ភ្នំពេញៈ សហព័ន្ធកីឡាអុកចិន និងអន្តរជាតិកម្ពុជា នឹងបញ្ជូនកីឡាករអុកឆ្នើមចំនួន ៣ នាក់ ឲ្យទៅកាន់ទីក្រុងស៊ាងហៃ ប្រទេសចិន នាថ្ងៃទី ២៥ ខែតុលា ខាងមុខនេះដើម្បីចូលរួម ប្រកួតអន្តរជាតិមួយឈ្មោះថា Muhua Cup ២០១៨ ដែលនឹងចាប់ពីថ្ងៃទី ២៦ ដល់ថ្ងៃទី ៣០ ខែតុលា ឆ្នាំ ២០១៨។
សម្រាប់ការប្រកួត Muhua Cup ដែលត្រូវបានធ្វើឡើងក្នុងរយៈពេល ២ ឆ្នាំម្តងនេះ គឺ សហព័ន្ធកីឡាអុកចិន និងអន្តរជាតិកម្ពុជា ធ្លាប់បានបញ្ជូនកីឡាករអុកកម្ពុជា ឲ្យទៅចូលរួមប្រកួត តាំងពីឆ្នាំ ២០០៨ មកម្ល៉េះ ប៉ុន្តែមិនធ្លាប់ទទួលបានជយលាភីនៅឡើយទេ។
លោក ឌី ជូត អគ្គលេខាធិការសហព័ន្ធកីឡាអុកចិន និងអន្តរជាតិកម្ពុជា បានប្រាប់ភ្នំពេញប៉ុស្តិ៍ កាលពីថ្ងៃអង្គារថា៖ «យើងនឹងបញ្ជូនកីឡាករឆ្នើមជម្រើសជាតិកម្ពុជា ៣ នាក់ ទៅចូលរួមការប្រកួតនេះ ក្នុងនោះមានកីឡាករ ហេង ចំណាន,ហុក គួង និង ហ្វាន ស៊ីសាន (ជម្រើសជាតិខ្មែរដើមកំណើតចិន) ហើយលោកឧកញ៉ា លី ហួត ជាប្រធានសហព័ន្ធកីឡាអុកចិន និងអន្តរជាតិកម្ពុជា គឺជាប្រធានប្រតិភូដឹកនាំការប្រកួតនេះដោយផ្ទាល់តែម្តង»។
លោកបានបន្តថា តាមដំណឹងដែលលោកទទួលបាន គឺការប្រកួតនេះ គឺលេងវិញ្ញាសាជាក្រុម ដោយគ្មានវិញ្ញាសាឯកត្តជននោះឡើយ។ ព្រឹត្តិការណ៍ប្រកួតបែបនេះ ត្រូវធ្វើឡើងរយៈពេល ២ ឆ្នាំម្តង ហើយកីឡាអុករបស់កម្ពុជាយើងបានចូលរួមប្រកួតតាំងពីឆ្នាំ ២០០៨ មកជាប់ជានិច្ចមិនដែលខកខានទេ ប៉ុន្តែមិនដែលទទួលបានចំណាត់ថ្នាក់មេដាយនោះទេ ដោយសារការប្រកួតជាក្រុម ដែលចាប់ដៃគូមានសមត្ថភាព មិនខ្លាំងស្មើដៃគ្នា គឺប្រកួតធ្វើតាមការចាប់ឆ្នោត ដែលមិនអាចស្គាល់ពីសមត្ថភាពមុននោះឡើយ។
សម្រាប់ព្រឹត្តិការណ៍ប្រកួត Muhua Cup ២០១៨ នេះ មាន ១៦ ប្រទេសចូលរួម ក្នុងនោះមានអូស្ត្រាលី ជប៉ុន ចិនហុងកុង ចិនម៉ាកាវ ចិនតៃប៉ិ និងចិនដីគោក ជាដើម ចំណែកប្រទេសក្នុងតំបន់អាស៊ាន សុទ្ធតែបានទៅចូលរួមការប្រកួតនេះទាំងអស់ លើកលែងតែឡាវ ដែលមិនបានចូលរួម។
កីឡាករ ហេង ចំណាន ដែលទើបដណ្តើមបានមេដាយមាសថ្មី និងជាបេក្ខជនមួយរូបឆ្នើមជាងគេ ដែលត្រៀមចេញទៅ ប្រកួតនេះ បាននិយាយថា៖ «ការចេញទៅប្រកួតលើកនេះ មានក្តីសង្ឃឹមតិចតួច គឺត្រឹម ៥០ ភាគរយប៉ុណ្ណោះ ព្រោះថាការប្រកួតជាក្រុម ៣ នាក់ទល់ ៣ នាក់ ហើយលទ្ធផលគណៈកម្មការផ្តល់ឲ្យក្រុមណាឈ្នះ ២ ក្តារ ចាញ់ ១ ឡើងទៅវគ្គបន្ត ប៉ុន្តែបើចាញ់ ២ ឈ្នះ ១ គឺធ្លាក់តែម្តង»។
កីឡាករ ហេង ចំណាន បានបន្ថែមថា៖ «ខ្ញុំពិបាកធានា ឬអះអាងពីការឈ្នះណាស់ព្រោះយើងត្រូវលេង ៣ ក្តារ គឺមានន័យថា ក្នុងម្នាក់លេងមួយក្តារ ដូចជាការតាងដោយ A B C អ៊ីចឹងបើខ្ញុំតាងដោយ A ធានាឈ្នះ ១០០ ភាគរយ គឺត្រូវចាំអ៊ុតកីឡាករកម្ពុជាយើង ២ នាក់ទៀតមាន B និង C ឈ្នះដែរ ឬយ៉ាងហោចណាស់ឈ្នះ ១ ទៀត ក្នុងចំណោម ២ នាក់នេះ ទើបឆ្លងផុតទៅវគ្គបន្តបាន»។
កីឡាកររូបនេះ បានបញ្ជាក់ ថា៖ «ទោះជាយ៉ាងណា ទឹកចិត្តជាកីឡាករ ពេលចេញទៅប្រកួត ត្រូវតែសង្ឃឹម ប៉ុន្តែក្តីបារម្ភ គឺត្រូវធ្វើយ៉ាងណាឲ្យកីឡាករក្នុងក្រុមកម្ពុជាយើងឈ្នះដែរ ព្រោះការប្រកួតនេះគ្មានវិញ្ញាសាឯកត្តជនមួយទល់នឹងមួយនោះឡើយ»។
ចំណែកលោកឧកញ៉ា លី ហួត ប្រធានសហព័ន្ធអុកចិន និងអន្តរជាតិកម្ពុជា មានប្រសាសន៍ថា៖ «ការចេញប្រកួតនៅស៊ាងហៃប្រទេសចិននេះ គ្រប់ការចំណាយទាំងការហូបចុកស្នាក់នៅ និងសំបុត្រយន្តហោះ ទៅមកមួយចប់ ជាបន្ទុករបស់សហព័ន្ធអុកទាំងស្រុង គឺខ្ញុំជាអ្នករ៉ាប់រងចំណាយ ហើយនៅក្នុងវិស័យកីឡា មិនថាតែអុកនោះទេ គឺខ្ញុំតែងតែជួយឧបត្ថម្ភជាហូរហែដល់ប្រភេទកីឡាមួយចំនួនទៀត ដើម្បីភាពរីកចម្រើននៃវិស័យកីឡាប្រទេសកម្ពុជាយើង»៕