.jpg)
ជើងខ្លាំង ឡៅ ចិត្ត្រា បានផ្តួលថៃ Kongsiam ឲ្យសន្លប់នៅទឹកទី ២ ដើម្បីក្លាយជាម្ចាស់ខ្សែក្រវាត់ប្រាក់។ PNN
ភ្នំពេញៈ កីឡាករជើងខ្លាំងវ័យក្មេងរបស់កម្ពុជា ឡៅ ចិត្ត្រា បានម៉ាត់ត្រឹម ១ ដៃឆ្វេងបណ្តាលឲ្យអ្នកប្រដាល់ថៃ Kongsiam សន្លប់ត្រឹមទឹកទី ២ ដើម្បីឈ្នះបានខ្សែក្រវាត់ប្រាក់ និងបានក្លាយជាបេក្ខភាពទី ១ ដែលបានឡើងទៅប្រកួតដណ្តើមយកខ្សែក្រវាត់មាសអមដោយប្រាក់រង្វាន់ ១ ម៉ឺនដុល្លាររបស់សង្វៀន PNN។
បើទោះបីជា Kongsiam បានយកឈ្នះកីឡាករកម្ពុជា សារឿន ច័ន្ទ នៅក្នុងការប្រកួតវគ្គជម្រុះ ប៉ុន្តែការឡើងមកជួប ឡៅ ចិត្ត្រា ដែលបានផ្តួលថៃ Jaroenlaph ឲ្យសន្លប់នៅទឹកទី ១ កាលពីថ្ងៃអាទិត្យម្សិលមិញនេះ Kongsiam បានទទួលរងសម្ពាធក្រោមទម្ងន់ជើងទាត់ខ្លាំងៗរបស់ ចិត្ត្រា តាំងពីទឹកទី ១ ហើយនៅដើមទឹកទី ២ ចិត្ត្រា បានជន្លបញ្ឆោតស្តាំ និងម៉ាត់ឆ្វេងចំគល់ថ្គាម បណ្តាលឲ្យថៃម្នាក់នេះដួលសន្លប់ក្រោកលែងរួចរហូតគ្រាហ៍ចុះពីលើសង្វៀន។
ឡៅ ចិត្ត្រា បាននិយាយថា៖ «ការទាត់របើកឃុំនៅដើមទឹកទី ១ បានធ្វើឲ្យខ្ញុំចង់ទាត់ថែមទៀត ប៉ុន្តែខ្ញុំមិនគិតថា អាចស៊ីគេដោយផុយៗនោះទេ គឺខ្ញុំគ្រាន់តែមានអារម្មណ៍អរៗ ព្រោះយើងបានដឹងពីកម្លាំង និងក្បាច់គុនរបស់គេមានតែប៉ុណ្ណឹង ហើយការប្តូរមកប្រើដៃនៅទឹកទី ២ គឺមិនមែនមកពីបងរបស់ខ្ញុំ (ឡៅ ស៊ីណាត) ប្រាប់ឲ្យប្តូរស្នៀតនោះទេ គឺចំពោះខ្ញុំពេលឡើងដល់លើរេញ ដៃក៏វ៉ៃ ជើងក៏ទាត់ និយាយទៅចន្លោះត្រង់ណា វ៉ៃត្រង់នោះ»។
ជាមួយការឈ្នះជាលើកទី ២ នេះបានជួយឲ្យ ឡៅ ចិត្ត្រា ឈ្នះបានខ្សែក្រវាត់ប្រាក់អមជាមួយទឹកប្រាក់ ៤ លានរៀល ហើយរូបគេក៏ទទួលបានកៅអីឡើងទៅឈរចាំនៅវគ្គពាក់កណ្តាលផ្តាច់ព្រ័ត្រត្រៀមដណ្តើមយកខ្សែក្រវាត់មាស ជាមួយកីឡាករដែលនឹងដណ្តើមបានខ្សែក្រវាត់ប្រាក់ចំនួន ៣ នាក់ទៀត ចេញពីការប្រកួតជម្រុះរវាងកីឡាករកម្ពុជា ៦ នាក់ និងថៃ ៦ នាក់ផងដែរ។
យ៉ាងណាក៏ដោយនៅពេលពិធីករសួរទៅដល់ទំនុកចិត្តក្នុងការប្រកួតដណ្តើមយកខ្សែក្រវាត់មាសជាបន្តទៀត ឡៅ ចិត្ត្រា បានឆ្លើយតបថា៖ «ខ្ញុំមិនទាន់ហ៊ាននិយាយទុកមុនទេ ព្រោះកីឡាករផ្សេងៗទៀតក៏ល្អដែរ អ៊ីចឹងខ្ញុំមានតែខំប្រឹង ព្រោះការតាំងចិត្តខ្ពស់បំផុតរបស់កីឡាករគឺពេលឡើងដល់លើរេញ ត្រូវតែវ៉ៃឲ្យអស់ពីសមត្ថភាព»។
ដោយឡែកកីឡាករជាម្ចាស់មេដាយសំរឹទ្ធស៊ីហ្គេមឆ្នាំ ២០១៧ វ៉ាន់ វឿន បានវ៉ៃកែងផ្តួលឲ្យអ្នកប្រដាល់ថៃ Yodchakkrit សន្លប់នៅទឹកទី ១ ហើយការឈ្នះយ៉ាងងាយនេះនាំឲ្យ វ៉ាន់ វឿន និយាយថា៖ «ខ្ញុំធ្លាប់បានប្រើកែងផ្តួលឲ្យគេសន្លប់ច្រើនហើយ ហេតុនេះបើសិនជាខាង PNN ផ្គូផ្គងឲ្យខ្ញុំបានប្រកួតអន្តរជាតិនៅលើកក្រោយទេ ខ្ញុំចង់ជួបអ្នកខ្លាំង។ ខ្ញុំដឹងថា សមត្ថភាពរបស់ខ្ញុំនៅមានកម្រិត ប៉ុន្តែខ្ញុំចង់ជួបអ្នកខ្លាំង ដើម្បីខ្ញុំអាចអភិវឌ្ឍសមត្ថភាពខ្លួនឯងឲ្យបានប្រសើរថែមទៀត»។
ចំណែកការប្រកួតមិត្តភាពអន្តរជាតិរវាងកីឡាករជាយុវជនថ្នាល ទម្ងន់ស្រាល ខាំ កូនខ្លា បានឈ្នះពិន្ទុថៃ Chanakchai ហើយ អេលីត ផានិត ទាត់ថៃ Petchnan ឲ្យសន្លប់នៅដើមទឹកទី ១៕
