.jpg)
អតីតជើងខ្លាំង ឡោ សំណាង (ស្តាំ) បាននាំរៀមច្បង ភិន សុផល មកសុំការសង្គ្រោះពីសប្បុរសជន នៅភ្នំពេញ។ រូបថត សហការី
ភ្នំពេញ៖ អតីតអ្នកប្រដាល់ឆ្នើមជំនាញប្រើកណ្តាប់ដៃ ធ្លាប់ផ្តួលគូប្រកួតឲ្យសន្លប់រាប់មិនអស់ ក្នុងអំឡុងឆ្នាំ ២០០០ ភិន សុផល ដែលបាត់មុខពីពិភពប្រដាល់ជាង ១៥ ឆ្នាំមកហើយនោះ ត្រូវបានអតីតជើងខ្លាំងជាសិស្សប្អូនរួមគ្រូនៃក្លិបអាវុធហត្ថលើផ្ទៃប្រទេស លោក ឡោ សំណាង នាំមកដល់រាជធានីភ្នំពេញ ដើម្បីសុំការជួយសង្គ្រោះពីសប្បុរសជន ខណៈពេលនេះ ភិន សុផល មានជីវភាពក្រីក្រតោកយ៉ាក ស៊ីឈ្នួលលក់ពលកម្ម បោចស្មៅ បាញ់ថ្នាំ នៅជាយដែនព្រំប្រទល់ខេត្តប៉ៃលិន និងបាត់ដំបង ព្រមទាំងបានពិការបំពង់កនិយាយលែងបាននោះ។
អ្នកប្រដាល់ល្បីល្បាញ ភិន សុផល មានស្រុកកំណើត នៅស្រុកស្វាយប៉ោ ខេត្តបាត់ដំបង។ តាមរយៈការប្រកួតនៅតាមជនបទទទួលបានភាពល្បីរន្ទឺ ក្នុងអំឡុងឆ្នាំ ១៩៩៦ ដល់ឆ្នាំ ២០០៣ នោះ នាំឲ្យ ភិន សុផល បានក្លាយខ្លួនមកនៅក្លិបកងរាជអាវុធហត្ថផ្ទៃប្រទេស ដែលមានលោក ទ្រឿង សុសសាយ ជាគ្រូបង្វឹក នៅឯរាជធានីភ្នំពេញ។
ជាមួយគ្នានោះ ក្លិបកងអាវុធហត្ថលើផ្ទៃប្រទេស ដែលប្រជុំដោយកីឡាករលំដាប់ខ្លាំងនោះ ត្រូវបានគេប្រគល់ក្របខ័ណ្ឌជាកងអាវុធហត្ថដល់កីឡាករលំដាប់ឆ្នើមៗជួរមុខមានដូចជា ភិន សុផល, ជ័យ កុសល, ឡោ សំណាង និង វ៉ន វីវ៉ា។ ទោះជាមានភាពល្បីល្បាញខ្លាំង តែ ភិន សុផល មិនធ្លាប់ឈ្នះបានខ្សែក្រវាត់នោះឡើយ គឺបានត្រឹមជើងឯករងប៉ុណ្ណោះ ព្រោះការឡើងមកដល់វគ្គផ្តាច់ព្រ័ត្រចំនួន ២ លើក ភិន សុផល បានចាញ់អតីតកីឡាករ អូត ភូថង ម្តង និងចាញ់ នួន សូរិយា ម្តង។
អតីតអ្នកប្រដាល់ឆ្នើមជំនាញជង្គង់ និងកែងជាសិស្សប្អូន ឈ្មោះ ឡោ សំណាង បានប្រាប់ថា៖ «ខ្ញុំបានស្គាល់ភ្នំពេញ និងក្លាយជាអ្នកល្បីល្បាញមួយរូប ដោយសារបង ភិន សុផល នាំខ្ញុំមក ប៉ុន្តែក្រោយពីពួកយើងត្រូវបានគេដកក្របខ័ណ្ឌវិញអស់ ចំនួន ៣ នាក់ គឺមានខ្ញុំ ឡោ សំណាង បង ជ័យ កុសល និងបង ភិន សុផល នេះ ពួកយើងបែកគ្នារយៈពេល ១៥ ឆ្នាំហើយ ដោយគ្មានទទួលបានដំណឹងអ្វីសោះ»។
ឡោ សំណាង បន្ថែមថា៖ «ខ្ញុំបានចំណាយពេលទៅរកគាត់ (ភិន សុផល) ជាច្រើនថ្ងៃ ហើយខ្ញុំបានរកឃើញគាត់ នៅក្នុងទីជនបទមួយ ក្នុងភូមិត្រក ស្រុករតនមណ្ឌល ជាប់ព្រំប្រទល់ខេត្តប៉ៃលិន គឺស្ថិតក្នុងតំបន់ព្រៃឆ្ងាយពីអ្នកភូមិដទៃ។ នៅក្នុងស្ថានភាពដែលខ្ញុំបានជួបផ្ទាល់ភ្នែក ឃើញជីវភាពរបស់គាត់លំបាក និងពិការផងនោះ ខ្ញុំបានសម្រេចចិត្តនាំគាត់មករាជធានីភ្នំពេញជាបណ្តោះអាសន្ន ដើម្បីស្វែងរកការអាណិតអាសូរពីសប្បុរសជនសង្គ្រោះជីវភាពរបស់គាត់ឲ្យបានប្រសើរ»។
ឡោ សំណាង បានបញ្ជាក់ថា៖ «គាត់និយាយមិនចេញទេ គឺបានតែកាយវិការ និងសរសេរបានខ្លះ ព្រោះកាលពីឆ្នាំ ២០០៦ ពេលគាត់បាត់ខ្លួនពីពិភពប្រដាល់នោះ គាត់មានបញ្ហាជាមួយប្រពន្ធ ហើយគាត់សម្រេចចិត្តធ្វើអត្តឃាតដោយអារបំពង់ក ប៉ុន្តែមិនស្លាប់ ដោយពេទ្យសង្គ្រោះទាន់ និងដាក់ឧបករណ៍ដកដង្ហើមតាមបំពង់កដល់សព្វថ្ងៃនេះ»។
តាមរយៈលោក ឡោ សំណាង បានឲ្យដឹងថា៖ «អ្វីដែលបង ភិន សុផល ចង់បាន គឺអណ្តូងស្នប់មួយ ដែលអាចឲ្យប្រជាពលរដ្ឋនៅម្តុំក្បែៗគ្នាចំនួន ១១ គ្រួសារ នៅក្នុងព្រៃនោះ ប្រើបាន ហើយគាត់ចង់បានត្រឹមថវិកាបន្តិចបន្តួច ដើម្បីសង់ខ្ទមមួយគ្រាន់ស្នាក់នៅ ដោយមិនវិលមកភ្នំពេញវិញទេ»។
គួររំឭកថា គិតមកដល់បច្ចុប្បន្ន ក្លិបប្រដាល់កងរាជអាវុធហត្ថលើផ្ទៃប្រទេស ដែលធ្លាប់មានកីឡាករល្បីល្បាញនោះ ត្រូវបានបាត់ឈ្មោះ បន្ទាប់ពីលោកគ្រូបង្វឹក ទ្រឿង សុសសាយ បានស្លាប់ កាលពីចុងឆ្នាំ ២០១១ ហើយកីឡាករល្បីៗ និងឆ្នើមៗមួយចំនួនដូចជា ជ័យ កុសល, ឡឹក វិបុល, សឹង្ហ វិច្ឆិកា, ឡោ សំណាង, សៅ ប៊ុននឿន, ភិន សុផល វ៉ន វីវ៉ា ជាដើមនោះ បានចែកផ្លូវគ្នាអស់មកដល់បច្ចុប្បន្ន៕
