ភ្នំពេញ៖ ការវិលមកជួបគ្នាជាលើកដំបូងរវាងកីឡាករ ឡុង ខេត្ត និង យ៉ន ពិសី បានធ្វើឱ្យអ្នកទាំង ២ នេះ ហាក់មានភាពស្ទាក់ស្ទើររៀងៗខ្លួនក្នុងការបង្ហាញពីភាពអះអាងរបស់ខ្លួន ខណៈការជួបគ្នាលើកទី១ នេះ ជាការប្រកួតដ៏សំខាន់ក្នុងវគ្គពាក់កណ្តាលផ្តាច់ព្រ័ត្រ ដើម្បីយកអ្នកឈ្នះឡើងទៅប្រកួតផ្តាច់ព្រ័ត្រជាមួយ រិន ដាវីត ហើយអ្នកចាញ់ត្រូវធ្លាក់ទៅប្រកួតដណ្តើមយកលេខ ៣ ជាមួយ ធន់ អៀនឡៃ។
អ្នកប្រដាល់ ឡុង ខេត្ត និង យ៉ន ពិសី ជាកីឡាករស្រករក្រោយ ប៉ុន្តែជំនួបប្រកួតនេះសំខាន់ មិនអាចមើលរំលងបាន ដែលត្រូវប្រកួតគ្នានៅយប់ថ្ងៃសៅរ៍ សប្តាហ៍នេះ លើសង្វៀន TV5 Boxing Knock Out Series ខណៈការចាញ់ ឬឈ្នះ អាចនឹងតឹងតែងខ្លាំង។
សម្រាប់ការប្រកួតវគ្គជម្រុះជុំទី១ កន្លងមក កីឡាករ ឡុង ខេត្ត បានឈ្នះអ្នកប្រដាល់ លីន សេងហុង ក្លិបបូរីរាជសីហ៍មានរិទ្ធ ដោយពិន្ទុ ចំណែក យ៉ន ពិសី ឈ្នះ រ៉ា រ៉យ៉ា ក្លិបអេភូថងកីឡាដោយពិន្ទុដែរ។ ចំណែកចូលដល់ជុំទី២ ឡុង ខេត្ត បានផ្ដួល បាង កានុន ក្លិបអាណាចក្រគុនខ្មែរ នៅមុនស្នូរជួងបញ្ចប់ទឹកទី២ ហើយ យ៉ន ពិសី បានយកឈ្នះអ្នកប្រដាល់កណ្ដាប់ដៃធ្ងន់ សាន់ សំអុន របស់ក្លិបអារុណរះកីឡា ដោយពិន្ទុដាច់ ៥-០។
យ៉ាងណាមិញនៅវគ្គពាក់កណ្ដាលផ្ដាច់ព្រ័ត្រនេះ ការចាញ់ឬឈ្នះ រវាង ឡុង ខេត្ត និង យ៉ន ពិសី ត្រូវគេរំពឹងថា សុទ្ធតែមានលក្ខណៈស្វិតស្វាញតឹងតែងណាស់ ព្រោះការប្រឹងប្រែង និងត្រៀមប្រកួត និងឆន្ទៈចង់ឈ្នះ គឺស្រួចស្រាវដូចគ្នាជាមួយប្រាក់រង្វាន់ក៏ខុសគ្នា។
តាមស្ថិតិប្រកួតបានពីគណៈកម្មការផ្គូផ្គងបានឱ្យដឹងថា ឡុង ខេត្ត ធ្លាប់ប្រកួតបាន ៨៧ ដង ឈ្នះ ៥៨ ចាញ់ ២០ និងស្មើពិន្ទុ ៩ ដង ក្នុងនោះវាយគូប្រកួតឱ្យសន្លប់បាន ៦ ដង។ ចំពោះ យ៉ន ពិសី វិញ ធ្លាប់ប្រកួតបាន ៣៩ ដង ឈ្នះ ២៩ ចាញ់ ៧ និងស្មើពិន្ទុ ៣ ដង ក្នុងនោះវាយគូប្រកួតឱ្យសន្លប់បាន ១២ ដង ហើយជំនួបប្រកួតក្នុងវគ្គសំខាន់រវាងអ្នកប្រដាល់ទាំង ២ រូបនេះ គឺពួកគេសុទ្ធតែអះអាងពីការឈ្នះ ៥០ ភាគរយដូចគ្នា គឺទំនងខ្លាចគ្នាទៀតផង។
ឡុង ខេត្ត បានប្រាប់ថា៖ «ខ្ញុំសង្ឃឹមឈ្នះត្រឹម ៥០ ភាគរយ ព្រោះមិនធ្លាប់ប្រកួតគ្នាកន្លងមកទេ។ យ៉ាងណាក៏ដោយ ខ្ញុំប្រកួតអស់ពីសមត្ថភាព ដើម្បីប្រជែងយកកៅអីវគ្គផ្តាច់ព្រ័ត្រនេះឱ្យបាន»។ ជាមួយគ្នានេះ កីឡាករ យ៉ន ពិសី ដែលជាជើងថ្មីជំនាន់ក្រោយ មិនហ៊ានអះអាងឈ្នះច្រើនទេ គឺសង្ឃឹម ៥០ ភាគរយដូចគ្នា។
ប្រភពពីអ្នកតាមដានប្រដាល់ គេបានកត់សម្គាល់ឃើញថា ឡុង ខេត្ត ឡើងសង្វៀនចាស់វស្សាជាង យ៉ន ពិសី ហើយពួកគេហ៊ានទស្សន៍ទាយក្រៅផ្លូវការថា ឡុង ខេត្ត មានប្រៀបឈ្នះច្រើនជាង។
ចំណែកលោក ញាន សុធី ជំនួយការរៀបចំការប្រកួតនៅសង្វៀនប៉ុស្តិ៍លេខ ៥ បានប្រាប់ថា៖ «បើតាមខ្ញុំវាយតម្លៃ គឺជំនួបនេះ លំបាកទស្សន៍ទាយឱ្យត្រូវណាស់ ព្រោះ ឡុង ខេត្ត ចាស់វស្សាជាង ប៉ុន្តែទឹកចិត្តក្លាហានចូលវាយសម្រុកវិញ កីឡាករ យ៉ន ពិសី វ៉ៃកាចជាង ពិសេសកណ្តាប់ដៃ ខណៈដែល ឡុង ខេត្ត ល្អជង្គង់។ បន្ថែមលើនេះ សម្រាប់ការបើកសង្វៀនឡើងវិញនេះ យើងបានសម្រិតសម្រាំងកីឡាករបានល្អៗ អមគូដណ្តើមពាននេះផងដែរ»៕