.jpg)
ឯម ឡេងលី ត្រូវបានអាជ្ញាកណ្តាលលើកដៃឲ្យឈ្នះថៃ Khun Krongthap។ យឺន ពន្លក
ភ្នំពេញៈ កីឡាករជើងថ្មី កំពុងសាងភាពល្បី ឯម ឡេងលី បានបង្ហាញពីមោទនភាពចំពោះខ្លួនឯង បន្ទាប់ពីរូបគេ បានយកឈ្នះជើងចាស់សម្បូរបទពិសោធរបស់ថៃ Khun Krongthap នៅលើសង្វៀន SEATV ប៉ុន្តែកីឡាករចាស់វស្សា យុគ យក្សគីល បានរងរបួសធ្ងន់ នឹងត្រូវបានដឹកទៅកាន់មន្ទីរពេទ្យភ្លាមៗ ខណៈការទាញថៃ Ha Chhlam ឲ្យស្មើពិន្ទុជាមួយ វេង សុភ័ក្រ បង្កឲ្យមានការរិះគន់ពីអ្នកទស្សនាផ្ទាល់។
សម្រាប់ការប្រកួតមិត្តភាពអន្តរជាតិ នៅលើសង្វៀន SEATV កាលពីថ្ងៃសៅរ៍ និងថ្ងៃអាទិត្យ កន្លងមកនេះ ឯម ឡេងលី បានយកឈ្នះជើងខ្លាំង Khun Krongthap ដោយពិន្ទុ ក្នុងការតស៊ូស្វិតស្វាញចំនួន ៥ ទឹក។ ជ័យជម្នះនេះ បានធ្វើឲ្យមានការភ្ញាក់ផ្អើលពីអ្នកទស្សនា ដោយសារ ឯម ឡេងលី ជាជើងថ្មីមានជំនាញកណ្តាប់ដៃ តែអាចយកឈ្នះជើងចាស់ Khun Krongthap បាន។
នៅ ៣ ទឹកដំបូង អ្នកទាំង ២ បានវាយប្តូរកណ្តាប់ដៃ និងស្នៀតជង្គង់ អស់ពីសមត្ថភាពរៀងៗខ្លួន នៅមិនទាន់អាចកំណត់កីឡាកររូបណាមានប្រៀបមានពិន្ទុនាំមុខនៅឡើយ ប៉ុន្តែឈានចូលដល់ទឹកទី ៤ និងទី ៥ ឯម ឡេងលី មានប្រៀបបន្តិចបន្តួច ខណៈដែលការចេញដោយកណ្តាប់ដៃ និងព្យាយាមទាត់ជើងក្រោមទៅលើ KhunKrongthap បានញឹកញាប់ជាង នាំឲ្យចៅក្រមទាំង ៥ បានផ្តល់ជ័យជម្នះឲ្យ ឯម ឡេងលី ឈ្នះ Khun Krongthap ជាឯកច្ឆន្ទ ៥ ទល់ ០។
ឡេងលី និយាយក្រោយប្រកួតថា៖ «ការប្រកួតជាមួយថៃលើកនេះ ខ្ញុំគិតថាលំបាកខ្លាំងណាស់ ព្រោះគេជាជើងចាស់ ហើយល្អស្នៀតទាត់ទៀត ហេតុនេះការឈ្នះរបស់ខ្ញុំគឺប្រឹងប្រែងអស់ពីសមត្ថភាព និងប្រយ័ត្នប្រយែងបំផុត។ នៅក្នុងជំនួបជាមួយកីឡាករបរទេសកន្លងមក ខ្ញុំមិនធ្លាប់ប៉ះជាមួយជើងខ្លាំងបែបនេះទេ អ៊ីចឹងខ្ញុំមានមោទនភាពណាស់ ដែលបានឈ្នះលើកនេះ»។
ចំណែកជំនួបរវាង វេង សុភ័ក្រ និងថៃ Ha Chhlam ជាការប្រកួតមួយដ៏អស្ចារ្យដោយអ្នកទាំង ២ នេះ បានតស៊ូជាមួយគ្នា ៥ ទឹកពេញ។ ស្ថានភាពជាក់ស្តែងក្នុងការប្រកួតចំនួន ៤ ទឹក គឺហាក់បីដូចជារកអ្នកមានប្រៀបមិនបាន ព្រោះការវាយសម្រុកដោយស្នៀតចម្រុះមានប្រហាក់ប្រហែលគ្នា ប៉ុន្តែនៅក្នុងទឹកទី ៥ វេងសុភ័ក្រ មានប្រៀបខ្លាំង ដោយវាយកែងឲ្យកីឡាករថៃរូបនេះ បែកថ្ងាសបញ្ជូនឲ្យពេទ្យពិនិត្យ និងបានទាត់ជើងក្រោមចូលច្រើនផងដែរ។
ទោះបីជាយ៉ាងណា លទ្ធផលផ្លូវការពីគណៈកម្មការវិនិច្ឆ័យ បានផ្តល់ឲ្យអ្នកទាំង ២ ស្មើគ្នា ដោយមិនបានប្រកាសពិន្ទុរបស់ចៅក្រមទាំង ៥ នោះទេ។ អ្នកទស្សនាភាគច្រើន បានលាន់មាត់ថា វេង សុភ័ក្រ វ៉ៃចេញបានច្រើនជាង ទាំងជង្គង់ ទាត់ និងស្នៀតកែង ហើយពួកគេបានគេរិះគន់ថា៖ «ការសម្រេចឲ្យស្មើគ្នានេះ មិនស័ក្តិសមឡើយ ព្រោះកីឡាករកម្ពុជា វេង សុភ័ក្រ មានប្រៀបនៅចុងទឹក ព្រមទាំងវ៉ៃឲ្យ Ha Chhlam បែក រហូតបញ្ជូនទៅគ្រូពេទ្យជូតឈាមទៀត»។
ចំណែកការប្រកួតមិត្តភាពអន្តរជាតិចំនួន ៣ គូទៀត នៅលើសង្វៀន SEATV នោះដែរកីឡាករកម្ពុជា ឈឿន ឆៃដែន បានឈ្នះថៃ Yorth Phit ឯ សរ រាជសីហ៍ បានឈ្នះអ៊ីរ៉ង់ Aboo Fazel ប៉ុន្តែ យុគ យក្សគីល ត្រូវបាន Hosein Nasiri ទាត់ចូលឆ្អឹងជំនីរឆ្វេង បណ្តាលឲ្យមានរបួសធ្ងន់ សុំចុះចាញ់ត្រឹមទឹកទី ២។ រីឯកីឡាករ លី ភា និង សូត្រ ប៊ុនធី សុទ្ធតែឈ្នះបាន ៣ ពិន្ទុ ក្នុងការប្រកួតជម្រុះសន្សំពិន្ទុដណ្តើមខ្សែក្រវាត់ខារ៉ាបាវ ទម្ងន់ ៦០ គីឡូក្រាម ដោយក្នុងនោះ លី គា ឈ្នះថៃ Phat Ngenthong ហើយ ប៊ុនធី ឈ្នះថៃ Phat Thana។
ក្រោយការសុំចុះចាញ់នោះ យក្សគីល ត្រូវបានដឹកទៅពិនិត្យនៅមន្ទីរពេទ្យភ្លាមៗ ក្រោយការប្រកួតនោះ ហើយលោក ជួន សំណាង ដែលគ្រូបង្វឹក បាននិយាយថា៖ «យក្សគីល របួសធ្ងន់ចូលពេទ្យហើយក្រោយថតមានស្នាមជាំសាច់ឆ្អឹងជំនីរ ដែលត្រូវការសម្រាកមួយរយៈ»៕
