ភ្នំពេញៈ គណៈកម្មាធិការជាតិអូឡាំពិកកម្ពុជា (NOCC) បានរកឃើញកីឡាការិនីកម្ពុជាឆ្នើមៗចំនួន ៣ នាក់ ដែលសុទ្ធតែមានទេពកោសល្យល្អ គឺ ២ នាក់នៅសហរដ្ឋអាមេរិក និងម្នាក់ទៀតនៅសាធារណរដ្ឋកូរ៉េដើម្បីត្រៀមដាក់ឲ្យប្រកួតតំណាងឲ្យប្រទេសកម្ពុជា នៅលើឆាកអន្តរជាតិ ស្របទៅតាមយុទ្ធសាស្ត្រអភិវឌ្ឍន៍កីឡារបស់កម្ពុជា។
លោក ថោង ខុន រដ្ឋមន្ត្រីក្រសួងទេសចរណ៍ និងជាប្រធាន NOCC បានថ្លែងក្នុងបទសម្ពាសជាមួយភ្នំពេញ ប៉ុស្តិ៍ កន្លងមកនេះថា៖ «រយៈពេលប៉ុន្មានខែចុងក្រោយនេះ យើងទទួលបានកីឡាការិនីឆ្នើមវ័យក្មេងចំនួន ៣ នាក់ មានប្រភេទកីឡាកាយសម្ព័ន្ធម្នាក់ និងរត់ប្រណាំងម្នាក់ ដែលកំពុងរស់នៅសហរដ្ឋអាមេរិក និងកីឡាការិនីស្នូកឃ័រ មកពីកូរ៉េ ហើយក្នុងនោះក៏មានកីឡាករហែលទឹក (លោតទឹក) ម្នាក់ទៀត តែយើងមិនទាន់បានជួបគ្នានៅឡើយ»។
លោកបានលម្អិតថា តាមរយៈលោករដ្ឋមន្ត្រីស្តីទី អ៊ុច បូររិទ្ធ ក្រសួងការបរទេស និងសហប្រតិបត្តការអន្តរជាតិ បានធ្វើលិខិតផ្ញើជូន NOCC កាលពីថ្ងៃទី ១៥ ខែមិថុនា ឆ្នាំ ២០១៨ ស្តីពីការស្នើសុំឲ្យកីឡា-ការិនី ម៉ាលីនដា ស្រីរដ្ឋយីម នៅសហរដ្ឋអាមេរិកចូលជាជម្រើសជាតិកីឡាកាយសម្ព័ន្ធកម្ពុជា ខណៈកីឡាការិនីរូបនេះ ដណ្តើមបានលេខ ១ ជាបន្តបន្ទាប់នៅសហរដ្ឋអាមេរិក។
លោកបន្តថា តាមរយៈប្រវត្តិរូប ដែលក្រសួងការបរទេសផ្ញើមកនោះ ម៉ាលីនដា ស្រីរដ្ឋយីម បានកើតនៅថ្ងៃទី ៧ ខែមករា ឆ្នាំ ២០០៥ នៅរដ្ឋ Massachusete សហរដ្ឋអាមេរិក បច្ចុប្បន្នកំពុងហ្វឹកហាត់នៅសាលាកីឡាកាយសម្ព័ន្ធមួយឈ្មោះ Wikey Gymnastices ហើយមានឪពុកឈ្មោះ សម្បត្តិ យីម និងម្តាយឈ្មោះ ស៊ីណា មិន ដែលមានដើមកំណើតខ្មែរ។
ចំណែកកីឡាការិនីឆ្នើមម្នាក់ទៀតគឺ Roth Sokunthea ដែលលេងកីឡារត់ប្រណាំងជំនាញ ១០០ ម៉ែត្រ។ ឪពុកម្តាយ Roth Sokunthea មានដើមកំណើតនៅខ្មែរ ហើយបច្ចុប្បន្ន កញ្ញាកំពុងសិក្សាផ្នែកពាណិជ្ជកម្មឆ្នាំទី ៣ នៅសាកលវិទ្យាល័យ Califonia State University, Northridge។
បន្ថែមលើនេះកីឡាការិនី Roth Sokunthea បានហាត់ និងរត់ល្បឿន ១០០ ម៉ែត្រ ដោយទទួលបានលទ្ធផលល្អ។ ថិរវេលាក្នុងការរត់ល្បឿន ១០០ ម៉ែត្រចុងក្រោយ ដែលកីឡាការិនីវ័យ ២០ ឆ្នាំរូបនេះធ្វើបានគឺ ១២.០៥ វិនាទីប៉ុណ្ណោះ ហើយកញ្ញា ធ្លាប់ទទួលបានជយលាភីពីសាកលវិទ្យាល័យ Califonia StateUniversity, Northridge ទៀតផង។
ចំពោះកីឡាការិនីទី ៣ គឺ ស្រួង ភាវី ដែលជាអ្នកលេងកីឡាប៊ីយ៉ា និងស្នូកឃ័រលំដាប់ពិភពលោកទៅហើយ។ ភាវី បច្ចុប្បន្នមានអាយុ ២៧ ឆ្នាំ កម្ពស់ ១,៦៧ ម៉ែត្រ មានស្រុកកំណើតនៅភូមិថ្មពេជ្រ ឃុំថ្មពេជ្រ ស្រុកត្បួងឃ្មុំ ខេត្តត្បូងឃ្មុំ ប៉ុន្តែបានទៅរស់នៅប្រទេសកូរ៉េខាងត្បូង និងហ្វឹកហាត់លេងកីឡាស្នូកឃ័រតំណាងឲ្យកម្ពុជា។
លោក ថោង ខុន បានបញ្ជាក់ថា៖ «កីឡាការិនីឆ្នើមទាំង ៣ រូបនេះ នឹងស្នើសុំទៅ ក្រសួងអប់រំយុវជន និងកីឡា ទៅជាក្រុមជម្រើសជាតិកម្ពុជា ហើយទោះជាការហ្វឹកហាត់របស់គេនៅក្រៅប្រទេស ប៉ុន្តែត្រៀមការប្រកួតអន្តរជាតិនានា ឬព្រឹត្តិការណ៍ស៊ីហ្គេម នៅប្រទេសហ្វីលីពីន ឆ្នាំ ២០១៩ នឹងដណ្តើមមេដាយឲ្យព្រះរាជាណាចក្រកម្ពុជា»។
ចំណែកអ្នកជំនាញផ្នែកកីឡា លោក វ៉ាត់ ចំរើន ដែលជាអគ្គលេខាធិការ NOCC បានថ្លែងថា៖ «តាមរយៈកម្រិតបច្ចេកទេសរបស់កីឡាការិនីឆ្នើមទាំង ៣ ប្រភេទនេះ នៅក្នុងការប្រកួតប្រជែងថ្នាក់តំបន់ គឺយើងសង្ឃឹមខ្ពស់ណាស់ ក្នុងការដណ្តើមមេដាយជូនជាតិមាតុភូមិហើយបច្ចុប្បន្ន NOCC នឹងខិតខំស្វែងរកការលើកទឹកចិត្តជួយឲ្យពួកគេហ្វឹកហាត់ និងប្រកួតបានល្អ ដោយស្វែងរកការឧបត្ថម្ភបន្ថែមពីវិស័យឯកជន»៕