.jpg)
Aram Boy សម្តែងការមិនពេញចិត្ត ទៅនឹងជ័យជម្នះ ឡុង សំណាង។ពន្លក
ភ្នំពេញ៖ កីឡាករកម្ពុជា ឡុង សំណាង បានយកឈ្នះលើអ្នកប្រយុទ្ធរបស់ថៃ Aram Boy ទាំងវេទនា និងឈឺខ្លួន បន្ទាប់ពីប្រកួតគ្នាស្វិតស្វាញរយៈពេល ៥ ទឹកពេញ ហើយនេះជាគូប្រដាល់ក្នុងទម្ងន់ ៦៣,៥ គីឡូក្រាម ដែលស្នៀត និងកលល្បិចប្រកួតសុទ្ធតែជាប្រភេទកីឡាករវាយសម្រុក និងមានមហិច្ឆតាធំ ស្រេកឃ្លានជ័យជម្នះដូចគ្នា។
ស្ថានភាពប្រកួតជាក់ស្តែងនៅលើសង្វៀន SEATV កាលពីព្រឹកថ្ងៃអាទិត្យនោះ គឺការប្រកួតចំនួន ២ ទឹកដំបូង មានសភាពប្រទាញប្រទង់ ដណ្តើមពិន្ទុគ្នា ធ្វើឲ្យអ្នកទស្សនាលំបាកវិនិច្ឆ័យថា ខាងណាមានប្រៀបជាងណាស់ ប៉ុន្តែការប្រកួតឈានចូលដល់ទឹកទី ៣ ឡុង សំណាងមានប្រៀបជាងថៃ Aram Boy ផ្នែកជង្គង់ និងចូលវាយសម្រុកបានច្រើនជាង។
ទោះជាយ៉ាងណា កីឡាករថៃ Aram Boy វាយបានល្អឡើងវិញ នៅទឹកទី ៤ និងទឹកទី ៥ ដែលក្នុងរយៈពេល ២ ទឹកចុងក្រោយនេះ គេមានប្រៀបផ្នែកទាត់ ជង្គង់ និងបានកាច់ឲ្យ ឡុងសំណាង បាត់ជំហរបាន និងដួលទៅលើតាពីចំនួន ៣ លើក គួរឲ្យមានប្រៀបជាងវិញ ប៉ុន្តែចប់ការប្រកួត ចៅក្រម និងគណៈកម្មការបានផ្តល់ពិន្ទុឲ្យ ឡុង សំណាង ឈ្នះដោយពិន្ទុ។
ភ្លាមៗនោះភាគីកីឡាករថៃ ទំនងមិនសូវសប្បាយចិត្ត ដោយបាននិយាយឡូឡាតវ៉ា ទៅគណៈកម្មការវិនិច្ឆ័យ ប៉ុន្តែនៅក្នុងរង្វង់ក្រៅផ្លូវការ។ ជាមួយគ្នានោះលោក ថៃ អ៊ូ ប្រតិភូនាំកីឡាករមកប្រកួតបាននិយាយថា ចៅក្រម និងគណៈកម្មការ មិនដឹងជាផ្តល់ពិន្ទុដូចម្តេច ដែលកីឡាករថៃ Aram Boy បានលទ្ធផលចាញ់នោះ។
លោក ថៃ អ៊ូ បានបន្ថែមថា៖ «ខ្ញុំមិនតវ៉ាយកឈ្នះវិញអីទេ ព្រោះច្បាប់កីឡា មិនដែលតវ៉ាបានឈ្នះមកវិញឡើយ ប៉ុន្តែសូម្បីតែអ្នកទស្សនាក៏គេហួសចិត្តដែរ ដោយសារគេយកភ្នែកមកមើលដែរ មិនមែនយកបច្ចេកទេសដោយធ្មេចភ្នែកនោះឡើយ ហើយក្នុងនាមខ្ញុំជាប្រតិភូនាំកីឡាករថៃមកប្រកួត ពេលខ្លះខ្ញុំក៏ឆ្លើយសំណួរជាមួយថៃមិនរួចដែរ»។
លោកបញ្ជាក់ថា៖ «ខ្ញុំក៏ដឹងពីតួនាទីរបស់ខ្ញុំ គឺខ្ញុំមិនមែនជាអ្នកដាក់ពិន្ទុ ឬកាត់សេចក្តីឈ្នះចាញ់នោះឡើយ ប៉ុន្តែក៏ជាមនុស្សម្នាក់ ទទួលខុសត្រូវចំពោះលទ្ធផល មិនសមរម្យសម្រាប់កីឡាករថៃ ក្នុងពេលវាសួរបកមកខ្ញុំវិញថា អយុត្តិធម៌នោះ»។
យោងតាមមតិមហាជននានា ដែលតាមដានទស្សនាសកម្មភាពកាត់ក្តីក្នុងការប្រកួតប្រដាល់ច្រើនឆ្នាំបានលើកឡើងថា រឿងសុក្រឹត ឬអយុត្តិធម៌នោះ មិនមែនមានទៅលើកីឡាករថៃតែម្ខាងនោះទេ សូម្បីការប្រកួតរវាងកីឡាករខ្មែរ និងខ្មែរដូចគ្នា ពេលខ្លះក៏រងនូវភាពមិនប្រក្រតី ឬអយុត្តិធម៌ដូចគ្នា ព្រោះនៅក្នុងនោះ គេអាចនិយាយថា លទ្ធផលកាត់សេចក្តីពេលខ្លះ អាចជាប់ពាក់ព័ន្ធទៅនឹងបក្ខពួកផលប្រយោជន៍ក្នុងទីផ្សារងងឹតមួយចំនួនតូច៕
