ភ្នំពេញ: កីឡាករជើងខ្លាំងនៃក្រុមជម្រើសជាតិគុនខ្មែរ ឡុង សំណាង បានធ្វើការប្តេជ្ញាចិត្តយ៉ាងមុតមាំថា រូបគេនឹងខំប្រឹងឲ្យអស់ពីលទ្ធផល ដើម្បីយកឈ្នះថៃ Phitsayfa សម្រាប់ការវិលមកជួបគ្នាក្នុងការប្រកួតវគ្គផ្តាច់ព្រ័ត្រដណ្តើមខ្សែក្រវាត់ Zorus ទម្ងន់ ៦៣,៥ គីឡូក្រាមនៅសង្វៀន CNC នាព្រឹកថ្ងៃអាទិត្យនេះ ហើយជើងខ្លាំង ព្រំ សំណាង ក៏ត្រូវជួបម្ចាស់ខ្សែក្រវាត់មកពីអ៊ូសបេគីស្ថានថ្ងៃនោះដែរ។
តាមពិត ឡុង សំណាង ធ្លាប់បានយកឈ្នះកីឡាករថៃ Phitsayfa ដោយពិន្ទុម្តងហើយសម្រាប់ការជួបគ្នានៅវគ្គជម្រុះ ប៉ុន្តែ សំណាង បានប្រាប់ថាថៃម្នាក់នេះមានសមត្ថភាពប្រកួតខ្លាំងដែលមិនអាចមើលរំលងបានទេគឺទាំងកណ្តាប់ដៃ និងស្នៀតប្រើជើង គេវាយចេញបានល្អទាំងអស់។
សិស្សគណក្លិបសាលវ័ន្តកីឡា ឡុង សំណាង បានប្រាប់ភ្នំពេញ ប៉ុស្តិ៍ កាលពីម្សិលមិញថា៖ «ការជួបគ្នាក្នុងវគ្គជម្រុះ ខ្ញុំបានយកឈ្នះគេទាំងលំបាក ហើយការជួបគ្នាលើកនេះ ខ្ញុំគិតថាវានៅតែមានការលំបាក ព្រោះគេជាកីឡាករល្អម្នាក់នេះ ហើយខ្ញុំជឿថាគេក៏បានប្រឹងប្រែងហាត់ដូចយើងដែរ ដើម្បីត្រៀមការប្រកួតផ្តាច់ព្រ័ត្រនេះ»។
តាមរយៈការប្រកួតចំនួន ៥ លើកក្នុងអំឡុងខ្សែក្រវាត់នេះ ឡុង សំណាង បានឈ្នះគ្រប់ការប្រកួតទាំងអស់ ហើយចុងក្រោយគេបានយកឈ្នះរៀមច្បង ផាន់ គ្រាន់ ដោយពិន្ទុក្នុងវគ្គពាក់កណ្តាលផ្តាច់ព្រ័ត្រ ខណៈ Phitsayfa មានម៉ាត់ឲ្យ ឌុម កែវដា ដួលជាបន្តបន្ទាប់រហូតអាជ្ញាកណ្តាលបញ្ឈប់ការប្រកួតនៅទឹកទី ២។
ការប្រើកណ្តាប់ដៃផ្តួល ឌុម កែវដា ឲ្យសន្លប់ចំនួន ២ លើកជាប់ៗគ្នារបស់ Phitsayfa បានធ្វើឲ្យ ឡុង សំណាង មានការបារម្ភផងដែរ ហើយបានចាត់ទុកការប្រកួតនេះជាការប្រកួតដ៏តានតឹងដែលមិនអាចវាយតម្លៃមុនការប្រកួតបានទេគឺមុនការប្រកួតគេមានសង្ឃឹមឈ្នះត្រឹម ៥០ ភាគរយទេ។
ទោះបីជាយ៉ាងណាការចង់ទទួលបានប្រាក់រង្វាន់លេខ ១ ដើម្បីយកទៅជួយបង់រំលស់លុយធនាគារប្រមាណ ៦ លានរៀលដែលម្តាយរបស់ខ្លួនបានខ្ចី យកមកទិញដីនោះ គឺ ឡុង សំណាង បានប្តេជ្ញាចិត្តខ្ពស់សម្រាប់ការប្រកួតនេះ។
ឡុង សំណាង បាននិយាយថា៖ «ខ្ញុំប្តេជ្ញាថានឹងខំប្រឹងប្រែងឲ្យអស់ពីសមត្ថភាព ព្រោះនេះជាការប្រកួតដ៏សំខាន់ និងទទួលបានលុយច្រើនគឺអ្នកឈ្នះនឹងទទួលបាន ៦០០០ ដុល្លារអ៊ីចឹងខ្ញុំចង់បានលុយនេះ ដើម្បីយកទៅជូនអ្នកម្តាយរបស់ខ្ញុំ ដើម្បីឲ្យគាត់យកទៅសងធនាគារដែលគាត់បានខ្ចីលុយ យកមកទិញដីកន្លងមក»។
កីឡាករជើងខ្លាំងវ័យក្មេងរូបនេះបានបន្ថែមថា៖ «មួយវិញទៀតខ្ញុំចង់ក្លាយជាម្ចាស់ខ្សែក្រវាត់មួយនេះ។ ខ្ញុំធ្លាប់បានឈ្នះខ្សែក្រវាត់ Wurkz ក្នុងប្រភេទទម្ងន់ ៦៣,៥ គីឡូក្រាមនេះនៅសង្វៀន SEATV ម្តងហើយ ប៉ុន្តែខ្ញុំចង់ឈ្នះបានខ្សែក្រវាត់មួយទៀត ដើម្បីពង្រីកភាពល្បីល្បាញរបស់ខ្ញុំបន្ថែមទៀត ហើយខ្ញុំនឹងប្រឹងប្រែងសម្រេចបំណងនេះ»។
ដោយឡែក ផាន់ គ្រាន់ និង ឌុម កែវដា ដែលសុទ្ធតែបានចាញ់នៅវគ្គ ១/២ ផ្តាច់ព្រ័ត្រនោះនឹងត្រូវប្រកួតគ្នាដណ្តើមយកលេខ ៣ និងលេខ ៤ នៅព្រឹកថ្ងៃអាទិត្យនោះដែរ។ រីឯជើងខ្លាំងទម្ងន់ ៧៥ គីឡូក្រាម ព្រំ សំណាង ត្រូវបានដាក់ឲ្យប្រកួតជាមួយអ្នកប្រដាល់អ៊ូសបេគីស្ថាន Mansurbek Raxmonjon ដែលមានស្ពាយខ្សែក្រវាត់ ២ នៅថ្ងៃនោះផងដែរ៕