ភ្នំពេញ៖ ជើងខ្លាំង ឡៅ ចិត្រា នៅតែអាចរក្សាបានភាពខ្លាំង ចំពោះការវិលមកកាន់សង្វៀនថោនជាថ្មី គឺការដណ្តើមបានតំណែងជើងឯក និងប្រាក់រង្វាន់ចំនួន ៤ លានរៀល។ ផ្ទុយពីនេះ អ្នករត់តាក់ស៊ី លោក លួត សុផល ដែលល្បី ខាងទាត់គល់ដូងនោះ គឺត្រូវបានដៃគូវ៉ៃឱ្យសន្លប់ធំ។
សម្រាប់ការប្រកួតកាលពីថ្ងៃអាទិត្យនោះ ឡៅ ចិត្រា បានយកឈ្នះដោយពិន្ទុលើ សួន ចាន់នី ស្របពេល ឡុង បេនលឿន បានឈ្នះអ្នកលេងកណ្តាប់ដៃ ធន់ ចាន់តាក់ ដោយពិន្ទុ ប៉ុន្តែបន្សល់ស្នាមរបួសភ្នែកខាងឆ្វេងផងដែរ។ ជាមួយការមានស្នាមរបួសបែកស្រាប់នេះ ឡុង បេនលឿន ជួបការពិបាកខ្លាំង ពេលប្រកួតផ្តាច់ព្រ័ត្រជាមួយ ឡៅ ចិត្រា។
តាមរយៈការប្រកួតនោះ ឡៅ ចិត្រា បានព្យាយាមវាយសម្រុក និងម៉ាត់បន្ថែមទៅលើរបួសចាស់របស់ បេនលឿន ធ្វើឱ្យមានឈាមហូរធ្លាក់មិនដាច់។ បន្ថែមលើនេះ ចិត្រា បានវាយកែងឆ្វេង ធ្វើឱ្យមានស្នាមពក នៅពីលើមុខរបួសនេះយ៉ាងធំទៀត ហើយពេលសម្រាកនៅទឹកទី១ នេះ គ្រូពេទ្យប្រចាំសង្វៀនបានពិនិត្យទៅលើមុខរបួស និងបានសម្រេចបញ្ឈប់ការប្រកួតរបស់ បេនលឿន តែម្តង ដោយសារតែរបួស និងស្នាមពកនេះ បានរំខាន និងបាំងភ្នែករបស់ បេនលឿន មិនអាចប្រកួតបាន។
ឡុង បេនលឿន ដែលទទួលបាន ២,៤ លានរៀល គឺមានការសោកស្តាយខ្លាំង ដោយបាននិយាយថា៖ «ខ្ញុំរំពឹងប្រកួតចប់ទឹក និងសង្ឃឹមថា មានលទ្ធភាពឈ្នះ ប្រសិនបើគ្មានឈាមហូរដោយរបួស ដែលបានបង្កតាំងពីប្រកួតវគ្គជម្រុះជាមួយ ធន់ ចាន់តាក់។ ហេតុនេះខ្ញុំចង់ប្រកួតលើកក្រោយទៀតជាមួយគាត់ ដើម្បីសងសឹកឡើងវិញ ព្រោះនៅក្នុងចំណោមទម្ងន់ ៦៣,៥ គីឡូក្រាមនេះ គឺនៅសល់តែ ឡៅ ចិត្រា នេះទេ ដែលជាឧបសគ្គធំសម្រាប់ខ្ញុំ»។
ចំណែក ឡៅ ចិត្រា និយាយថា៖ «ក្នុងពេលប្រកួតជាមួយ ឡុង បេនលឿន លំបាកដែរ ព្រោះកម្លាំង និងចិត្តរបស់គាត់ក្លាហាន មិនខ្លាចញញើត តែទោះបីជាយ៉ាងណា ចំពោះ បេនលឿន គឺខ្ញុំនៅតែអាចរក្សាការពារជ័យជម្នះបាន បើទោះមិនមានស្នាមបែក គ្រាន់តែការប្រកួតវាមានលក្ខណៈតឹងតែង ព្រោះគាត់មានកម្លាំងល្អ និងចិត្តធំ»។
ផ្ទុយពីនេះ កីឡាករ លួត សុផល មិនបានបង្ហាញភាពខ្លាំង ដូចគ្នាទៅនឹងការបង្ហាញពីការទាត់គល់ដូង តាមបណ្តាញសង្គមនោះទេ។ បើទោះបីជា សុផល ប្រឹងប្រែងប្រកួតយ៉ាងណា ក៏មិនអាចយកឈ្នះកីឡាករវ័យ ១៨ ឆ្នាំ ពេជ្រ បណ្ឌិត នោះដែរ គឺ បណ្ឌិត បានម៉ាត់ចូលថ្គាម បណ្តាលឱ្យ សុផល ស្រ៊ុបជំហរ និងដួលសន្លប់នៅក្នុងទឹកទី ៤ តែម្តង។
ទោះ លួត សុផល បានចាញ់ដោយសន្លប់យ៉ាងនេះក្តី ប៉ុន្តែ សេន ប៊ុនថេន បាននិយាយថា៖ «លួត សុផល អាចបន្តការហ្វឹកហាត់ ដោយយកមកហ្វឹកហាត់នៅក្លិបប៉ែនកាក់គុនខ្មែរសមាគមកីឡាប្រដាល់ក្រសួងមហាផ្ទៃវិញ ហើយបើគាត់ហ្វឹកហាត់បានគ្រប់គ្រាន់ និងមានការបំប៉នកម្លាំង គឺគាត់អាចនឹងឡើងប្រកួតបានល្អ ព្រោះគាត់មានទឹកចិត្តចង់ប្រកួត»៕