.jpg)
កីឡាកររឿម វណ្ណៈ (ឆ្វេង) និងកីឡាករថៃ Fa Nimith កាលពីថ្ងៃអាទិត្យ។ យឺន ពន្លក
ភ្នំពេញ: ការប្រកួតគុនខ្មែរលក្ខណៈមិត្តភាពអន្តរជាតិកម្ពុជា និងថៃកាលពីល្ងាចថ្ងៃអាទិត្យ ទី ១៣ ខែឧសភា ឆ្នាំ ២០១៨ នៅសង្វៀនអាស៊ីអាគ្នេយ៍ កីឡាករប្រដាល់ឡុង ជិន មកពីក្លិបខ្លារខិនមានរិទ្ធនៃក្រសួងមហាផ្ទៃបានទទួលលទ្ធផលកាន់តែល្អដោយប្រកួតឈ្នះកីឡាករថៃ Sak Thanong ដោយពិន្ទុ។ ប៉ុន្តែ កីឡាករចាស់វស្សារឿម វណ្ណៈ មកពីក្លិបរាជសីហ៍ខេត្តបន្ទាយមានជ័យ បានតស៊ូជាមួយកីឡាករ Fa Nimith របស់ថៃបានតែ ៣ ទឹក ក៏សន្លប់ធំតែម្តងដោយសារក្បាច់ជង្គង់។
ឡុង ជិន ដែលទើបតែដណ្តើមបានចំណាត់ថ្នាក់លេខ ២ ជាជើងឯករងគូបូតាទម្ងន់ ៥៤ គីឡូក្រាម នៅសង្វៀនបាយ័នកាលពីប៉ុន្មានសប្តាហ៍មុននោះបានឡើងមកប្រកួតឈ្នះកីឡាករថៃគួរឲ្យសរសើរបំផុត។
ការប្រកួតជាមួយកីឡាករថៃចំនួន ៦ លើកចុងក្រោយនេះ ឡុង ជិន ទទួលបានលទ្ធផលឈ្នះទាំងអស់ក្នុងនោះបានផ្តួលដៃគូឲ្យសន្លប់ដល់ទៅ ៤ លើកឯណោះ។ ឡុង ជិន គឺជាកីឡាករវ័យក្មេង និងបានចូលមកប្រឡូកក្នុងពិភពអ្នកប្រដាល់ទើបតែ ៣ ឆ្នាំប៉ុណ្ណោះ ប៉ុន្តែបានសាងកេរិ៍្តឈ្មោះល្បីល្បាញលំដាប់ជួរមុខ ដោយគេចាញ់ត្រឹមកីឡាករជើងខ្លាំងវ័យក្មេងកម្ពុជាដូចគ្នា សុខ ធី ហៅកាកា តែម្នាក់ប៉ុណ្ណោះក្រៅពីនេះគឺលំបាករកដៃគូទប់ទល់ណាស់។
ក្នុងការប្រកួត៥ទឹកពេញ ឡុង ជិន មានប្រៀបឈ្នះថៃសឹងតែគ្រប់ទឹកតែម្តង ដោយមិនលំបាកឲ្យចៅក្រមដាក់ពិន្ទុនោះឡើយ។ អ្នកស្រីឡុង រ៉ាវី អ្នកគ្រប់គ្រងផ្ទាល់ បាននិយាយថា៖ «ឡុង ជិន បានឆ្លងកាត់ការប្រកួតសរុបបានចំនួន ៧៧ លើក ភាគច្រើនឈ្នះ ក្នុងនោះ ប្រកួតជាមួយកីឡាករបរទេសបានជិត ៣០ លើកឯណោះ»។
អ្នកស្រីបានបន្តថា៖ « អាជិន វាល្អ តែខ្សោយបញ្ហាវិន័យ ហើយខ្ញុំសោកស្តាយដែលរូបគេមិនបានចូលរួមការប្រកួតក្នុងកីឡាជាតិលើកទី ២ ដោយសារតែប្រជែងចុះឈ្មោះមិនបាន ព្រោះមួយប្រភេទទម្ងន់គេយកតែម្នាក់ក្នុងមួយសមាគម»។
ឡុង ជិន ធ្លាប់ឈ្នះមេដាយមាសជម្រើសជាតិឆ្នាំ ២០១៧ កន្លងមក ក្នុងទម្ងន់ ៥៤ គីឡូក្រាម។ ចំណែក រឿម វណ្ណៈ ជាកីឡាករចាស់វស្សាដែលធ្លាប់ល្បីល្បាញតាំងពីឆ្នាំ ២០១២ មកម្ល៉េះ ប៉ុន្តែមួយរយៈប៉ុន្មានឆ្នាំចុងក្រោយនេះ ការប្រកួតរបស់គេធ្លាក់ចុះទាំងបច្ចេកទេស ទាំងកម្លាំង ហើយការប្រកួតម្តងមិនសូវគេចផុតពីសន្លប់នោះឡើយ។
ប្រវត្តិប្រកួតក្នុងពិភពប្រដាល់នេះ រឿម វណ្ណៈ ធ្លាប់ខ្លាំងនៅក្លិបរស្មីភូមិគាប ខេត្តបន្ទាយមានជ័យ ហើយបន្ទាប់មកមានភាពល្បីល្បាញក្នុងសមាគមប្រដាល់ក្រសួងការពារជាតិ ប៉ុន្តែ ដោយបញ្ហាការហ្វឹកហាត់ និងគោរពវិន័យមិនល្អទើប ការប្រកួតធ្លាក់ចុះខ្សោយហើយចុងក្រោយបានផ្លាស់ទៅកាន់ក្លិបប្រដាល់រាជសីហ៍ខេត្តបន្ទាយមានជ័យ ជាមួយលោកគ្រូវ៉ោយ អេង នៅឯស្រុកកំណើតវិញ៕
