The Phnom Penh Post Search

Search form




Logo of Phnom Penh Post newspaper Phnom Penh Post - អង់គ្លេស ២ នាក់​រត់​ជាង ៣០០ គ.ម រៃអង្គាស​ថវិកា​ជួយ​កម្ពុជា

អង់គ្លេស ២ នាក់​រត់​ជាង ៣០០ គ.ម រៃអង្គាស​ថវិកា​ជួយ​កម្ពុជា

Content image - Phnom Penh Post
លោក Matt Pocock និង​លោក Mark Ferguson ពេល​រត់​នៅតាម​ដង​ផ្លូវ។ រូប សហការី

អង់គ្លេស ២ នាក់​រត់​ជាង ៣០០ គ.ម រៃអង្គាស​ថវិកា​ជួយ​កម្ពុជា

ភ្នំពេញៈ លោក Matt Pocock និង​លោក Mark Ferguson ដែល​មាន​សញ្ជាតិ​អង់គ្លេស និង​បច្ចុប្បន្ន​រស់នៅ​ក្នុង​ទីក្រុង​ហុងកុង បាន​ចាប់ផ្តើម​ការ​រត់​ចម្ងាយ​ឆ្ងាយ​ពី​ភ្នំពេញ​ទៅ​ខេត្ត​សៀមរាប​កាល​ពី​ថ្ងៃ​ទី ២៧ ខែ​វិច្ឆិកា ឆ្នាំ ២០១៧ ដោយ​ពួកគេ​រត់​ជា​មធ្យម ៥០ គីឡូម៉ែត្រ ក្នុង​មួយ​ថ្ងៃ​ឆ្លង​កាត់​សហគមន៍​ដាច់​ស្រយាល​ជាច្រើន​នៅ​ក្នុង​ខេត្ត​កំពង់ចាម និង​ខេត្ត​កំពង់ធំ អស់​រយៈពេល ៦ ថ្ងៃ ហើយ​បាន​បញ្ចប់​បេសកកម្ម​របស់​ពួកគេ​នៅ​ថ្ងៃ​ទី ៧ ដោយ​ការ​រត់​ចម្ងាយ ២១ គីឡូម៉ែត្រ ជាមួយនឹ​ង​អ្នក ដែល​ចូលរួម​រត់​ជាង ១ ម៉ឺន​នាក់ ក្នុង​ព្រឹត្តការណ៍​រត់​ប្រណាំង​ពាក់​កណ្តាល​ម៉ារ៉ាតុង​នៅ​អង្គរវត្ត កាល​ពី​ថ្ងៃ​ទី ៣ ខែធ្នូ។

ការរត់​របស់ Matt និង Mark ធ្វើ​ឡើង​ដើម្បី​រៃអង្គាស មូលនិធិ​សប្បុរសធម៌​ចំនួន ៦០០០០ ផោន ដែល​មាន​តម្លៃ​ប្រមាណ ៨ ម៉ឺនដុល្លារ ដើម្បី​គាំទ្រ​ដល់​អង្គការ​សួន​មូលនិធិ (TGF) ដែល​ជា​អង្គការ​ក្រៅ​រដ្ធាភិបាល​ជួយ​សហគមន៍​ក្រីក្រ​នៅ​កម្ពុជា ហើយ​អ្នករត់​ប្រណាំង​ទាំង ២ នាក់ ត្រូវ​បាន​អម​ដំណើរ​ដោយ​រថយន្ត​ផ្នែក​វេជ្ជសាស្ត្រ ដែល​ឧបត្ថម្ភ​ដោយ​ក្រុមហ៊ុន​មេនូឡាយហ្វ៍ និង​នាំ​ផ្លូវ​ដោយ​មគ្គុទ្ទេសក៍​ទេសចរណ៍ ដែល​មាន​សញ្ជាតិ​ខ្មែរ​ម្នាក់ ធ្វើ​ដំណើរ​ដោយ​កង់។

លោក Matt ថ្លែង​ថា៖ «មាន​មូលហេតុ​ពីរ​យ៉ាង ដែល​យើង​រត់ ទី១ ដើម្បី​រៃ​អង្គាស​ប្រាក់​តាម​ដែល​អាច​ធ្វើ​បាន ដើម្បី​ឧបត្ថម្ភ​អង្គការ​សួន​មូលនិធិ។ ទី ២ ដើម្បី​លើក​កម្ពស់​ការ​យល់​ដឹង​អំពី​ភាព​ក្រីក្រ​នៅ​តាម​ជនបទ​នៃ​ប្រទេស​កម្ពុជា។ យើង​ទាំងពីរ​នាក់​បាន​រស់នៅ​ក្នុង​ទ្វីប​អាស៊ី​អស់​រយៈពេល​យូរ​មក​ហើយ ហើយ​វាជា​កន្លែង​ដែល​យើង​ចូលចិត្ត​ជាខ្លាំង អ៊ីចឹង​ហើយ​ប្រជាជន គួរ​តែ​ដឹងថា មាន​អ្វី​កើត​ឡើង​នៅ​ទីជនបទ នៅ​ពេល​ដែល​ពួកគេ​ចេញ​ពី​ទីប្រជុំជន»។

លោក Mark បន្ថែម​ថា៖ «ការគាំទ្រ​ដល់​កុមារ និង​ក្រុម​គ្រួសារ​ក្រីក្រ​តាមរយៈ​អង្គការ​សួន​មូលនិធិ ជា​កម្លាំងចិត្ត ដែល​ជួយ​ពួកយើង អាច​រត់​ទៅ​ដល់​គោលដៅ​នៅ​ខេត្ត​សៀមរាប»។

គិត​មក​ដល់​ពេល​នេះ ទឹកប្រាក់​ដែល​លោក​ទាំង ២ រៃ​អង្គាស​បាន​មាន​ចំនួន​ជាង ១០ ម៉ឺន ដុល្លារ​អាមេរិក ចាប់តាំង​ពី​ការ​រៃអង្គាស​ចាប់ផ្ដើម​ប្រមាណ ២ ខែ មុន​ការ​រត់​ប្រណាំង​ចាប់ផ្ដើម។

លោក Matt ក៏បាន​លើក​ឡើង​ទៀត​ថា៖ «ប្រទេស​កម្ពុជា​គឺជា​ទីកន្លែង ដែល​យើង​ទាំង ២ ធ្លាប់​មក​ទស្សនា​កាល​ពី​អតីតកាល ហើយ​យើង​ពិតជា​ចូលចិត្ត​ប្រទេស​នេះ​ណាស់។ Mark បាន​ស្គាល់​បុគ្គលិក ដែល​ធ្វើការ​នៅ​អង្គការ​សួន​មូលនិធិ ហើយ​ពួកយើង​ទាំង ២ ពិតជា​ពេញចិត្ត​យ៉ាង​ខ្លាំង​ចំពោះ​សកម្មភាព​ដែល​អង្គការ​នេះ កំពុង​ធ្វើ។ ប្រាក់​រៃអង្គាស​ទាំងអស់ នឹង​ត្រូវ​ផ្តល់​ជា​ជំនួយ​ទៅ​ដល់​គម្រោង​របស់​អង្គការ​សួន​មូលនិធិ នៅ​ឆ្នាំក្រោយ ដើម្បី​ជួយ​ដល់​អ្នក​ភូមិ នៅ​ស្រុក​ជីក្រែង​ក្នុង​វិស័យ​សុខភាព ការ​អប់រំ​របស់​កុមារ ប្រព័ន្ធ​ទឹកស្អាត និង​កសិកម្ម»៕

អត្ថបទគួរចាប់អារម្មណ៍