ភ្នំពេញៈ កីឡាករជើងខ្លាំងលំដាប់ជួរមុខរបស់កម្ពុជា ឡុង សុភី បានប្រើក្បាច់ជង្គង់ហោះផ្តួលកីឡាករថៃមានសមត្ថភាពខ្សោយជាង Yourt Pholong ឲ្យសន្លប់ក្នុងទឹកទី៣ និងទទួលបានប្រាក់ឧបត្ថម្ភបន្ថែមចំនួន ២០ ម៉ឺនរៀល ស្របពេលដៃគូរបស់ ឆៃ សារ៉ា ត្រូវបានគណៈកម្មការបណ្តេញចុះពីសង្វៀន ព្រោះបានសន្លប់ងាយពេក ចំណែក រឿម វណ្ណៈ ដែលមានប្រៀបទៅហើយនោះបែរជាត្រូវកីឡាករបារាំង MaurinChalie វាយឲ្យបែកក្បាលរហូតសុំចុះចាញ់វិញ។
តាមរយៈការប្រកួតនៅសង្វៀន SEATV កាលពីព្រឹកថ្ងៃអាទិត្យម្សិលមិញនោះ ឡុង សុភី បានប្រើបច្ចេកទេសវាយបានល្អ ដោយចេញបានច្រើន និងចំគោលដៅមានប្រសិទ្ធភាពល្អ។ បន្ថែមពីលើនេះ ឡុង សុភី បានប្រើស្នៀតទាត់ចូលល្វែងក្រោមបណ្តាលឲ្យ Yourt Pholong ដួលញឹកញាប់ ហើយអាជ្ញាកណ្តាល យឹម សុខុម បានរាប់ទៅលើកីឡាករថៃចំនួន ៨ ដល់ទៅ ២ លើកហើយឈានចូលដល់ទឹកទី ៣ ឡុង សុភី បានប្រើក្បាច់ជង្គង់ហោះ បុកចូលពោះបណ្តាលឲ្យសន្លប់ធំតែម្តង។
ប៉ុន្តែសម្រាប់មតិទូទៅ ឬប្រភពពីអ្នកទស្សនាផ្ទាល់ភាគច្រើនលាន់មាត់ថា អ្នកប្រដាល់ថៃរូបនេះមានសមត្ថភាពខ្សោយ និងអន់បំផុតដែលគ្មានលទ្ធភាពប្រឈមវាយតតាំងជាមួយ ឡុង សុភី បានក្នុងការប្រកួតជក់ចិត្តនោះឡើយ។
ប្រភពរិះគន់ថាការផ្គូផ្គងអ្នកប្រដាល់គូអន្តរជាតិប្រដាល់គុនខ្មែរយូរៗ មិនសមស្របទៅនឹងបច្ចេកទេសសំខាន់ជាគោលចំនួន ៤ ចំណុចនោះឡើយមាន កម្ពស់ ទម្ងន់ អាយុ និងបទពិសោធប្រហាក់ប្រហែលគ្នាគឺមានពេលខ្លះកីឡាករខ្មែរមានសមត្ថភាពល្អជាងដាច់ ហើយពេលខ្លះទៀតថៃមានសមត្ថភាពខ្លាំងជាងកីឡាករកម្ពុជាដាច់ចំណែកឯគូដែលមានសមត្ថភាពប្រហាក់ប្រហែលដែលប្រកួតល្អមើលនោះដូចជាមិនសូវឃើញសោះ។
ជុំវិញការរិះគន់នេះលោក ញាន សុធី នាយកគ្រប់គ្រងកម្មវិធីប្រដាល់ប្រចាំសង្វៀន SEATV បាននិយាយថា៖ «វាជារឿងធម្មតាទេ គូប្រកួតយើងលំបាកផ្គូផ្គង ព្រោះប្រវត្តិប្រកួត និងឃ្លីបវីដេអូមើលទៅឃើញល្អ ប៉ុន្តែដល់មកប្រកួតជាក់ស្តែងអាខ្លះល្អដាច់ ហើយអាខ្លះទៀតខ្សោយដាច់។ ប៉ុន្តែបើកីឡាករបរទេសធ្លាប់មកប្រកួតនៅកម្ពុជាញឹកញាប់ យើងស្គាល់សមត្ថភាពច្បាស់ យើងផ្គូផ្គងប្រកួតបានល្អ។ ទោះយ៉ាងណាយើងនឹងទទួលយកការរិះគន់របស់មហាជន ដើម្បីយកមកអនុវត្តកែសម្រួលការរៀបចំឲ្យល្អ ព្រោះមហាជនក៏ចេះមើលប្រដាល់គឺលោកដឹងពីសមត្ថភាព និងកម្រិតបច្ចេកទេសមួយចំនួនរបស់កីឡាករផងដែរ»។
ចំណែកកីឡាករថៃ Savth Phat ត្រូវបាន ឆៃ សារ៉ា ទាត់ចូលត្រូវតែបន្តិចក៏ឈប់ប្រកួតក្រោយពេលអាជ្ញាកណ្តាល ឡុង វិបុល រាប់ដល់ ១០ ប៉ុន្តែក្នុងស្ថានភាពនេះលោក រាជ សុផែន ប្រធានបច្ចេកទេសប្រចាំសង្វៀន SETAV បានចេញប្រកាសថាគូនេះមិនប្រកាសលទ្ធផលទេ ហើយកីឡាករ Savth Phat ត្រូវបានដេញចុះដោយចោទប្រកាន់វាយមិនប្រក្រតី។
ចំណាត់ការនេះទទួលបានការគាំទ្រ ព្រោះតម្លៃខ្លួនប្រកួតរបស់កីឡាករថៃ ច្រើនជាងកីឡាករកម្ពុជាប្រហែល ៣ ដង។ លោក រាជ សុផែន បានហៅការសន្លប់របស់កីឡាករថៃថា ចាញ់មិនប្រក្រតីប៉ុណ្ណោះចំណែកតម្លៃខ្លួនវិញកំពុងពិចារណា។
ដោយឡែក រឿម វណ្ណៈ ដែលបាត់មុខយូរបានចាញ់កីឡាករបារាំងគួរឲ្យសោកស្តាយបំផុត ព្រោះពីទឹកទី១ ដល់ទី ២ គេវ៉ៃបានល្អ ពិសេសវ៉ៃឲ្យអាជ្ញាកណ្តាលរាប់កីឡាករបារាំង Maurin Chalie ចំនួន ២ លើក ប៉ុន្តែឈានចូលដល់ទឹកទី៤ វណ្ណៈ ត្រូវបានបារាំងម្នាក់នេះ វ៉ៃឲ្យបែក និងសុំចុះចាញ់តែម្តង ព្រោះមានរបួសបែកឈាមក្បាលឈាមហូរច្រើនពេក៕