.jpg)
ក្រុមអត្តពលិកវ័យក្មេងហាប់គីដូ បាននាំគ្នាក្រាលកម្រាលថ្មី ដែលទើបទទួលបានការឧបត្ថម្ភ។ រូប យឺន ពន្លក
ភ្នំពេញ៖ ប្រធានអង្គភាពកីឡាក្រសួងមហាផ្ទៃ លោក ជា ប៊ុនហេង បានផ្តល់កម្រាលទីលានសម្រាប់សហព័ន្ធកីឡាចំនួន ២ គឺសហព័ន្ធខ្មែរកីឡាហាប់គីដូ ដើម្បីត្រៀមរៀបចំជើងឯកថ្នាក់ជាតិឆ្នាំ ២០២០ ហើយលោកក៏បានផ្តល់ជូនលោកព្រឹទ្ធាចារ្យ សាន គឹមស៊ាន ប្រធានបណ្ឌិត្យសភាល្បុក្កតោ ដើម្បីរៀបចំប្រតិបត្តិការបង្វឹកអត្តពលិកជំនាន់ក្រោយ នៅឯខេត្តសៀមរាប ១ កន្លែងទៀតផងដែរ។
នៅក្នុងពិធីផ្តល់កម្រាល នៅទីលានហ្វឹកហាត់កីឡាហាប់គីដូ នាអង្គភាពកីឡាក្រសួងមហាផ្ទៃ ក្នុងពហុកីឡដ្ឋានជាតិអូឡាំពិកកម្ពុជា កាលពីចុងសប្តាហ៍មុន លោកឧត្តមសេនិយ៍ឯក ជា ប៊ុនហេង បានថ្លែងថា៖ «ដោយមើលឃើញពីការប្រឹងប្រែងរបស់កីឡាខ្មែរហាប់គីដូ ក្នុងការត្រៀមរៀបចំជើងឯកជាតិឆាប់ៗក្នុងឆ្នាំនេះ ហើយដើម្បីឲ្យមានទីលានល្អកម្រិតស្តង់ដាអន្តរជាតិនោះ ខ្ញុំសម្រេចចិត្តទិញបំពាក់នូវកម្រាលខ្នាតល្អថ្មី ដែលមានទំហំ ១៣ ម៉ែត្របួនជ្រុង ស្មើនឹង ១៦៩ ម៉ែត្រការ៉េ មានតម្លៃ ៤ ២២៥ ដុល្លារអាមេរិក»។
លោកបន្ថែមថា៖ «ជាមួយគ្នានេះ ខ្ញុំក៏បានជួយលោកតា សាន គឹមស៊ាន ព្រឹទ្ធាចារ្យកីឡាល្បុក្កតោ ដែលគាត់បានបង្កើតសាលាបណ្ឌិតល្បុក្កតោ បណ្តុះបណ្តាលធនធានមនុស្សជំនាន់ក្រោយ ឬជនបរទេស និងចេញលិខិតបញ្ជាក់ពីកម្រិតថ្នាក់ក្រមា ពីកម្រិតខ្មៅ ១ ជាន់ ដល់ ១០ ជាន់ ហើយចំណាយសម្រាប់ ២ ប្រភេទកីឡានេះ គឺអស់ទឹកប្រាក់ជិត ១ ម៉ឺនដុល្លារ បានមកពីសម្តេចក្រឡាហោម ស ខេង ដែលតែងតែលើកទឹកចិត្ត និងធ្វើឲ្យកីឡាក្រសួងមហាផ្ទៃ មានសក្តានុពលលំដាប់ជួរមុខ លើទូទាំងប្រទេសសឹងគ្រប់ប្រភេទកីឡា»។
លោកបានបន្ថែមថា ដើម្បីធ្វើឲ្យកីឡាមានសកម្មភាពរីកចម្រើនត្រូវហ៊ានលះបង់កម្លាំងកាយកម្លាំងចិត្ត និងធនធានផ្ទាល់ខ្លួនទៀតផង។ ជាមួយគ្នានេះលោកបានចំអកឲ្យមន្ត្រីថ្នាក់ដឹកនាំកីឡាមួយចំនួន ដោយមិនបញ្ចេញឈ្មោះថា៖ «កាន់ការចង់ដុះស្លែ តែប្រភេទកីឡានោះ មិនដែលទទួលបានមេដាយពីអន្តរជាតិមកជូនមាតុភូមិនោះឡើយ ប៉ុន្តែពួកគេនៅតែឈរបានក្នុងតំណែងរហូត ដោយធ្វើមាន ធ្វើបាន ពីសកម្មភាពកីឡាទៅវិញ»។
ចំណែកលោក គង់ ចាន់ធីណា អគ្គលេខាធិការសហព័ន្ធកីឡាហាប់គីដូ បានប្រាប់ថា៖ «អ្នកហាត់កីឡាហាប់គីដូ ក៏ដូចខ្ញុំជាគ្រូបង្វឹកផ្ទាល់ គឺតស៊ូតាំងពីហាត់ នៅទីសាធារណៈអស់ពេលជាង ១០ ឆ្នាំ ហើយឥឡូវទទួលបានទីលាន និងកម្រាលហ្វឹកហាត់កម្រិតស្តង់ដាអន្តរជាតិ ដោយមានការឧបត្ថម្ភពីឯកឧត្តមប្រធានអង្គភាពកីឡាក្រសួងមហាផ្ទៃ។ យើងនឹងយកទីលាននេះ រៀបចំការប្រកួតថ្នាក់ជាតិក្នុងពេលឆាប់ៗ ក្នុងគោលបំណងពង្រឹងសមត្ថភាពអត្តពលិកឈានទៅឲ្យមានវត្តមានក្នុងព្រឹត្តិកាណ៍ស៊ីហ្គេម ២០២៣»។
លោក សាន គឹមសាន បានថ្លែងថា៖ «សាលាបណ្ឌិត្យសភាល្បុក្តតោ ដែលតែងតែផ្លាស់ប្តូរទីតាំងនេះ ពិតជាមានការខ្វះខាតនូវសម្ភារ ពិសេសកម្រាល ដែលជាកន្លែងហាត់នេះ ព្រោះវាមានតម្លៃខ្ពស់ណាស់។ ហេតុនេះការឧបត្ថម្ភនេះ គឺជាការជួយចំគោលដៅណាស់ ព្រោះខ្ញុំកំពុងតែផលិតធនធានកីឡាករឆ្នើម ដើម្បីឆ្លើយតបទៅនឹងក្រសួងអប់រំយុវជន និងកីឡា ដើម្បីយកទៅបង្ហាត់ដល់សិស្សានុសិស្ស នៅតាមសាលា ដោយសារសមត្ថភាពរបស់គ្រូបង្វឹកល្បុក្កតោត្រូវផលិតចេញពីទីនេះ គឺពីដៃខ្ញុំផ្ទាល់»៕
