.jpg)
តើ Chhouk Chhai ឬ វង្ស វិឆ័យ ដែលអាចដណ្តើមបាន៣ពិន្ទុ? រូបថត សហការី
ភ្នំពេញ៖ អ្នកជំនាញលេងជង្គង់ ឡុង សុភី និង វង្ស វិឆ័យ នឹងត្រូវប្រកួតជម្រុះចុងក្រោយជាមួយកីឡាករថៃ Chhieng Chhai និង Chhouk Chhai ក្នុងការដណ្តើមខ្សែក្រវាត់ជើងឯកអ្នកប្រយុទ្ធកំពូលថាមពលឆេមពាន ទម្ងន់ ៦៧ គ.ក្រ នៅសង្វៀន SEATV នាយប់ថ្ងៃអាទិត្យនេះ ប៉ុន្តែនេះគ្រាន់តែជាការប្រកួតបង្រ្គប់កិច្ចរបស់ សុភី និង វិឆ័យ ទេ ព្រោះអ្នកទាំង ២ នេះ បានកក់កៅអីទៅវគ្គបន្តរួចទៅហើយ។
សម្រាប់ការប្រកួត ៣ លើកកន្លងមកនេះ វង្ស វិឆ័យ បានឈ្នះទាំង ៣ លើក មាន ៩ ពិន្ទុ ប៉ុន្តែការជួប Chhouk Chhai លើកនេះ ត្រូវបានគេមើលឃើញថា នឹងមានភាពតានតឹងខ្លាំង ព្រោះសូម្បីតែ ឡុង សុភី ក៏បានចាញ់ក្រោមស្នៀតជង្គង់របស់ថៃម្នាក់នេះដែរ។ ចំណែក ឡុង សុភី មានភាគរយខ្ពស់ ក្នុងការយកឈ្នះ Chhieng Chhai ខណៈពេលនេះគេមាន ៧ ពិន្ទុ ជាមួយការឈ្នះ ២ និងចាញ់ ១ ប្រកួត។
តាមរយៈរូបមន្តការប្រកួតខ្សែក្រវាត់នេះ គឺគេតម្រូវយកកីឡាករ ២ នាក់ តាមពូលទាំង ២ ឡើងទៅប្រកួតគ្នា នៅវគ្គពាក់កណ្តាលផ្តាច់ព្រ័ត្រ ប៉ុន្តែនៅក្នុងវគ្គខ្វែងនេះ គណៈកម្មការកំណត់ឲ្យអ្នកបានលេខ ១ និងលេខ ២ ក្នុងពេលជាមួយគ្នាត្រូវប្រកួតគ្នា យកអ្នកឈ្នះឡើងទៅជួបគ្នា នៅវគ្គផ្តាច់ព្រ័ត្រ។ ហេតុនេះ យោងតាមលទ្ធផលការប្រកួតនៅពេលនេះ រវាង ឡុង សុភី និង វង្ស វិឆ័យ នឹងត្រូវប្រកួតគ្នាយកអ្នកឈ្នះឡើងទៅជួបអ្នកឈ្នះម្នាក់ទៀតមកពីពូលថៃ នៅវគ្គផ្តាច់ព្រ័ត្រ។
យ៉ាងណាក៏ដោយ សម្រាប់ការប្រកួតនេះ វង្ស វិឆ័យ អាចជួបការលំបាកច្រើន ពីព្រោះ Chhouk Chhai មានបទពិសោធ និងបច្ចេកទេសប្រកួតច្រើនជាង។ លោក ឡៅ ស៊ីណាត គ្រូបង្វឹកជំនួយរបស់ វង្ស វិឆ័យ បានប្រាប់ថា៖ «វិឆ័យ មានប្រៀបផ្នែកទាត់ និងកម្លាំងលើកីឡាករថៃប៉ុន្តែលំបាកក្នុងការចាប់ឱបឡើងជង្គង់ ដោយយើងចាញ់ប្រៀបគេបន្តិច។ ទោះជាយ៉ាងណាកីឡាករថៃរូបនេះ ល្អបានតែឱបឡើងជង្គង់ប៉ុណ្ណោះ ហេតុនេះបើយើងធាក់ចេញ ឬវាយប្រយោល គឺគ្មានក្បាច់អ្វីយកឈ្នះយើងទេ ដូច្នេះយើងសង្ឃឹមឈ្នះ ៨០ ភាគរយ»។
ចំណែកលោក ថៃ អ៊ូ ប្រតិភូនាំកីឡាករថៃមកប្រកួត និយាយថា៖ «បើ Chhouk Chhai មានឱកាសចាប់ វង្ស វិឆ័យ បាន គឺឈ្នះស្រួល ប៉ុន្តែបើចាប់មិនបានទេ គឺវាយឆ្ងាយមិនឈ្នះ វង្ស វិឆ័យ ឡើយ។ ទោះយ៉ាងណា Chhouk Chhai ទោះបីចាញ់ ឬឈ្នះ លើកនេះ ក៏បានឡើងទៅវគ្គបន្តដែរ»។
លោក ញាន សុធី នាយកគ្រប់គ្រងប្រដាល់ប្រចាំសង្វៀន SEATV បានប្រាប់ថា៖ «ផ្អែកតាមលក្ខខណ្ឌប្រកួត យើងបានរកឃើញអ្នកឈ្នះក្នុងពូលកម្ពុជាសម្រាប់វគ្គ ១/២ ផ្តាច់ព្រ័ត្ររួចហើយ គឺកីឡាករ ឡុង សុភី និង វង្ស វិឆ័យ ចំណែកពូលថៃ ទើបតែឃើញ Chhouk Chhai ម្នាក់ទេ ចំណែកថៃម្នាក់ទៀត ត្រូវរង់ចាំអ៊ុតមើលលទ្ធផលការប្រកួតជម្រុះចុងក្រោយនេះសិន»៕
