ក្រុងតូក្យូ៖ ខ្សែប្រយុទ្ធដូចតួអង្គ Peter Pan ក្នុងរឿងប្រលោមលោក គឺបុរសសញ្ជាតិជប៉ុន Kazuyoshi Miura កំពុងត្រៀមលេង ១ រដូវកាលទៀត ទោះបីជាខ្លួនមានវ័យដល់ទៅ ៥៤ ឆ្នាំ នៅសប្ដាហ៍នេះក្ដី តែយ៉ាងណា រូបគាត់នៅឆ្ងាយពីពាក្យថា «វត្ថុបុរាណដ៏មានតម្លៃតែ ១ គត់» នៃវិស័យបាល់ទាត់ក្នុងប្រទេសរបស់គាត់។
Miura ដែលត្រូវគេស្គាល់យ៉ាងច្បាស់ជាមួយនឹងរហស្សនាម «King Kazu» (អធិរាជ Kazu) កំពុងសម្លឹងដល់ការបន្លាយកំណត់ត្រា ក្នុងនាមជាកីឡាករវ័យចំណាស់បំផុតនៅក្របខ័ណ្ឌទី១ J-League របស់ជប៉ុន ពេលក្លិប Yokohama FC ចាប់ផ្ដើមយុទ្ធនាការរដូវកាលថ្មី នៅថ្ងៃសៅរ៍នេះ។
តែរូបគាត់នឹងមិនមែនជាកីឡាករចាស់វស្សាតែម្នាក់គត់ទេ ដែលប្រកបអាជីពនៅឡើយប៉ុន្មានឆ្នាំនេះ ដោយបច្ចុប្បន្នមានកីឡាករដល់ទៅ ៩ រូប វ័យជាង ៤០ ឆ្នាំ កំពុងមានឈ្មោះនៅក្នុងក្រុមរបស់ពួកគេ ដែលធ្វើការប្រកួតប្រជែងនៅទូទាំងក្របខ័ណ្ឌទាំង ៣ របស់លីគ។
«ខ្ញុំយល់ថា ប្រពៃណីរបស់ប្រទេសជប៉ុន ប្រហែលមានការទាក់ទងនឹងរឿងនេះ»។ នេះជាសម្ដី ដែលប្រាប់ AFP របស់ខ្សែប្រយុទ្ធ Keiji Tamada វ័យ ៤០ ឆ្នាំ ដែលជាសមាជិករបស់ក្រុម V-Varen Nagasaki នៅក្របខ័ណ្ឌទី២ របស់ជប៉ុន។
Tamada បន្ថែមថា៖ «មែនហើយ គោលបំណង គឺចង់លេងការប្រកួត តែខ្ញុំគិតថា កីឡាករជាច្រើនបន្តស្នាក់នៅជាមួយក្រុម ដោយសារយល់ថា ពួកគេអាចធ្វើការរួមចំណែកលើសពីហ្នឹង ដោយការផ្ទេរចំណេះដឹង និងបទពិសោធ»។
Miura ដែលកំពុងត្រៀមចាប់ផ្ដើមរដូវកាលទី៣៦ របស់ខ្លួន កា្លយជាអត្តពលិកបាល់ទាត់ដ៏មានវ័យចំណាស់បំផុត ក្នុងលោកដែលស៊ុតបញ្ចូលទីក្នុងប្រកួតអាជីពក្នុងឆ្នាំ ២០១៧ ពេលបានបំប៉ោងសំណាញ់ទីនៅអាយុ ៥០ ឆ្នាំ និង ១៤ ថ្ងៃ។
Miura បន្លាយកំណត់ត្រា នៅ J-League ក្នុងនាមជាអ្នកចាប់ផ្ដើមចូលលេងវ័យចំណាស់បំផុតក្នុងខែកញ្ញា ឆ្នាំមុន ពេលចូលលេងម្ដង ក្នុងចំណោមការមានវត្តមាន ៤ ដងនៅលីគ ដែលគាត់បានបង្ហាញខ្លួនឱ្យ Yokohama កាលពីរដូវកាលមុន។
Miura និយាយបន្ទាប់ពីបានបន្តកុងត្រាថ្មីកាលពីខែមុនថា៖ «ខ្ញុំមានអារម្មណ៍រីករាយ ពេលបានលេងបាល់ទាត់ក្នុងគ្រាដែលពិភពលោក កំពុងប្រឈមស្ថានការណ៍តានតឹង ដោយសារការរាតត្បាតពីវីរុសកូរ៉ូណាថ្មី។ ដោយផ្ទាល់ខ្លួន វាមិនមែនជារដូវកាលគួរឱ្យពេញចិត្តនោះទេ តែមហិច្ឆតា និងចំណង់ចំណូលចិត្តចំពោះបាល់ទាត់របស់ខ្ញុំនៅតែមានខ្លាំងឡើង»។
តែ Miura ដែលចាប់អាជីពបាល់ទាត់ ក្នុងឆ្នាំ ១៩៨៦ មិនមែនជាកីឡាករចាស់វស្សាតែម្នាក់ឯង ដែលកំពុងមានចំហេះយ៉ាងសន្ធោសន្ធៅក្នុងពន្លឺ ដែលកំពុងខ្សោយទៅៗ នៅ J-League នោះទេ។
អតីតខ្សែបម្រើ Shunsuke Nakamura របស់ Celtic នៅរឹងមាំក្នុងវ័យ ៤២ ឆ្នាំ ខណៈកីឡាករផ្សេងទៀត Junichi Inamoto,Yasuhito Endoនិង Teruyoshi Ito ដែលឥឡូវនេះអាយុ ៤៦ ឆ្នាំកំពុងលេងបាល់ទាត់ទាំងអស់គ្នា ក្នុងទសវត្សរ៍ទី៥ របស់ពួកគេ៕ AFP/VN