.jpg)
លោកស្រី Eva Nguye-Binh (អាវក្រហម) ពេលកាត់ខ្សែបូ។ យឺន ពន្លក
ភ្នំពេញ៖ អគ្គរដ្ឋទូតប្រទេសបារាំង ប្រចាំនៅកម្ពុជា លោកស្រី Eva Nguye-Binh បានចាប់អារម្មណ៍ខ្លាំងចំពោះពលរដ្ឋខ្មែរ ដែលបានងាកមកលេងកីឡា និងនិយមប្រើប្រាស់សម្ភារកីឡាក្នុងរយៈពេល ២ ឆ្នាំចុងក្រោយ ពិសេសក្នុងសម័យមានជំងឺឆ្លងកូវីដ ១៩ ជាសកលនេះ ដោយបានជំរុញឲ្យពលរដ្ឋខ្មែរ ទទួលយកសម្ភារកីឡាពី Decathlon Cambodia ដែលជាស្ថាប័នឯកទេសផលិតសម្ភារកីឡាលំដាប់ពិភពលោក មានប្រភពមកពីប្រទេសបារាំង មានរហូតដល់ ៤ ០០០ មុខ។
ថ្លែងក្នុងពិធីសម្ពោធបើកសាខាទី២ នៅអ៊ីអន ១ របស់ Decathlon កាលពីយប់ថ្ងៃចន្ទ លោកស្រី Eva Nguye-Binh បានបញ្ជាក់ថា៖ «ខ្ញុំរំភើបខ្លាំង ដោយមួយរយៈក្នុងសម័យកូវីដ ១៩ នេះ ពលរដ្ឋកម្ពុជាមកទទួលយកការប្រើប្រាស់សម្ភារហ្វឹកហាត់តាមគេហដ្ឋានកាន់តែច្រើន ហើយសហព័ន្ធកីឡាជាតិភាគច្រើន ទទួលយកសម្ភារកីឡានេះ ទៅប្រើប្រាស់ធ្វើឲ្យសេវាកម្មផ្គត់ផ្គង់រវាង Decathlon Cambodia ក្នុងកីឡា ដើម្បីសុខភាព និងកីឡាជំនាញកាន់តែកើនទ្វេឡើង»។
ចំណែកលោក សំរិទ្ធ សុទ្ធ នាយកទំនាក់ទំនងទីផ្សារសម្ភារកីឡា Decathlon Cambodia បានប្រាប់ថា៖ «សម្ភារកីឡាចំនួន ៤ ០០០ មុខ ត្រូវបានផ្គត់ផ្គង់ទាន់សេចក្តីត្រូវការរបស់អតិថិជន និងសហព័ន្ធកីឡាជាតិ មានដូចជា កីឡាជិះកង់ វាយកូនបាល់ លើកទម្ងន់ បាល់បោះ កីឡាឡើងភ្នំ ហែលទឹក កីឡាកម្សាន្តបោះជំរំ បាល់ទាត់ បាល់បោះ ជិះស្គី វាយកូនឃ្លីលើតុ និងអ្នកហាត់ប្រាណលក្ខណៈឯកជនតាមផ្ទះ ហើយផលិតផលកីឡាទាំងនេះ ក៏នឹងដើរតួសំខាន់ក្នុងសកម្មភាពកីឡា នៅក្នុងព្រឹត្តិការណ៍នានាក្នុងពេលខាងមុខផងដែរ»។
លោក ទេព រិទ្ធាវិទ្ធ អគ្គលេខាធិការសហព័ន្ធកីឡាវាយកូនបាល់កម្ពុជា ដែលទទួលយកសម្ភារកីឡារបស់ Decathlon Cambodia ទៅប្រើប្រាស់បាននិយាយថា៖ «Decathlon ផលិតសម្ភារកីឡា ស្របតាមជំនាញកីឡា គឺប្រើតាមប្រព័ន្ធឌីជីថលទំនើប ដែលមានតម្លៃសមរម្យ ហើយ Decathlon ជាម៉ាកល្បីល្បាញនៅលើពិភពលោក ប៉ុន្តែនៅប្រទេសកម្ពុជា ទើបតែស្គាល់ប្រហែលជាង ២ ឆ្នាំទេ តែឥឡូវពេញនិយមខ្លាំងសឹងតែផ្តាច់មុខ និងមានច្រើនមុខជាងគេគឺគ្រប់ប្រភេទកីឡាតែម្តង»។
លោក ចេប៊ី នាយកគ្រប់គ្រង Decathlon Cambodia ថ្លែងថា៖ «ប្រជាពលរដ្ឋកម្ពុជា បានងាកមកលេងកីឡាយ៉ាងច្រើន ក្នុងវិបត្តិកូវីដ ១៩ នេះ ហើយខ្ញុំឃើញថា ទីតាំងលក់នៅអ៊ីអន ២ សែនសុខ រយៈពេល ២ ឆ្នាំនេះ កើនឡើងខ្លាំង ទើបខ្ញុំបន្តបើកសាខាទី២ នៅអ៊ីអន ១ នៅចតុមុខនេះមួយទៀត ដើម្បីបម្រើសេចក្តីត្រូវការ ដែលកើនឡើងជាលំដាប់របស់អតិថិជន»។
លោកបានបញ្ជាក់ថា៖ «ស្របពេលជំងឺកូវីដ ១៩ ផ្ទុះជាសកល ខ្ញុំសង្កេតឃើញប្រជាពលរដ្ឋកម្ពុជាយ៉ាងច្រើនបាននាំគ្នាលេងកីឡា និងហាត់កីឡាតាមផ្ទះ រហូតមានការហ្វឹកហាត់បញ្ជាពីគ្រូបង្វឹកតាមអនឡាញទៀត គឺកើនឡើង ហើយការទិញសម្ភារផ្សេងៗ នៅហាងទៅហាត់នៅតាមផ្ទះក៏ពេញនិយម។ ខ្ញុំចាត់ទុកថា នេះជាជោគជ័យមួយ ស្របពេលដែល Decathlon Cambodia មានគោលដៅ ថានឹងនាំយកសម្ភារកីឡាឲ្យដល់ប្រជាពលរដ្ឋគ្រប់គ្នា ក្នុងពេលដ៏ខ្លីខាងមុខ ជាពិសេសត្រៀមព្រឹត្តិការណ៍នានា ដើម្បីជួយក្នុងកីឡាជាច្រើនប្រភេទនៅកម្ពុជា»៕
