ភ្នំពេញ: កីឡាជាតិលើកទី ២ ដែលជាព្រឹត្តិការណ៍កីឡាដ៏ធំក្នុងទម្រង់ដើម្បីអភិវឌ្ឍន៍ និងស្វែងរកបទពិសោធក្នុងដំណើរឆ្ពោះទៅស៊ីហ្គេមលើកទី ៣២ ក្នុងពេលព្រះរាជាណាចក្រកម្ពុជាត្រៀមធ្វើម្ចាស់ផ្ទះនោះ បានដំណើរការរយៈពេលមួយសប្តាហ៍ហើយក្នុងនោះប្រភេទកីឡាមួយចំនួនបានបិទបញ្ចប់ និងកីឡាមួយចំនួនទៀតនៅតែបន្តការប្រកួតរហូតដល់ថ្ងៃបិទនៅថ្ងៃទី ៤ ខែមិថុនា ឆ្នាំ ២០១៨។
ទោះជាយ៉ាងណា មន្ត្រី និងអត្តពលិក មានតែឈ្មោះអត់ឃើញមនុស្ស ឬគេនិយមហៅចំអកថា មន្ត្រីខ្មោច កីឡាករខ្មោច ដែលអវត្តមានមិនមកចូលរួមក្នុងព្រឹត្តិការណ៍ប្រកួតកីឡាជាតិលើកទី ២ នេះមិនទាន់ដឹងថា ក្រសួងអប់រំ យុវជន និងកីឡា ឬគណៈកម្មការ រៀបចំប្រកួតមានវិធានការផ្លូវច្បាប់ ឬដាក់ពិន័យតាមរបៀបណានៅឡើយទេ។
ការអវត្តមានរបស់ពួកគេធ្វើឲ្យប៉ះពាល់ដល់ការចំណាយថវិការបស់ជាតិក្នុងការហូបចុក និងស្នាក់នៅដែលបានរៀបចំជាស្រេចតាំងពីពេលចុះឈ្មោះមកម្ល៉េះ។
លោកឧត្តមសេនីយ៍ឯកម៉ក់ សំអុល ទីប្រឹក្សាជាន់ខ្ពស់នៃគណៈកម្មាធិការជាតិអូឡាំពិកកម្ពុជា និងប្រធានសមាគមកីឡាប្រដាល់ក្រសួងមហាផ្ទៃមានប្រតិកម្មកាលពីម្សិលមិញថា៖ «ការអវត្តមានរបស់មន្ត្រីកីឡា និងកីឡាករ-កីឡាការិនីក្នុងព្រឹត្តិការណ៍ប្រកួតកីឡាជាតិលើកទី ២ នេះនាំឲ្យប៉ះពាល់ដល់ការចំណាយថវិការបស់ជាតិ ហើយវាជាទង្វើ ឬទម្លាប់អាក្រក់ដែលមន្ត្រីថ្នាក់ដឹកនាំគ្រប់គ្រងកីឡាមានសមត្ថកិច្ច គួរតែត្រួតពិនិត្យវាយតម្លៃ និងដាក់ពិន័យឲ្យបានម៉ឺងម៉ាត់បំផុត មិនមែននៅតែលំៗតទៅទៀតបានទេ»។
លោកបានបន្តថា៖ «បច្ចុប្បន្នកីឡារបស់ប្រទេសយើងរីកចម្រើនគួរឲ្យកត់សម្គាល់នៅលើឆាកអន្តរជាតិ។ ការលុបបំបាត់កីឡាករខ្មោច មន្ត្រីខ្មោច ឬការនិយមបក្ខពួក ខ្វះជំនាញក្នុងកីឡា គឺថា យើងធ្វើបានល្អប្រសើរឡើងហើយ ប៉ុន្តែគួរមានវិធានការផ្លូវច្បាប់ចំពោះការអវត្តមានរបស់មន្ត្រី ឬអត្តពលិកដែលបានចុះបញ្ជីចូលរួមក្នុងព្រឹត្តិការណ៍ប្រកួតកីឡាជាតិលើកទី ២ រួច ដែលក្រសួងអប់រំ យុវជន និងកីឡា បានរៀបចំការចំណាយរួច ប៉ុន្តែ បែរជាអវត្តមានដោយគ្មានមូលហេតុគឺត្រូវចាត់ទុកថា បានប្រព្រឹត្តកំហុសមួយ និងត្រូវទទួលរងពិន័យដើម្បីឲ្យពួកគេរាងចាល»។
លោកបានលម្អិតបន្ថែមថា៖ «នៅក្នុងសមាគមកីឡាប្រដាល់ក្រសួងមហាផ្ទៃ បានដាក់កីឡាគុនខ្មែរចំនួន ៨ ប្រភេទទម្ងន់ ប្រតិភូ និងគ្រូបង្វឹក ២ នាក់គឺដូចគ្នាទៅនឹងប្រដាល់សកលដែរ សរុបទាំងប្រតិភូ និងគ្រូបង្វឹកគឺ ១០ នាក់ដូចគ្នា។ គិតមកថ្ងៃទី ៣០ ខែឧសភា ឆ្នាំ ២០១៨ នេះ ប្រដាល់មកពីក្រសួងមហាផ្ទៃមានកីឡាករអវត្តមានចំនួន ៤ នាក់ ប្រតិភូ ១ នាក់ ដែលនេះជាទង្វើខុសច្បាប់ ហើយខ្ញុំនឹងត្រៀមដាក់លិខិតទៅសហព័ន្ធ និងក្រសួងដើម្បីឲ្យពិនិត្យវាយតម្លៃដាក់ពិន័យចំពោះទង្វើបែបនេះ។ នៅប្រទេសគេ ការចូលរួមក្នុងព្រឹត្តិការណ៍កីឡាត្រូវបង់ប្រាក់ ប៉ុន្តែ កីឡាជាតិយើង ក្រសួងអប់រំ យុវជន និងកីឡា រ៉ាប់រងការហូបចុក ស្នាក់នៅ និងការធ្វើដំណើរទាំងស្រុង»។
លោកអ៊ុក សិទ្ធិជាតិ អគ្គ-នាយកកីឡា បានផ្តល់ការឆ្លើយតបចំពោះភ្នំពេញ ប៉ុស្តិ៍ កាលពីម្សិលមិញថា៖ «ចំពោះបញ្ហាអវត្តមានរបស់មន្ត្រី និងអត្តពលិកនេះ យើងមិនទាន់បានសរុបនៅឡើយទេ ហើយវាស្ថិតនៅក្នុងការទទួលខុសត្រូវជាដំបូងពីប្រតិភូខេត្ត រាជធានី និងក្រសួងសាមីដែលមានសហព័ន្ធនីមួយៗទទួលខុសត្រូវ ពោលគឺតើការជ្រើសរើសបណ្តុះបណ្តាលយកមកប្រើប្រាស់នោះធនធានដូចម្តេច?។ ទី ២ អត្តពលិកនោះមានបញ្ហា ឬនៅខ្វះខាតចំណុចណាគឺត្រូវមានការវាយតម្លៃពីសហព័ន្ធ និងក្រុមប្រឹក្សាវិន័យដើម្បីមានចំណាត់ការទៅលើពួកគាត់»។
លោកអ៊ុក សិទិ្ធជាតិ អគ្គនាយកកីឡាបានបន្ថែមថា៖ «ការអនុវត្តជាក់ស្តែងវាមិនដូចគម្រោងទាំងស្រុងទេ ហើយសណ្ឋាគារ និងការចំណាយមួយចំនួនមានអាហារ និងរថយន្តធ្វើដំណើរសម្រាប់បម្រើការ គឺយើងបានលុបចោលខ្លះតាមជាក់ស្តែង។ ខាងគណៈកម្មការ មិនទាន់បានសរុបអត្តពលិក និងមន្ត្រីអវត្តមាននៅឡើយទេ»៕