.jpg)
ការប្រកួតកីឡាអត្តពលកម្ម ដែលត្រូវបានធ្វើឡើងនៅពហុកីឡដ្ឋានជាតិ នាពេលកន្លងមក។ រូបថត ឈន ណន
ភ្នំពេញ៖ សហព័ន្ធខ្មែរកីឡាអត្តពលកម្មស្ម័គ្រចិត្តបានសម្រិតសម្រាំងធនធានជាក្រុមអត្តពលិក និងគ្រូបង្វឹកដល់ ៣៦ នាក់ ដើម្បីចូលហាត់ក្រុមជម្រើសជាតិនៅឆ្នាំនេះ ហើយអ្នកទាំងនេះ ក៏នឹងត្រូវបញ្ជូនឱ្យទៅហាត់នៅប្រទេសចិន ផងដែរ បើសិនជាស្ថានភាពជំងីកូវីដ ១៩ មានភាពធូរស្រាលវិញ ហើយការធ្វើបែបនេះ គឺដើម្បីពង្រឹងសមត្ថភាព និងសក្តានុពលឱ្យបានកាន់តែល្អក្នុងការត្រៀមទៅប្រកួតស៊ីហ្គេមលើកទី៣១ នៅវៀតណាមចុងឆ្នាំនេះ។
លោក ហ៊ុន បូរី ជាអគ្គលេខាធិការសហព័ន្ធបានប្រាប់ថា ឆ្នាំ ២០២១ នេះ ជាឆ្នាំកាន់តែសំខាន់ដោយសហព័ន្ធយើងនឹងបញ្ជូនក្រុមគ្រូបង្វឹក និងក្រុមអត្តពលិកសរុបចំនួន ៣៦ នាក់ ក្នុងនោះមានគ្រូបង្វឹក ៩ នាក់ អត្តពលិកចំនួន ២៧ នាក់ (ស្រី ៦ នាក់) ដើម្បីចូលហ្វឹកហាត់ប្រមូលផ្តុំតាមការណែនាំរបស់ក្រសួងជំនាញ។
សម្រាប់គ្រូបង្វឹកទាំង ៩ នាក់នេះ ត្រូបានកំណត់ឱ្យបង្វឹកទៅតាមជំនាញផ្សេងៗពីគ្នាក្នុងនោះលោកគ្រូ លាក់ ឡុច និងលោក គង់ បូណា បង្វឹកលើវិញ្ញាសារត់ល្បឿនពី ១០០ ម៉ែត្រ ទៅ ២០០ ម៉ែត្រ រីឯលោកគ្រូ ពុធ បូរាត្រី បង្វឹកលើវិញ្ញាសាចោល (មានចោលដុំដែក ចោលស្ន ចោលថាស) ហើយលោកគ្រូ ទត ម៉ាលី បង្វឹកលើវិញ្ញាសារត់ចម្ងាយឆ្ងាយ ២១ គីឡូម៉ែត្រ និង ៤២ គ.ម។
ចំណែកលោកគ្រូ ពៅ ស៊ីថា និងលោកគ្រូ គៀង សាម៉ន បង្វឹកខាងរត់ចម្ងាយ ៨០០ ដល់ ១ ៥០០ ម៉ែត្រ ខណៈលោកគ្រូ រ័ត្ន សុជាតិ និងអ្នកគ្រូ សុទ្ធ ស្រីលក្ខណ៍ បង្វឹកលើវិញ្ញាសាលោតកម្ពស់ និងលោកគ្រូ ខៀវ សំណាង បង្វឹកលើវិញ្ញាសាលោតចម្ងាយ ឆ្លងកាត់ឧបសគ្គ (ផ្លោះរបង)។
យ៉ាងណាក៏ដោយ នៅពេលសួរពីលទ្ធផលដែលរំពឹងនឹងទទួលបានសម្រាប់ក្រុមជម្រើសជាតិនេះ លោក ហ៊ុន បូរី បានឆ្លើយតបថា៖ «យើងមិនអាចហ៊ានវាយតម្លៃពីកម្រិតបច្ចេកទេស ឬលទ្ធផល មុនប្រកួតបានទេ ព្រោះកីឡាអត្តពលកម្មនេះ ប្រកួតប្រជែងគ្នាស្រួចស្រាល់ណាស់ ដោយសារប្រទេសណាក៏ដាក់ចូលប្រកួតដែរ ហើយសមិទ្ធផលរបស់អត្តពលិកនីមួយៗ វាចេះតែឈានទៅមុខជានិច្ច ប៉ុន្តែកត្តាសំខាន់ការហ្វឹកហាត់ក្នុងលំដាប់នៅប្រទេសទំនើបជឿនលឿន គឺឆាប់ទទួលបានលទ្ធផលល្អ»។
លោកបន្ថែមថា៖ «យើងមានចំណុច ត្រូវពង្រឹងសមត្ថភាពរបស់អត្តពលិកឱ្យបានល្អ ព្រោះបើសិនអត្តពលិកយើងហាត់បានទិន្នន័យមិនល្អ យើងមិនឱ្យទៅប្រកួតហើយយើងក៏មិនបញ្ជូនអ្នកនោះ ទៅចូលរួមស៊ីហ្គេមឆ្នាំ ២០២១ នៅទីក្រុងហាណូយ ប្រទេសវៀតណាម ដែរ បើពិនិត្យឃើញថា កម្រិតបច្ចេកទេសរបស់យើងនៅទាបជាងគេនោះ»។
ជុំវិញការពង្រឹងសមត្ថភាពក្រុមអត្តពលិកម្មនេះ លោក បូរី បានលើកជាឧទាហរណ៍មកបញ្ជាក់ថា វិញ្ញាសាលោតកម្ពស់ កម្ពុជាយើងទើបតែធ្វើបាន ១,៨៥ ម៉ែត្រ ចំណែកកម្រិតល្អ ក្នុងអាស៊ាន លោតបានកម្ពស់ ២ ម៉ែត្រទៅហើយ អ៊ីចឹងយើងជំរុញឱ្យជិតដល់ រីឯវិញ្ញាសាចោលដុំដែក យើងទើបតែធ្វើបានត្រឹម ១៣ ម៉ែត្រជាង តែកម្រិតជយលាភីអាស៊ានធ្វើបាន ១៧ ម៉ែត្រទៅហើយ ចំណែកម៉ារ៉ាតុង ៤២ គីឡូម៉ែត្រ គឺលុះត្រាធ្វើបានក្នុងថិរវេលាក្រោម ២:៣០ ម៉ោង ឬ ២: ២០ ម៉ោង ទើបយើងអាចចូលក្នុងកម្រិតជយលាភីបាន ព្រោះកម្រិតជយលាភីអាស៊ានកន្លងមក ធ្វើបានក្រោម ២ ម៉ោង និង ២០ នាទី។
យ៉ាងណាក៏ដោយ លោក ហ៊ុន បូរី ជឿថា ក្រុមកម្ពុជាអាចនឹងធ្វើបាន បើពួកគេបានទៅហាត់នៅចិន។ «បើបញ្ហាកូវីដថមថយ ហើយយើងមានឱកាស បានបញ្ជូនក្រុមអត្តពលិករបស់យើងទៅហ្វឹកហាត់នៅចិនតាមកិច្ចព្រមព្រៀងនោះ គឺយើងមានសង្ឃឹមច្រើនក្នុងការប្រកួតប្រជែងយកមេដាយណាមួយនៅស៊ីហ្គេមឆ្នាំ ២០២១ នេះ ព្រោះការហ្វឹកហាត់នៅក្រៅប្រទេសមានគ្រូជំនាញជួយឱ្យអត្តពលិកឆាប់ឡើងបច្ចេកទេស»៕
