្យ ឡុង សុភី មានប្រតិកម្មតវ៉ា និងចោទប្រកាន់ចៅក្រមដែលផ្តល់ពិន្ទុថា មិនមានយុត្តិធម៌ និងមិនចេះដាក់ពិន្ទុ ខណៈដែលរូបគេមានជំនឿចិត្តយ៉ាងច្បាស់ថា មានប្រៀបឈ្នះថៃដែលផ្ទុយពីលទ្ធផលប្រកាសជាផ្លូវការ។
ជាមួយគ្នានេះកីឡាករជើងចាស់ម្នាក់ទៀតដែលបាត់មុខពីសង្វៀនយូរឆ្នាំ ហេង សំរាំង មកពីក្លិបព្រៃទទឹងខេត្តបាត់ដំបង បានប្រកួតចាញ់កីឡាករ Julien មកពីបារាំង ក្នុងទម្ងន់ ៦៩ គីឡូក្រាម ប៉ុន្តែ មិនមានប្រតិកម្មពីលទ្ធផលចាញ់នោះឡើយ ខណៈរូបគេទទួលស្គាល់ថាកម្លាំងរបស់គេធ្លាក់ចុះត្រដាបត្រដួសនៅចុងទឹក ព្រមទាំងរងរបួសបែកមាត់ផងដែរ។
ក្រោយពីគណៈកម្មការវិនិច្ឆ័យប្រកាសលទ្ធផលឲ្យចាញ់ ឡុង សុភី បានប្រាប់ភ្នំពេញប៉ុស្តិ៍ ថា៖ «ខ្ញុំជាកីឡាករគោរពថ្នាក់ដឹកនាំ គោរពក្រមសីលធម៌ ហើយខ្ញុំមិនបញ្ចេញកាយវិការមិនសមរម្យណាមួយទេ ប៉ុន្តែលទ្ធផលនេះខ្ញុំសុំនិយាយថា ចៅក្រមដែលដាក់ពិន្ទុនោះល្ងីល្ងើ មិនយល់ពីការដាក់ពិន្ទុនោះឡើយ ពីព្រោះខ្ញុំដេញវាយមានប្រៀបដាច់ ពិសេសទឹកទី ៤ និងទឹកទី ៥ ខណៈកីឡាករថៃ Chai Suo នោះថយរត់សឹងតែគ្មានឱកាសតដៃ បែរជាទទួលបានលទ្ធផលឈ្នះទៅវិញ»។
ឡុង សុភី បានបន្តថា៖ «ខ្ញុំសួរទៅចៅក្រមម្នាក់ថា ការផ្តល់ពិន្ទុផ្អែកលើអី ចៅក្រមម្នាក់នោះនិយាយថា ខ្ញុំវ៉ៃស្រាល ចុះកីឡាករថៃ Chai Suo ថយរត់អត់វ៉ៃបានពិន្ទុច្រើនជាងអ្នកវ៉ៃស្រាលម៉េចទៅ?»។
ទោះជាយ៉ាងណា ឡុង សុភី មិនប្តឹងសើរើអ្វីទេ ហើយនៅតែចង់ឡើងប្រកួតគ្រប់សង្វៀនដោយគ្មានរើសអើង ប៉ុន្តែបានស្នើឲ្យលោកប្រធានសហព័ន្ធកីឡាប្រដាល់គុនខ្មែរ ពិនិត្យមើលសមត្ថភាពចៅក្រមមួយចំនួនផង។
លោកឯម ហៀង អនុប្រធានវិនិច្ឆ័យប្រចាំសង្វៀនអាស៊ីអាគ្នេយ៍ មានប្រសាសន៍ថា៖ «ការផ្តល់ពិន្ទុពីសំណាក់ចៅក្រមរបស់គូនេះត្រឹមត្រូវតាមបច្ចេកទេសហើយគឺក្នុងលទ្ធផលពិន្ទុ កីឡាករថៃ Chai Suo ឈ្នះ ៤ ទល់ ១ ដែលជាគោលការណ៍មិនអាចនឹងជួយឬទាញឲ្យស្មើគ្នាបានទេ»។
លោកបានបន្ថែមទៀតថា៖ «ខ្ញុំយល់ឃើញថា ហេតុផលមួយចំនួនក្រោយពេលចាញ់ កីឡាករតែងតែប្រតិកម្មតវ៉ា ឬបន្ទោសទៅគណៈកម្មការចៅក្រម ប៉ុន្តែការគាំទ្ររវាងទាំង ២ ភាគីធ្វើម្តេចនឹងតម្រូវចិត្តបាននោះ អ៊ីចឹងគឺយើងដាច់ខាតអនុវត្តតាមបច្ចេកទេស»៕