ភ្នំពេញ៖ អង្គការផ្កាយសមុទ្រ ដែលផ្តោតកម្មវិធីសម្រាប់ក្មេងៗ ប្រឈមទៅនឹងបញ្ហាលំបាក គ្មានទីពឹង រួមមានកីឡាករ កីឡាការិនីពិការភ្នែក គថ្លង់ ខ្សោយបញ្ញា និងអ្នកមានផ្ទុកមេរោគអេដស៍ ឲ្យបានលេងបាលទាត់ពេញមួយថ្ងៃ កាលពីថ្ងៃទី ១០ ខែកក្កដា នៅទីលានបាល់ទាត់អង្គការផ្កាយសមុទ្រ ស្ថិតនៅភូមិស្ពានថ្ម ស្រុកកណ្តាលស្ទឹង ខេត្តកណ្តាល ដើម្បីបង្កភាពសប្បាយរីករាយ និងផ្តល់ឱកាសឲ្យពួកគេ និងអាណាព្យាបាលមានក្តីសង្ឃឹមក្នុងជីវិតដ៏អភ័ព្ទរបស់ពួកគេ។
លោក យិន សាមឌី ប្រធានគ្រប់គ្រងកម្មវិធីបាល់ទាត់របស់អង្គការផ្កាយសមុទ្រ បានប្រាប់ភ្នំពេញប៉ុស្តិ៍ ថា៖ «កម្មវិធីជួបជុំលេងកីឡា ដែលអង្គការ បានបង្កើតឡើង ក្នុងពេលនេះ ជាព្រឹត្តិការណ៍កីឡាប្រចាំឆ្នាំ ដោយមាន ២ លើកក្នុង ១ ឆ្នាំ ក្នុងគោលបំណងជាលក្ខណៈមនុស្សធម៌ ចង់ផ្តល់ការជួបជុំសប្បាយរីករាយ ជូនយុវជនយុវនារី ដែលជួបបញ្ហាពិការ និងអភ័ព្ទ ដើម្បីជាលើកទឹកចិត្ត និងផ្តល់ក្តីសង្ឃឹមដល់ពួកគេ»។
លោកបន្ថែមថា៖ «នេះក៏ជាវេទិកាចូលរួមសកម្មភាពកីឡា ក្នុងសង្គម ដោយមិនរើសអើងចំពោះជន ដែលមានពិការភាព ផងដែរ គឺយើងទាំងអស់គ្នារស់ ក្នុងសង្គមតែមួយ និងមានសិទ្ធិសេរីភាពដូចគ្នា ហើយក្រៅពីការបង្កើតកម្មវិធីជួបជុំលេងកីឡាបាល់ទាត់ សម្រាប់ពួកគេ ក្នុង ១ ឆ្នាំ ចំនួន ២ ដងនេះ អង្គការផ្កាយសមុទ្រ ក៏បានធ្វើការបណ្តុះបណ្តាលជំនាញបាល់ទាត់មួយចំនួនដល់កីឡាករ ការិនី ដែលជាជនពិការភ្នែក ពិការជើងជិះរទះ និងសម្រាប់ជនពិការ គថ្លង់ ព្រមពិការសតិបញ្ញាខ្សោយ ផ្ទុកមេរោគអេដស៍ ផងដែរ»។
សកម្មភាពប្រកួតបាល់ទាត់នេះ មានកីឡាករកីឡាការិនីជាង ២០០ នាក់ ចូលរួមប្រកួតដែលបានចំណាយពេលពេញមួយថ្ងៃ និងផ្តល់អាហារដល់ពួកគេផងដែរ។ ការប្រកួតកីឡាបាល់ទាត់នេះ បានផ្តល់ជូនយុវជនពិការនូវឱកាស ក្នុងការចូលរួមប្រកួតកីឡា ដែលជាការប្រកួតដ៏កម្រមួយ នៅក្នុងប្រទេស កម្ពុជា ខណៈដែលអាណាព្យាបាលរបស់ពួកគេ ពេញចិត្តបំផុត។
លោកនាយិការ ជួប វិច្ឆិការ បានថ្លែងថា៖ «កម្មវិធីបាល់ទាត់របស់អង្គការផ្កាយសមុទ្រ កំពុងធ្វើព្យាយាមកាត់បន្ថយវិសមភាព នៅក្នុងប្រទេស កម្ពុជា និងបង្កើតឱកាសបន្ថែមទៀតសម្រាប់កុមារ និងយុវជន ដែលមានពិការភាព ក្នុងការចូលរួមលេងកីឡា និងចូលរួមជាមួយភាគីសហគមន៍របស់ពួកគេ ហើយកម្មវិធីរបស់យើង បានធ្វើការផ្ទាល់ជាមួយអង្គការកុមារ ដែលមកដល់បច្ចុប្បន្នមានចំនួនជាង ៤ ០០០ នាក់ ចូលរួមក្នុងនោះ ៨៥ ភាគរយ ជាកីឡាករពិការភ្នែកកីឡាករថ្លង់ ឬមានបញ្ហាការស្ដាប់ កីឡាករប្រើរទេះ កីឡាករខ្សោយបញ្ញា និងកីឡាករ ដែលមានផ្ទុកមេរោគអេដស៍»។
កីឡាករពិការភ្នែកមកពីសមាគមតន្រ្តីសំនៀងជនពិការឈ្មោះ ចាប តូ បាននិយាយថា៖ «កម្មវិធីនេះ ពិតជាល្អខ្លាំងណាស់ សម្រាប់ជនពិការដូចរូបខ្ញុំ ព្រោះវាបានលើកកម្ពស់សិទ្ធិ និងធ្វើឲ្យជីវិតរបស់ពួកខ្ញុំសប្បាយ រួចផុតពីភាពឯកកោ ផ្តល់ឱកាសឲ្យជនពិការភាព បានចូលរួមសកម្មភាពសង្គម ពិសេសទៀតនោះ គឺបានផ្តល់ឱកាសឲ្យជនពិការភាព បានស្គាល់ពីអ្វីទៅជាកីឡា»។
គួររំឭកថា សកម្មភាពរបស់អង្គការផ្កាយសមុទ្រ រួមជាមួយសហព័ន្ធកីឡាបាល់ទាត់កម្ពុជា និងអង្គភាពផ្សេងៗទៀត បានសហការគ្នារៀបចំព្រឹត្តិការណ៍ ដូចជាការប្រកួតនេះចំនួន ២ លើកក្នុង ១ ឆ្នាំ ដើម្បីផ្តល់ឱកាសដល់កុមារ និងយុវវ័យ ដែលងាយរងគ្រោះ នៅទូទាំងប្រទេស កម្ពុជា ដោយអង្គការផ្កាយសមុទ្រ បានធ្វើការជាដៃគូជាមួយអង្គការក្នុង និងក្រៅស្រុក និងសាលារៀនរដ្ឋ ឬឯកជន ចំនួន ៦០ អង្គភាពឯណោះ៕