.jpg)
កីឡាករយុគ យក្សផ្លែ (ឆ្វេង) នឹងត្រូវប៉ះកីឡាករថៃ Phat Thou។ ស្រេង ម៉េងស្រ៊ុន
ភ្នំពេញ: ការប្រកួតប្រដាល់គុនខ្មែរវគ្គសន្សំពិន្ទុខ្សែក្រវាត់ខារ៉ាបាវ ទម្ងន់ ៥៧ គីឡូក្រាម នឹងឈានចូលដល់សប្តាហ៍ទី ៣ នាថ្ងៃសៅរ៍ ទី ១៦ ខែមិថុនា ឆ្នាំ ២០១៨ នៅសង្វៀនអាស៊ីអាគ្នេយ៍។
សម្រាប់ការប្រកួតសប្តាហ៍ទី៣នេះ អ្នកប្រដាល់យុគ យក្សផ្លែ មកពីក្លិបបុរី រាជសីហ៍មានរិទ្ធ នឹងត្រូវប៉ះជាមួយកីឡាករថៃ Phat Thou ហើយកីឡាករឡុង ជិន មកពីខ្លារខិននៃក្រសួងមហាផ្ទៃ ត្រូវជាមួយកីឡាករថៃ Phat Seila ដើម្បីស្វែងរក ៣ ពិន្ទុបន្ថែម ស្របពេលដែលអ្នកទស្សនាភាគច្រើនរំពឹងថាកីឡាករខ្មែរនឹងឈ្នះ។ កាលពីប្រកួតជម្រុះជុំទី ១ កីឡាករឡុង ជិន និងកីឡាករយុគ យក្សផ្លែ សុទ្ធតែឈ្នះកីឡាករថៃទទួលបាន ៣ ពិន្ទុដូចគ្នា។
ជាមួយគ្នានេះ កីឡាករឈុត សេរីវ៉ាន់ថន ក៏មាន ៣ ពិន្ទុក្នុងដៃដូចគ្នាផងដែរ ប៉ុន្តែនៅលើតារាងពិន្ទុរួម មានកីឡាករឡុង ជិន តែម្នាក់ប៉ុណ្ណោះឈរនៅកំពូលតារាង ក្រោយពីបានផ្តួលដៃគូគឺកីឡាករថៃឲ្យសន្លប់ត្រឹមទឹកទី ១។
ខណៈការប្រកួតនឹងឈានចូលសប្តាហ៍ទី ៣ ឡុង ជិន ដែលត្រូវវិលជុំមកប៉ះជាមួយ Phat Seila ត្រូវបានគេមើលឃើញថា មានសមត្ថភាពប្រហាក់ប្រហែលគ្នា ហើយការប្រកួតអាចនឹងកាន់តែតឹងតែងជាងមុន កាលពីជុំទី ១ Phat Seila បានចាញ់យក្សផ្លែ ប៉ុន្តែសមត្ថភាពពិតរបស់គេល្អជាង និងមានប្រៀបជាងចំនួន ៤ ទឹក ប៉ុន្តែ បានចាញ់ក្នុងទឹកទី ៥ ដោយភ្លាត់ស្នៀតដោយសារតែយក្សផ្លែ គ្រវែងដៃចូលមុខនៅទឹកនោះ ដែលបណ្តាលឲ្យអាជ្ញាកណ្តាលរាប់ និងនាំឲ្យចាញ់ទាំងមិនអស់ចិត្ត។ កីឡាករថៃ Phat Seila ឡើងសង្វៀនបានចំនួន ៧៧ លើក ឈ្នះ ៦៦ លើក ចាញ់ ១០ លើក និងស្មើ ១ លើក ហើយការប្រកួតចុងក្រោយរបស់គេកាលពីថ្ងៃទី ២ ខែមិថុនា ឆ្នាំ ២០១៨ បានបញ្ចប់ដោយចាញ់កីឡាករយក្សផ្លែ។
ចំណែកឯ ឡុង ជិន មានប្រវត្តិប្រកួតបានចំនួន ៦៧ លើក ឈ្នះ ៥១ លើក ចាញ់ ១៤ លើក និងស្មើ ១ លើក ហើយប្រកួតចុងក្រោយកាលពីថ្ងៃទី ២ ខែមិថុនា ឆ្នាំ ២០១៨ បានបញ្ចប់ដោយឈ្នះកីឡាករថៃ Phat Thou ក្នុងទឹកទី ១។ អ្នកស្រីឡុង រ៉ាវី អ្នកគ្រប់គ្រងកីឡាករឡុង ជិន បាននិយាយថា៖ «ឡុង ជិន ហាត់ និងត្រៀមការប្រកួតបានល្អ ប៉ុន្តែមានបញ្ហាខ្លះៗដោយកីឡាកររូបនេះខ្សោយខាងវិន័យ ព្រមទាំងដើរលេងច្រើនដែលជាកង្វល់»។
ចំពោះការជួបប្រកួតជាមួយ Phat Seila អ្នកស្រីបានអះអាងថា៖ «មិនជាបញ្ហាលំបាកប៉ុន្មានទេ ពីព្រោះថា ស្នៀតជង្គង់របស់ឡុង ជិន អាចធានាវ៉ៃ ៥ ទឹកពេញបាន ហើយតាមការវាយតម្លៃរបស់ខ្ញុំ ដែលធ្លាប់ឃើញក្បាច់គុនរបស់អ្នកប្រដាល់ទាំង ២ ខ្ញុំហ៊ានអះអាងថា ខ្ញុំសង្ឃឹមឈ្នះ ៦០ ភាគរយ ពីព្រោះការប្រកួតគ្នាអស់ពីសមត្ថភាព ដើម្បីយក ៣ ពិន្ទុ ដែលតឹងតែងដូចគ្នា ដោយយើងគ្មានទម្លាប់មើលងាយដៃគូប្រកួតបានទេ»។
លោកថាញ់ វ៉ាឡេក គ្រូបង្វឹកកីឡាករថៃ Phat Seila បាននិយាយថា៖ «គូនេះខ្លាំងប៉ះខ្លាំង ហើយលទ្ធផលយ៉ាងណា ខ្ញុំមិនហ៊ានទស្សន៍ទាយមុនទេ ប៉ុន្តែការឡើងប្រកួតត្រូវតែមានសង្ឃឹមឈ្នះ»។
លោកបានបន្ថែមទៀតថា បើតាមការវាយតម្លៃរបស់លោកផ្ទាល់ កីឡាករ Phat Seila នឹងឈ្នះក្នុងការប្រកួតនេះដោយសង្ឃឹម ៧០ ភាគរយ។ ចំណែកកីឡាករថៃ Phat Thou និងកីឡាករកម្ពុជាយុគ យក្សផ្លែ ដែលត្រូវប្រជែងយក ៣ ពិន្ទុដូចគ្នានោះ ក៏លំបាកទស្សន៍ទាយណាស់ដែរ ពីព្រោះសមត្ថភាពរបស់កីឡាករថៃរូបនេះមិនទាន់បង្ហាញឲ្យច្បាស់ថា មានជំនាញផ្នែកអ្វីនៅឡើយ ពីព្រោះការប្រកួតរបស់ Phat Thou នេះលើកមុនបានតែ ១ ទឹក ក៏សន្លប់ក្រោមស្នាដៃកីឡាករឡុង ជិន តែម្តង។
ម្យ៉ាងវិញទៀត យុគ យក្សផ្លែ មានជំនាញផ្នែកកណ្តាប់ដៃ ប៉ុន្តែស្ថានភាពប្រកួតរបស់គេភាគច្រើនគឺល្អបានតែ ៣ ទឹកដំបូង ចំណែកនៅទឹកទី ៤ ឬទី ៥ ភាគច្រើនវេទនាណាស់ផ្នែកកម្លាំង។ ប្រវត្តិប្រកួតរបស់យក្សផ្លែ គឺច្រើនជាងកីឡាករថៃ ដោយធ្លាប់ប្រកួតចំនួន ១៥៦ លើក ឈ្នះ ១៣១ លើក ចាញ់ ២១ លើក និងស្មើ ៤ លើក ចំណែកកីឡាករថៃជាដៃគូ ប្រកួតបានតែ ៨៦ លើក ឈ្នះ ៦៨ លើក ចាញ់ ១៧ លើក និងស្មើ ១ លើក៕
