.jpg)
Keng Kat របស់ថៃ នឹងត្រូវជួប ពុទ្ធ ឆាយរិទ្ធី នៅថ្ងៃអាទិត្យ។ សហការី
ភ្នំពេញៈ អ្នកប្រដាល់កម្ពុជា ៤ នាក់ និងថៃ ៤ នាក់ ត្រូវបានគណៈកម្មការផ្គូផ្គងនៃសង្វៀនអាស៊ីអាគ្នេយ៍ ដាក់ឲ្យពួកគេប្រកួតប្រជែងគ្នាដណ្តើមខ្សែក្រវាត់ Wurkz លើកទី ២ ក្នុងទម្ងន់ ៦៧ គីឡូក្រាម ដោយនឹងចាប់ផ្តើមពីថ្ងៃអាទិត្យទី ២៣ ខែកញ្ញា ខាងមុខនេះតទៅ ដោយគ្រោងចំណាយពេលប្រកួតចំនួន ១២ សប្តាហ៍ ទើបបញ្ចប់។
សម្រាប់សមាសភាពកីឡាករកម្ពុជាទាំង ៤ នាក់ មានកីឡាករ ពុទ្ធ ឆាយរិទ្ធី មកពីក្លិបពុទ្ធសេរីវង្សកីឡា ឡុង សុភី ក្លិបសាលវ័ន្តកីឡារឿង សារ័ត្ន របស់ក្លិបកងទ័ពឆត្រយោង ៩១១ និង ម៉ាជ សុខរ៉ា ក្លិបតាព្រហ្មមានជ័យ។ ចំណែកថៃទាំង ៤ នាក់មានកីឡាករ Keng kat, Kev Kongvan, Pheach Arun និង Kao Ah។
តាមរូបមន្តប្រកួត គឺភាគីកម្ពុជា ត្រូវប្រកួតជម្រុះវិលជុំជាមួយភាគីថៃ ដើម្បីរកអ្នកមានពិន្ទុខ្ពស់ ២ នាក់ គឺខ្មែរ ១ ថៃ ១ ឡើងទៅប្រកួតផ្តាច់ព្រ័ត្រ ហើយក្នុងចំណោមអ្នកប្រដាល់កម្ពុជាទាំង ៤ នាក់ មានតែ ឡុង សុភី ជាជើងចាស់ជាងគេ ដែលមានមតិមួយចំនួនលើកឡើងថា គេអាចមានប្រៀប និងមានឱកាសច្រើនជាងគេ ក្នុងការឆ្លងផុតវគ្គជម្រុះ ឡើងទៅវគ្គផ្តាច់ព្រ័ត្រជាមួយកីឡាករថៃ។
ឆ្លើយតបចំពោះការលើកឡើងនេះ លោក រាជ សុផែន មន្ត្រីបច្ចេកទេសសហព័ន្ធប្រដាល់កីឡាគុនខ្មែរ ដែលប្រចាំការនៅសង្វៀន SEATV បានពន្យល់ថា៖ «រឿងសមត្ថភាពកីឡាករកម្ពុជាទាំង ៤ នាក់នេះ`យើងមិនអាចវាយតម្លៃមុនទេ ព្រោះពី ១ ថ្ងៃ ទៅ ១ ថ្ងៃ កីឡាករមានសមត្ថភាពរីកចម្រើនផ្សេងៗពីគ្នា ដូចជា រឿង សារ័ត្ន, ពុទ្ធ ឆាយរិទ្ធី និង ម៉ាជ សុខរ៉ា មួយរយៈនេះវ៉ៃឡើង ដោយឈ្នះ ជានិច្ច តែជើងចាស់ ឡុង សុភី មួយរយៈនេះក៏ហាក់ធ្លាក់ចុះដែរ អ៊ីចឹង កុំអាលវាយតម្លៃអី»។
បន្ថែមពីលើនេះ តាមរូបមន្តប្រកួត រឿងកីឡាករកម្ពុជាខ្លាំង ឬខ្សោយនោះ មិនអាស្រ័យនឹងកីឡាករកម្ពុជាដូចគ្នានោះទេ គឺអាស្រ័យលើការប្រកួតជាមួយថៃឯណោះ ព្រោះកីឡាករយើងមិនប៉ះគ្នាទេ ហើយអ្វីដែលត្រូវបារម្ភនោះ គឺសមត្ថភាពកីឡាករថៃទៅវិញ ដែលកំណត់លទ្ធផលឲ្យកីឡាករខ្មែរ។
ចំពោះបទពិសោធ និងប្រវត្តិប្រកួតរបស់កីឡាករថៃទាំង ៤ ត្រូវបានលោក ថៃ អ៊ូ ប្រតិភូនាំកីឡាករថៃមកប្រកួត ប្រាប់ថា កីឡាករ Keng kat មានកម្ពស់ ១,៧០ ម៉ែត្រ ប្រកួតបាន ១០៣ ដង ឈ្នះ ៩០ ចាញ់ ១២ និងស្មើ ១ ដង ទី ២ Kev Kongvan មានកម្ពស់ ១,៦៨ ម៉ែត្រ ប្រកួត ៨៥ ដង ឈ្នះ ៦៧ ចាញ់ ១៦ និងស្មើ ២ ដង ទី ៣ Pheach Aroun មានកម្ពស់ ១,៧១ ម៉ែត្រ ធ្លាប់ប្រកួត ៩០ ដង ឈ្នះ ៨០ និងចាញ់ ១០ ដង ហើយទី ៤ Kao Ah ជាកីឡាករចំណូលថ្មីមានកម្ពស់ ១,៧០ ម៉ែត្រ ធ្លាប់ប្រកួតបាន ៧០ ដង ឈ្នះ ៦១ និងចាញ់ ៩ ដង។
ចំពោះប្រាក់រង្វាន់ សម្រាប់ការប្រកួតរដូវកាលទី ២ នេះត្រូវបានលោក ញាន សុធី នាយកគ្រប់គ្រងកម្មវិធីប្រចាំសង្វៀន SEATV ប្រាប់ថា អ្នកលេខ ១ បានខ្សែក្រវាត់ នឹងបានប្រាក់រង្វាន់ ៥០០០ ដុល្លារ អ្នកចាញ់លេខ ២ បាន ៣០០០ ដុល្លារ គឺគ្មានវគ្គពាក់កណ្តាលផ្តាច់ព្រ័ត្រទេ។ ចំណែកប្រាក់តម្លៃខ្លួនកីឡាករកម្ពុជា គឺ ១ ប្រកួតទទួលបាន ៤០០ ដុល្លារដូចគ្នា។
សម្រាប់ការប្រកួតបើកឆាក នៅថ្ងៃអាទិត្យ ចុងសប្តាហ៍នេះ ម៉ាជ សុខរ៉ា ត្រូវប៉ះថៃ Kev Kongvan ឯ ពុទ្ធ ឆាយរិទ្ធី ត្រូវប្រកួតជាមួយ Keng kat ដើម្បីដណ្តើមគ្នាយក ៣ ពិន្ទុ។ លោក ណន រិទ្ធ គ្រូបង្វឹក ឆាយរិទ្ធី និយាយថា៖ «ជំនួបលើកនេះ ខ្ញុំមានសង្ឃឹមលើ ឆាយរិទ្ធី ត្រឹម ៥០ ភាគរយប៉ុណ្ណោះ ព្រោះថៃរូបនេះ ជាជើងចាស់ ១ រូប មានបទពិសោធយូរ និងមានស្នៀតទាត់ល្អ»៕
