.jpg)
អ្នកប្រដាល់ជើងខ្លាំងចាស់វស្សារបស់កម្ពុជា ឡុង សុភី ត្រូវបានលោកអាជ្ញាកណ្តាលលើកដៃឲ្យឈ្នះ ក្រោយប្រើកែងបុកកាណូតផ្តួលជើងខ្លាំងរបស់ថៃ Nong Ou នៅទឹកទី ២។ រូបថត យឺន ពន្លក
ភ្នំពេញ៖ កីឡាករជើងខ្លាំងរបស់ថៃ Nong OU ដែលល្បីល្បាញថា ខ្លាំង នោះ បានសន្លប់ត្រឹមទឹកទី ២ ក្រោមស្នៀតកែងរបស់អ្នកប្រដាល់ជើងចាស់ ឡុង សុភី ខណៈអ្នកទាំង ២ បានជួបគ្នា ក្នុងការប្រកួតមិត្តភាពអន្តរជាតិ នៅលើសង្វៀន SEATV កាលពីថ្ងៃអាទិត្យ ចំណែកគូមិត្តភាពក្នុងស្រុក ៣ គូទៀត សុទ្ធតែបានបញ្ចប់ការប្រកួតដោយសន្លប់ដូចគ្នា។
តាមរយៈការប្រកួត កាលពីព្រឹកថ្ងៃអាទិត្យនោះ ឡុង សុភី និង Nong Ou បានវាយចេញប្រហាក់ប្រហែលគ្នា នៅទឹកទី ១ ដោយប្រើក្បាច់ចម្រុះមានកែង ជង្គង់ ទាត់ កណ្តាប់ដៃ ប៉ុន្តែឈានចូលដល់ទឹកទី២ Nong Ou ហាក់មានភាពពុះកញ្ជ្រោល ដោយវាយសម្រុកខ្លាំង ជាមួយការវាយកែងបុកកាណូតចូល ឡុង សុភី ធ្វើឲ្យ សុភី ក្តៅចិត្ត រួចបានប្តូរកែងសងវិញយ៉ាងជក់ចិត្ត។
ស្ថិតក្នុងស្ថានភាពដ៏គ្រោះថ្នាក់នោះ ឡុង សុភី បានវាយកែងស្តាំចូលផ្ទៃមុខ ធ្វើឲ្យ Nong Ou សន្លប់ធំត្រឹមទឹកទី ២ នេះតែម្តង ហើយជ័យជម្នះ ដែលមិននឹកស្មានដល់នោះ បានធ្លាក់ទៅលើ ឡុង សុភី យ៉ាងលឿនបំផុត។ ចំណែក Nong Ou ត្រូវបានសង្គ្រោះរយៈពេលច្រើននាទី ទើបគ្រាចុះមកពីលើសង្វៀនមកក្រោមបានទាំងលំបាក។
លោកវេជ្ជបណ្ឌិត ឌៀប វណ្ណា គ្រូពេទ្យប្រចាំសង្វៀន SEATV បានប្រាប់ភ្នំពេញ ប៉ុស្តិ៍ ថា៖ «កីឡាករថៃ Nong Ou របួសធ្ងន់សន្លប់ធំ ដោយស្នៀតកែងបុកកាណូតរបស់ ឡុង សុភី ចូលចុងចង្កាយ៉ាងពេញទំហឹង បណ្តាលឲ្យសន្លប់ធំដេកស្តូកតែម្តង ហើយយើងបានពិនិត្យតាមដានស្ថានភាពជំងឺ ព្រោះការបុកចូលក្រោមប្រអប់មាត់ ឬហៅថាចង្កានេះ គឺគ្រោះថ្នាក់ និងងាយសន្លប់ណាស់»។
កីឡាករថៃ Nong Ou ត្រូវបានគេគ្រាចុះពីលើសង្វៀន ក្រោយសន្លប់ច្រើននាទី ក្រោមស្នៀតកែងរបស់ ឡុង សុភី។ រូបថត យឺន ពន្លក
ចំណែកការប្រកួតគូមិត្តភាពក្នុងស្រុក ដែលបានធ្វើកាលពីព្រឹកថ្ងៃអាទិត្យនោះដែរ គឺ ៣ គូ បានចាញ់ដោយសន្លប់ ក្នុងនោះ ហ៊ែល វិចិត្រ បានសន្លប់ត្រឹមទឹក ៤ ដោយ សេក ទីណាល់ វ៉ៃមិនឲ្យតដៃរួច រីឯ ខាំ សូរិយា ត្រូវបាន ឌឹម សារិទ្ធ ផ្តួលឲ្យសន្លប់ត្រឹមទឹកទី ៣ ហើយ ឡុង ទីណា ត្រូវបាន ប្រាក់ ភារម្យ ផ្តួលឲ្យសន្លប់ក្នុងទឹកទី ៣ ដូចគ្នា គឺមានតែគូបើកឆាកកីឡាករជើងថ្មី ផន សុខវិសាល បានចាញ់ ឈិត ប្រាក់កាត់ ដោយពិន្ទុ។
ដោយឡែក សម្រាប់លទ្ធផលការប្រកួតមិត្តភាពអន្តរជាតិ ដែលត្រូវបានធ្វើឡើង កាលពីថ្ងៃសៅរ៍ នៅលើសង្វៀន SEATV នោះដែរ កីឡាករ ឈឿន ឆៃដែន បានឈ្នះថៃ Chhay Lek ដោយពិន្ទុ ឯ មឿន សុខហ៊ុច ក៏បានឈ្នះពិន្ទុថៃ Phat Nakrin ដែរ ប៉ុន្តែ យ៉ាម ខេមរា ត្រូវបានអ្នកប្រដាល់ Vahdanirad Hassan មកពីអ៊ីរ៉ង់ វាយឲ្យសន្លប់នៅទឹកទី ៤ ហើយ លិញ ភារម្យបានស្មើពិន្ទុជាមួយកីឡាករថៃ Meung Thong៕
