.jpg)
អ្នកចាំទី Rustu Recber បានលោតចាប់បាល់ ពេលក្រុមទួកគីជួបក្រុមប្រេស៊ីក្នុង World Cup ២០០២។ រូបថត AFP
ក្រុង Ankara៖ អតីតអ្នកចាំទីដៃទី ១ របស់ក្រុមជម្រើសជាតិតួកគី គឺកីឡាករ Rustu Recber ត្រូវបានបញ្ជូនទៅកាន់មន្ទីពេទ្យ ក្រោយពីធ្វើតេស្តវិជ្ជមានវីរុសកូរ៉ូណា។ នេះបើតាមការឲ្យដឹងពីប្រពន្ធរបស់លោកផ្ទាល់តែម្ដង។
កីឡាករ Rustu ដែលចំណាយពេលសឹងពេញមួយអាជីព ជាមួយ Fenerbahce ក្រុមលំដាប់កំពូលនៅប្រទេសកំណើតខ្លួនឯង មុននឹងធ្វើដំណើរទៅចូលរួមជាមួយក្លិបយក្សនៅអេស្ប៉ាញ គឺអ្នកមានបុណ្យ Barcelona នៅក្នុងរយៈពេល ៣ ឆ្នាំ (២០០៣-២០០៦) តែគួរឲ្យស្ដាយនៅទីនោះ គេមិនទទួលបានជោគជ័យឡើយ ដោយបង្ហាញខ្លួនបានតែ ៧ ប្រកួតប៉ុណ្ណោះ។
អ្នកចាំទីវ័យ ៤៦ ឆ្នាំ បានរួមចំណែកយ៉ាងធំធេង ជួយឲ្យប្រទេស តួកគី ជាប់ចំណាត់ថា្នក់ទី ៣ ក្នុងព្រឹត្តិការណ៍ FIFA World Cup កាលពីឆ្នាំ ២០០២ ដែលពេលនោះ ប្រទេស ជប៉ុន និងកូរ៉េខាងត្បូង ជាសហម្ចាស់ផ្ទះ មុននឹងរូបគេសម្រេចចិត្តព្យួរស្រោមដៃរបស់ខ្លួន ពោលគឺចូលនិវត្តន៍ពីអាជីពជាកីឡាករបាល់ទាត់ នៅអាយុ ៣៩ ឆ្នាំ ក្នុងឆ្នាំ ២០១២ ជាមួយនឹងស្ថិតិ ១២០ លើក ក្នុងនាមជាអ្នកឈរការពារគ្រាប់បាល់ឲ្យក្រុមជម្រើសជាតិតួកគី។
ពាក់ព័ន្ធនឹងការមានជំងឺផ្លូវដង្ហើមថ្មីរបស់ Rustu អ្នកស្រី Isil Recber ដែលត្រូវជាភរិយា បានឲ្យដឹងតាមរយៈបណ្ដាញសង្គម Instagram របស់ខ្លួនថា៖ «ខ្ញុំចង់ផ្ដល់ព័ត៌មានពិតប្រាកដបន្ថែមដល់អ្នកទាំងអស់គ្នា គឺការចែករំលែករឿងពិតតាមរយៈវិធីដ៏មានតម្លាភាពបំផុត។ ខ្ញុំសោកស្ដាយ ដែលត្រូវប្រាប់អ្នកទាំងអស់គ្នាថា ប្ដីរបស់ខ្ញុំ Rustu ត្រូវបានបញ្ជូនទៅកាន់មន្ទីរពេទ្យ ដោយសារមានជំងឺកូវីដ ១៩»។
តាមរយៈសារតាម Instagram នោះ លោកស្រី Isil សរសេរបន្តថា៖ «យើងស្រឡាំងកាំងមែនទែន ពេលរោគសញ្ញាវិវឌ្ឍលឿនហួសពីការស្មានបែបនេះ ខណៈដំបូងឡើយ គ្រប់យ៉ាងនៅធម្មតាសោះ។ នេះជាពេលវេលាដ៏លំបាក និងគ្រោះថ្នាក់ខ្លាំងណាស់ សម្រាប់ពួកយើង។ សូមព្រះជាម្ចាស់ជួយឲ្យអ្នកជំងឺទាំងអស់ឲ្យធូរស្រាលឆាប់ៗ ជាពិសេសប្ដីសំណព្វរបស់ខ្ញុំ»។
ស្ត្រីវ័យ ៤២ ឆ្នាំ រូបនេះ បានសរសេរបន្ថែមថា៖ «សំណូមពរតែមួយគត់របស់ខ្ញុំ គឺថាមនុស្សទាំងអស់ត្រូវតែមានការប្រុងប្រយ័ត្ន និងយកចិត្តទុកដាក់ចំពោះហេតុការណ៍បច្ចុប្បន្ននេះ។ លទ្ធផលនៃការធ្វើតេស្តរបស់ពួកយើង ឃើញថា កូនប្រុស-ស្រីរបស់ខ្ញុំអវិជ្ជមាន គឺមានតែស្វាមីរបស់ខ្ញុំប៉ុណ្ណោះ ដែលវិជ្ជមាន»។
ចុងក្រោយលោកស្រី បានសរសេរបញ្ជាក់ថា៖ «ដោយសារស្ថានភាពមិនអំណោយផល យើងបានត្រឹមនៅផ្ទះ ខណៈគាត់នៅពេទ្យ ហើយយើងមិនអាចទៅសួរសុខទុក្ខគាត់បាន។ វាពិតជាពិបាកមែនទែន ដែលមិនអាចទៅថែទាំគាត់»។
ក្រោយទទួលបានដំណឹងនេះ ក្រុម Fenerbahce បានសរសេរសារជូនពរតាមរយៈប្រព័ន្ធ Twitter របស់ខ្លួនថា៖ «ក្ដីប្រាថា្នដ៏ធំរបស់យើង គឺសូមឲ្យអតីតអ្នកចាំទីជម្រើសជាតិរបស់យើង Rustu Recber ឆាប់ប្រសើរឡើងវិញ។ គាត់ធ្លាប់ជាកីឡាករម្នាក់ ដែលពាក់ឯកសណ្ឋានក្រុមយើងជាច្រើនឆ្នាំ។ យើងសូមឲ្យគាត់ជាសះស្បើយឆាប់ៗ ហើយយើងសង្ឃឹមថា នឹងទទួលបានដំណឹងល្អពីគាត់»។
ជាមួយគ្នានេះ ក្រុម Barcelona ក៏សរសេរសារជូនពរតាមបណ្ដាញសង្គម Twitter របស់ខ្លួនដូចគ្នាដែរ៖ «ជាឆាប់ៗ Rustu។ យើងគឺ Barcelona យើងនៅជាមួយអ្នកជានិច្ច»។
ក្រោយវីរុសកូរ៉ូណារាតត្បាតទូទាំងសកលលោក ប្រទេស តួកគី ក៏ស្ថិតក្នុងចំណោមនោះដែរ ហើយតាមរបាយការណ៍ផ្លូវការរបស់ក្រសួងសុខាភិបាលបានឲ្យដឹងថា មានមនុស្ស ៩ ២១៧ នាក់ បានឆ្លង ក្នុងនោះ ១៣១ នាក់ បានបាត់បង់ជីវិត៕ AFP/VN
