ភ្នំពេញៈ កីឡាករជើងខ្លាំងវ័យក្មេង ឡុង សំណាង ក្លិបសាលវ័ន្តកីឡានៃសមាគមកីឡាប្រដាល់ក្រសួងមហាផ្ទៃ បានសម្រេចក្តីប្រាថ្នាដ៏ធំក្នុងអាជីពរបស់ខ្លួនហើយ គឺការឈ្នះបានខ្សែក្រវាត់ភេសជ្ជៈ Wurkz ទម្ងន់ ៦៣,៥ គីឡូក្រាម បន្ទាប់ពីរូបគេបានយកឈ្នះកីឡាករថៃ Pek Thieng យ៉ាងតឹងតែងបំផុត នៅវគ្គផ្តាច់ព្រ័ត្រនោះ។
សម្រាប់ការប្រកួតនៅសង្វៀន SEATV កាលពីថ្ងៃអាទិត្យ កន្លងមកនេះ ឡុង សំណាង ត្រូវបានចៅក្រមទាំង ៥ រូបផ្តល់ពិន្ទុឲ្យឈ្នះ Pek Thieng ដោយឯច្ឆន្ទ ប៉ុន្តែភាគីកីឡាករថៃ ហាក់បានសម្តែងនូវការមិនពេញចិត្តនៅពេលដែលរូបគេត្រូវបានផ្តល់ជូនត្រឹមជើងឯករងនោះ។
ឡុង សំណាង ដែលមានស្រុកកំណើតមកពីខេត្តត្បូងឃ្មុំ បានក្លាយខ្លួនជាកីឡាករប្រដាល់ខ្លាំងជំនាន់ក្រោយក្នុងទម្ងន់ ៦៣,៥ គីឡូក្រាម ហើយរូបគេធ្លាប់ឈ្នះពានទីហ្វីនៅសង្វៀនលេខ ៥ ឈ្នះជើងឯកជាតិប្រចាំឆ្នាំចំនួន ២ លើក ឈ្នះជើងឯកកីឡាជាតិឆ្នាំ ២០១៦ និងឈ្នះជើងឯករងក្នុងកីឡាជាតិឆ្នាំ ២០១៨ ក្រោយពីចាញ់ ឃីម ឌីម៉ា ដែលក៏ជាកីឡាករជម្រើសជាតិគុនខ្មែរដូចគ្នា។ រីឯការឈ្នះខ្សែក្រវាត់ភេសជ្ជៈ Wurkz នេះគឺជាជោគជ័យយ៉ាងធំ ក្រោយពី សំណាង បានប្រឡូកក្នុងប្រដាល់គុនខ្មែរយ៉ាងពេញទំហឹងត្រឹមជាង ៣ ឆ្នាំប៉ុណ្ណោះ។
ឡុង សំណាង បាននិយាយក្រោយឈ្នះបានខ្សែក្រវាត់ថា៖ «ក្តីប្រាថ្នារបស់ខ្ញុំបានសម្រេចដូចបំណង ប៉ុន្តែការប្រកួតមានសភាពតឹងតែងបំផុត ដែលខ្ញុំមិនអាចផ្តួលដៃគូឲ្យសន្លប់បាន ហើយពេលប្រកួតជាក់ស្តែងលើសង្វៀន ខ្ញុំបារម្ភខ្លាំងបំផុត ព្រោះស្នៀតជង្គង់ និងការទាត់របស់គេល្អដែរ គឺខ្ញុំមិនអាចបង្ក្រាបគេបានដោយងាយទេ»។
ឡុង សំណាង បានបន្ថែមថា៖ «ខ្ញុំនឹងខំហ្វឹកហាត់បន្ត ខិតខំគោរពគោលការណ៍ច្បាប់សហព័ន្ធ ដើម្បីក្លាយខ្លួនជាកីឡាករជាប់ជម្រើសជាតិគុនខ្មែរ ឆ្នាំ ២០១៩ ខាងមុខ ដែលអាចមានវាសនាបានទៅប្រកួតស៊ីហ្គេម នៅហ្វីលីពីន ឆ្នាំ ២០១៩ ជូនជាតិមាតុភូមិ»។
ក្នុងស្ថានភាពប្រកួតជាក់ស្តែងក្នុងវគ្គផ្តាច់ព្រ័ត្រនេះ នៅទឹកទី ១ ឡុង សំណាង ចាញ់ប្រៀបកីឡាករថៃ PekThieng ប៉ុន្តែឈានចូលដល់ទឹកទី ២ និងទី ៣ ក៏ស្ថិតក្នុងសភាពប្រទាញប្រទង់ដណ្តើមពិន្ទុគ្នាដែរ ហើយនៅទឹកទី ៤ និងទី ៥ សំណាង មានឱកាសយកប្រៀបឈ្នះពិន្ទុដោយស្នៀតទាត់ត្រឹមបន្តិចបន្តួចប៉ុណ្ណោះ។ ប៉ុន្តែការសម្រេចសេចក្តីរបស់ចៅក្រម ៥ នាក់ គឺផ្តល់ឲ្យ ឡុង សំណាង ឈ្នះទាំង ៥ លើកីឡាករថៃ ហើយអ្នកទស្សនាផ្ទាល់គ្មានប្រតិកម្មទៅនឹងលទ្ធផលនេះឡើយ។
ឡុង សំណាង បានឈ្នះខ្សែក្រវាត់ជាលើកដំបូងក្នុងអាជីព និងអមដោយទឹកប្រាក់ចំនួន ២០ លានរៀល ចំណែកកីឡាករថៃ Pek Thieng ឈ្នះពាន ១ អមដោយទឹកប្រាក់ចំនួន ១២ លានរៀល។
មន្ត្រីជាន់ខ្ពស់ម្នាក់របស់សហព័ន្ធកីឡាប្រដាល់គុនខ្មែរ បាននិយាយដោយសុំមិនឲ្យបញ្ចេញឈ្មោះថា៖ «ក្រោយឈ្នះខ្សែក្រវាត់នេះ ឡុង សំណាង គឺជាបេក្ខជនម្នាក់ក្នុងទម្ងន់ ៦៣,៥ គីឡូក្រាម ក្នុងជម្រើសជាតិ ឆ្នាំ ២០១៩ ហើយ ២០១៩ ក៏ជាឆ្នាំ ដែលក្រុមគុនខ្មែរ ត្រូវមានវត្តមានក្នុងស៊ីហ្គេម នៅហ្វីលីពីន ផងដែរ»៕