.jpg)
បេក្ខភាពទាំង ៤ រូប ដែលត្រូវប្រកួតប្រជែងគ្នាយកប្រាក់លាន។ សហការី
ភ្នំពេញ៖ ម្ចាស់មេដាយសំរឹទ្ធស៊ីហ្គេម ២ សម័យកាល និងជាម្ចាស់ខ្សែក្រវាត់ ៣ ស្ថាប័ន ឡៅ ចិត្រា បានមើលឃើញថា បេក្ខភាពទាំង ៣ នាក់ រួមមាន ធន់ ចាន់តាក់, សូត្រ ប៊ុនធី និង ឡុង បេនលឿន ដែលត្រូវដាក់ឱ្យប្រកួតដណ្តើមប្រាក់លានទម្ងន់ ៦៣,៥ គ.ក្រ នៅលើសង្វៀនថោន នាថ្ងៃអាទិត្យនេះ សុទ្ធតែជាឧបសគ្គ ប៉ុន្តែចិត្រានៅតែមានសង្ឃឹមខ្ពស់ក្នុងការប្រជែងយកតំណែងម្ចាស់ជើងឯក ខណៈសប្តាហ៍ទី៥៧ នេះ ប្រាក់រង្វាន់ត្រូវបានបង្កើនពី ៣,៤ លានរៀល ទៅដល់ ៤ លានរៀល។
សម្រាប់បេក្ខភាពទាំង ៤ នាក់ ដែលត្រូវចាប់ឆ្នោតប្រកួតនៅសប្តាហ៍នេះ ត្រូវបានគេមើលឃើញថា មានសមត្ថភាពប្រហាក់ប្រហែលគ្នា ប៉ុន្តែតាមប្រវត្តិជួបគ្នាកន្លងមក សូត្រ ប៊ុនធី របស់ក្លិបបក្សីស្លាបដែក ធ្លាប់ត្រូវបាន ឡៅ ចិត្រា វាយឱ្យសន្លប់ត្រឹមទឹកទី៣ ចំណែក ធន់ ចាន់តាក់ របស់សមាគមកីឡាប្រដាល់កងយោធពលខេមរភូមិន្ទ និង ឡុង បេនលឿន មកពីក្លិបសាលវ័ន្តកីឡា មិនធ្លាប់បានជួប ចិត្រា ពីមុនមកនោះទេ។
ជាមួយគ្នានេះ លោក ឡៅ ស៊ីណាត ជាគ្រូបង្វឹកជំនួយ និងជាបងបង្កើតរបស់ ឡៅ ចិត្រាមានសង្ឃឹមឈ្នះ ៨០ ភាគរយ ទោះបីការប្រកួតលើកនេះ ចិត្រា ត្រូវប្រឈមទៅនឹងកីឡាករទាំង ៣ នាក់នេះ មានសមត្ថភាពក្បាច់គុន កំពុងរីកចម្រើនជាឧបសគ្គធំក៏ដោយ។ ចំណែក ឡៅ ចិត្រា ផ្ទាល់ ក៏មានការតាំងចិត្តខ្ពស់ ទោះមើលឃើញថា ការប្រកួតនេះ មានការលំបាក។
ជើងខ្លាំងមកពីក្លិបបញ្ជាការដ្ឋានទ័ពពិសេស ឡៅ ចិត្រា បាននិយាយថា៖ «ចាប់ឆ្នោតប៉ះមួយណាក៏លំបាកប្រកួតយកឈ្នះដែរ ព្រោះគេកំពុងតែហ្វឹកហាត់ប្រកួតល្អដូចគ្នា។ តែទោះជាយ៉ាងណា ខ្ញុំនឹងប្រឹងឱ្យអស់ពីលទ្ធភាព ដើម្បីយកឈ្នះ ដោយសង្ឃឹម និងជឿជាក់ថា ៨០ ភាគរយគឺឈ្នះ»។
តាមស្ថិតិ និងប្រវត្តិប្រកួតរបស់ ឡៅ ចិត្រា, ធន់ ចាន់តាក់ និង សូត្រ ប៊ុនធី សុទ្ធតែជាអ្នកប្រដាល់ធ្លាប់ឈ្នះបានខ្សែក្រវាត់ គឺលើកលែងតែ ឡុង បេនលឿន ដែលនៅខ្ចីវស្សាជាងគេ ប៉ុន្តែ បេនលឿន មានចិត្តធំ កម្លាំងល្អ រឹងមាំ ព្រមទាំងមានមហិច្ឆតាខ្ពស់ ដោយបានបោះសម្តីចង់ជួបឡៅ ចិត្រា តាំងពីវគ្គជម្រុះដំបូង។
កីឡាករ ឡុង បេនលឿន បាននិយាយថា៖ «ខ្ញុំរំពឹងឈ្នះ ព្រោះត្រៀមខ្លួនបានល្អ ដោយមិនញញើត ឡៅ ចិត្រា នោះទេ»។ បេនលឿន ដែលមានកម្លាំង និងកម្ពស់ល្អដូច ចិត្រា នោះ បានបន្ថែមថា៖ «ខ្ញុំចង់ ចាប់ឆ្នោតប៉ះ ឡៅ ចិត្រា ដើម្បីទម្លាក់ក្នុងវគ្គជម្រុះ ចំណែក ធន់ ចាន់តាក់ និង សូត្រ ប៊ុនធី ខ្ញុំគិតថា មួយណាក៏ខ្ញុំមិនខ្លាចញញើតដូចគ្នា»។
ចំណែក លោក ធន់ សុភា គ្រូបង្វឹក ចាន់តាក់ បានទទួលស្គាល់ថា ចាន់តាក់ ចាញ់ប្រៀបផ្នែកកម្ពស់លំបាកលេងជង្គង់ ប៉ុន្តែធានាប្រកួតអស់ពីសមត្ថភាព តែមិនហ៊ានសង្ឃឹមខ្ពស់ទេ។ រីឯ លោក សួន ប៊ុនសូត្រ ជាឪពុក និងជាគ្រូបង្វឹក សូត្រ ប៊ុនធី បាននិយាយថា៖ «ប៊ុនធី ធ្លាប់ចាញ់ ឡៅ ចិត្រា មែន តែឥឡូវវាហាត់បានល្អ គឺមានទំនុកចិត្តថា ល្អជាងមុន ប៉ុន្តែមិនទាន់ហ៊ាននិយាយទេ ចាំមើលសិន»៕
