ភ្នំពេញៈ អ្នកប្រដាល់មានសមត្ថភាពវ៉ៃកាចដូចគ្នា គឺ ឡុង សំណាង របស់ក្លិបសាលវ័ន្តកីឡា និងជើងខ្លាំងរបស់ថៃ Aram Boy ដែលទើបតែឈ្នះដៃគូរៀងៗខ្លួននោះត្រូវបានដាក់ឲ្យជួបគ្នាក្នុងការប្រកួតមិត្តភាពអន្តរជាតិក្នុងកម្មវិធី Boostrong នៃសង្វៀនអាស៊ីអាគ្នេយ៍នាព្រឹកថ្ងៃអាទិត្យនេះ ហើយជំនួបនេះនឹងមានភាពទាក់ទាញ ដោយសារកីឡាករទាំង ២ នេះមានរបៀបប្រកួតចូលវាយសម្រុកដូចគ្នា ដោយស្នៀតកាចៗគឺវាយមិនចេះប្រោះនោះឡើយ។
ឡុង សំណាង មានជំនាញជង្គង់ និងទាត់ឆ្ងាយបានល្អគឺវាយចេញបានគ្រប់ស្ថានភាពចំណែក Aram Boy មានជង្គង់ល្អ ព្រមទាំងមានស្នៀតកែង ពិសេសមុខឌឺចូលចិត្តបើកមុខចំអកផងដែរ។
ទោះបីជាយ៉ាងណា Aram Boy មិនធ្លាប់ឈ្នះបានខ្សែក្រវាត់នៅឡើយ ដោយសារតែការប្រកួតរបស់គេកន្លងមកពេលខ្លះល្អផ្តាច់ ប៉ុន្តែពេលខ្លះ មិនសូវល្អ ដោយជាប់ពាក់ព័ន្ធទៅនឹងការសង្ស័យប្រកួតមិនអស់ពីសមត្ថភាព ផ្ទុយពី ឡុង សំណាង ឡើងទៅប្រកួតដឹងតែពីវាយសម្រុកអស់លទ្ធភាពតែម្តង។
សម្រាប់ការបង្ហាញខ្លួននៅកម្ពុជាកាលពីសប្តាហ៍មុន Aram Boy ត្រូវបាន សេក គឹមរួន វ៉ៃឲ្យអាជ្ញាកណ្តាលរាប់ចំនួន ៣ លើកក្នុងរយៈពេល ២ ទឹក ប៉ុន្តែបន្ទាប់មកថៃម្នាក់នេះបានវ៉ៃ សេក គឹមរួន សុំចុះចាញ់វិញនៅទឹកទី ៤។ ចំណែក ឡុង សំណាង ទើបតែប្រកួតឈ្នះកីឡាករថៃដូចគ្នា។
ទោះបីជាយ៉ាងណាថៃ Aram Boy មានបទពិសោធប្រកួតនៅលើសង្វៀនចាស់វស្សាជាង ឡុង សំណាង ដោយរូបគេធ្លាប់ប្រកួតបាន ១០៦ ដង ឈ្នះ ៧៣ ចាញ់ ២៨ និងស្មើ ៥ ដង។ ចំណែក ឡុង សំណាង ធ្លាប់ប្រកួតបាន ៩៩ ដង ឈ្នះ ៨៥ ចាញ់ ១១ និងស្មើចំនួន ៣ ដង។
តាមប្រភពពីអ្នកតាមដានប្រដាល់ដែលស្គាល់សមត្ថភាពអ្នកប្រដាល់ទាំង ២ នាក់នេះបានឲ្យដឹងថា គូនេះប៉ះគ្នាក្នុងការប្រកួតស្រួចស្រាល់ គឺវ៉ៃគ្នាមិនចេះដកថយ ប៉ុន្តែគេហ៊ានទស្សន៍ទាយភាគរយខ្ពស់ឈ្នះទៅលើ ឡុង សំណាង ខណៈដែលទីផ្សារងងឹតភ្នាល់ប្រដាល់តាមតូបកាហ្វេ គេហ៊ានយក ឡុង សំណាង តឲ្យ Aram Boy ១០ ស៊ី ៦ ប៉ុណ្ណោះ។
លោក ឡុង សាលវ័ន្ត ជាគ្រូបង្វឹកបានប្រាប់ថា ឡុង សំណាង មានភាគរយឈ្នះខ្ពស់ជាង ដោយសារវ៉ៃច្បាស់ៗមិនមែនចេញស្នៀតផ្សងព្រេងនោះឡើយ។ លោកបន្តថា៖ «ការហ្វឹកហាត់ និងគោរពវិន័យល្អ និងមានទឹកចិត្តប្រកួតល្អ គឺជាអ្វីដែល ឡុង សំណាង សង្ឃឹមឈ្នះខ្ពស់ដោយខ្ញុំសង្ឃឹមឈ្នះដល់ទៅ ៨០ ភាគរយ»។
ចំណែកលោក ថៃ អ៊ូ ប្រតិភូនាំកីឡាករថៃមកប្រកួតនៅកម្ពុជាបាននិយាយថា៖ «បើ ឡុង សំណាង បិទកែងបាននឹងមានប្រៀបជាងមែន ព្រោះស្នៀតកែងរបស់ Aram Boy ល្អជាង ខណៈដែលក្បាច់ជង្គង់មានប្រហាក់ប្រហែលគ្នាទៅចុះ។ ឡុង សំណាង អាចចាញ់ក្រោមផ្លែកែងថៃ។
ចំណែក Aram Boy អាចចាញ់ផ្នែកកម្លាំង ព្រោះគេមានអាយុចាស់ជាងច្រើន ធ្លាក់កម្លាំងនៅចុងទឹក ប៉ុន្តែគូនេះលំបាកទស្សន៍ទាយដោយសារពួកគេទាំង ២ វ៉ៃសម្រុកដូចគ្នា តែបើមានពិន្ទុប្រហាក់ប្រហែលគ្នាវិញ គេលើកដៃ ឡុង សំណាង ជាម្ចាស់ផ្ទះហើយ កុំឆ្ងល់»៕