ភ្នំពេញ: អ្នកប្រដាល់ជំនាញក្បាច់ជង្គង់ និងមានកម្ពស់ខ្ពស់ ឡុង សុភី មកពីក្លិបសាលវ័ន្តកីឡានៃសមាគមប្រដាល់ក្រសួងមហាផ្ទៃ បានឈ្នះខ្សែក្រវាត់ ១ ទៀតគឺស្រាបៀរ LEO ទម្ងន់ ៧០ គីឡូក្រាមនៅសង្វៀនបាយ័នបឹងស្នោ កាលពីល្ងាចថ្ងៃអាទិត្យ ទី ១៣ ខែឧសភា ឆ្នាំ ២០១៨ ដោយរូបគេបានយកឈ្នះកីឡាករម៉ឺន សុភា មកពីសមាគមប្រដាល់ក្រសួងការពារជាតិដោយពិន្ទុដាច់តែម្តងក្នុងការប្រកួត ៥ ទឹកពេញ។
បើគិតពីប្រវត្តិប្រកួតក្នុងអាជីពប្រដាល់គុនខ្មែររយៈពេលជាង ១៤ ឆ្នាំ ឡុង សុភី បានឈ្នះពានជើងឯកជាតិច្រើនឆ្នាំ និងឈ្នះខ្សែក្រវាត់សរុបទាំងអស់ចំនួន ៧ ស្ថាប័នផ្សេងៗគ្នាក្នុងប្រភេទទម្ងន់ខុសៗគ្នា។ ក្នុងអំឡុងការប្រកួតប្រជែងវគ្គជម្រុះសន្សំពិន្ទុខ្សែក្រវាត់ LEO Beer ទម្ងន់ ៧០ គីឡូក្រាមនេះ ឡុង សុភី បានយកឈ្នះកីឡាករថៃចំនួន ៤ នាក់ និងឈ្នះថៃក្នុងវគ្គពាក់កណ្តាលផ្តាច់ព្រ័ត្រមួយលើកទៀត មុននឹងយកឈ្នះលើ ម៉ឺន សុភា ដើម្បីគ្រប់គ្រងខ្សែក្រវាត់នេះតែម្តងដែលសរុបមានចំនួន ៦ ប្រកួត។
ការប្រកួតវគ្គផ្តាច់ព្រ័ត្រដណ្តើមខ្សែក្រវាត់ដែលអមដោយទឹកប្រាក់ចំនួន ៦០០០ ដុល្លារនេះ ជាការប្រកួតស្វិតស្វាញរយៈពេល ៥ ទឹក ហើយអាជ្ញាកណ្តាលលោកឃឹម សុជាតិ ត្រូវបានគេមើលឃើញថា ហាក់ដូចជាខិតខំជួយ ម៉ឺន សុភា ខ្លះដែរ ប៉ុន្តែមិនអាចទៅរួចដោយសារស្នៀតជង្គង់របស់ឡុង សុភី វាយចូលច្រើនណាស់សឹងតែរកកលសន្លប់ម្តងៗទៀតផង។
ទោះជាយ៉ាងណា លទ្ធផលពីសំណាក់គណៈកម្មការបាន ប្រកាសជាផ្លូវការ ដោយផ្តល់ជ័យជម្នះយ៉ាងសុក្រឹត ខណៈក្នុងចំណោមចៅក្រមទាំង ៥ ដែលដាក់ពិន្ទុ មានតែចៅក្រមតែ ៣ នាក់ប៉ុណ្ណោះត្រូវបានប្រកាសថា បានសម្រេចឲ្យ ឡុង សុភី ឈ្នះពិន្ទុ ៩៩ ដល់ ៩៦ ដូចគ្នាទាំងអស់។ ការប្រកាសលទ្ធផលបែបនេះ បានបង្កើតឲ្យមានចម្ងល់ទៅលើលទ្ធផលពីសំណាក់ចៅក្រម ២ នាក់ផ្សេងទៀតដែលផ្តល់ពិន្ទុឈ្នះទៅឲ្យម៉ឺន សុភា ។
ស្ថានភាពប្រកួតចំនួន ៥ ទឹកជាក់ស្តែង ឡុង សុភី មានប្រៀបសឹងតែគ្រប់ទឹក ពិសេសនៅទឹកទី ៣ និងទី ៤ ខណៈស្នៀតជង្គង់ និងស្នៀតកែងរបស់ឡុង សុភី បានបង្ខំឲ្យម៉ឺន សុភា ស្ទើរតែសន្លប់ម្តងៗ ប៉ុន្តែអាជ្ញាកណ្តាលលោកឃឹម សុជាតិ មិនបានរាប់នោះឡើយ បើទោះបី ម៉ឺន សុភា ហាក់ស្រុតចុះកម្លាំង និងដុនដាបកាន់តែខ្លាំងក៏ដោយ។ ឡុង សុភី ឈ្នះបានខ្សែក្រវាត់ និងទឹកប្រាក់ ៦០០០ ដុល្លារ ចំណែកម៉ឺន សុភា ទទួលបានពាន និងអមដោយទឹកប្រាក់ ៣០០០ ដុល្លារផងដែរ។
ក្រោយការប្រកួត ឡុង សុភី បានប្រាប់ភ្នំពេញ ប៉ុស្តិ៍ ថា៖ «ខ្ញុំមានអាយុពិត ៣០ ឆ្នាំហើយ មានស្រុកកំណើតនៅ ភូមិស្វាយកង់ ឃុំអន្លង់វិល ស្រុកសង្កែ ខេត្តបាត់ដំបង ដោយធ្លាប់ប្រឡូកក្នុងប្រដាល់គុនខ្មែរជាង ១៤ ឆ្នាំទទួលបានខ្សែក្រវាត់សរុបចំនួន ៧ ស្ថាប័ន»។
ឡុង សុភី បានលម្អិតថា៖ «នៅក្នុងរយៈពេល ១៤ ឆ្នាំនេះ ខ្ញុំធ្លាប់ចូលរួមប្រកួតដណ្តើម ខ្សែក្រវាត់ចំនួន ១០ លើក ឈ្នះខ្សែក្រវាត់ ៧ លើក និង ៣ លើកបានចំណាត់ថ្នាក់លេខ ២ លេខ ៣ និងលេខ ៤»។
លោកឡុង សាលវ័ន្ត គ្រូបង្វឹក និងជាបងប្រុស បាននិយាយថា៖ «ខ្សែក្រវាត់ទាំង ៧ ដែលឡុង សុភី ដណ្តើមបាននោះមានទី ១ ខ្សែក្រវាត់ស្រាសាច់ដុំ ទម្ងន់ ៦០ គីឡូក្រាមនៅសង្វៀន CTN ឆ្នាំ ២០០៨។ ខ្សែក្រវាត់ទី ២ K Cement ទម្ងន់ ៦៣,៥ គីឡូក្រាមនៅសង្វៀន TV5 ឆ្នាំ ២០១០។ខ្សែក្រវាត់ទី ៣ ស្រាអាឡិចហ្សង់វិស្គី ទម្ងន់ ៦៥ គីឡូក្រាមនៅសង្វៀនប៉ុស្តិ៍លេខ ៣ នៅឆ្នាំ ២០១១។ ខ្សែក្រវាត់ទី ៤ ស្រាផែនដីទម្ងន់ ៦៥ គីឡូក្រាមនៅ CTN ឆ្នាំ ២០១២។ ខ្សែក្រវាត់ទី ៥ K Cement ទម្ងន់ ៦៧ គីឡូក្រាម CTN ឆ្នាំ ២០១៤។ខ្សែក្រវាត់ទី ៦ ខារ៉ាបាវទម្ងន់ ៦៩ គីឡូក្រាម នៅបាយ័ន ឆ្នាំ ២០១៥ និងខ្សែក្រវាត់ទី ៧ ស្រាបៀរលីអូទម្ងន់ ៧០ គីឡូក្រាមនៅបាយ័នឆ្នាំ ២០១៨ នេះតែម្តង»។
កីឡាករឡុង សុភី បានប្រាប់បន្ថែមទៀតថា នៅពេលមានវ័យកាន់តែចាស់ប្រកួតលែងកើតនោះ រូបគេមានបំណងចង់ក្លាយខ្លួនជាគ្រូបង្វឹក និងជាមន្ត្រីចៅក្រមអាជ្ញាកណ្តាលផងដែរ៕