.jpg)
លោក ថៃ អ៊ូ (អាវស) ថតជាមួយគ្រូបង្វឹក និងកីឡាករថៃ ដែលលោកបាននាំមកប្រកួតនៅសង្វៀន SEATV។
ភ្នំពេញ៖ ប្រធានសមាគមកីឡាប្រដាល់ខេត្តបន្ទាយមានជ័យ លោក ថៃ អ៊ូ ថា អាជីពជាប្រតិភូនាំកីឡាករបរទេស ពិសេសថៃ ដើម្បីផ្គត់ផ្គង់ការប្រកួតក្នុងប្រទេស កម្ពុជា បានធ្លាក់ដល់ចំណុចសូន្យក្នុងស្ថានភាពជំងឺឆ្លងកូវីដ ១៩ នេះ ព្រោះក្រសួងសុខាភិបាលក៏ដូចជាសហព័ន្ធកីឡាប្រដាល់គុនខ្មែរ បានប្រកាសឲ្យផ្អាក និងពន្យារពេលការនាំចូលកីឡាករបរទេស ដោយគ្មានកាលកំណត់ ដែលធ្វើឲ្យសេវានាំកីឡាករបរទេសមកប្រកួតក្នុងរយៈពេល ១ ខែកន្លងមកនេះ គឺគ្មានទាល់តែសោះ។
បុរសមានស្រុកកំណើត នៅភូមិបឹងខ្នាយ ឃុំសំបូរមាស ស្រុកកំពង់សៀម ខេត្តកំពង់ចាម លោក ថៃ អ៊ូ មានអាយុ ៦០ ឆ្នាំ ហើយបានមករស់នៅជាអចិន្រៃ្តយ៍នៅក្រុងប៉ោយប៉ែត។ លោកបានចាប់ចូលប្រឡូកក្នុងវិស័យប្រដាល់គុនខ្មែរ ពេញលេញតាំងពីឆ្នាំ ២០០៧ ដោយបង្កើតក្លិបប្រដាល់មួយឈ្មោះថា «ប្រដាល់ឃុំប៉ោយប៉ែត» ប៉ុន្តែបន្ទាប់មកបានប្តូឈ្មោះមកជា «ក្លិបក្រុងប៉ោយប៉ែត» មកដល់បច្ចុប្បន្ន។
ក្រៅពីមានក្លិបផ្ទាល់ខ្លួន លោក ថៃ អ៊ូ បានប្រាប់ថា៖ «ចូលដល់ឆ្នាំ ២០១៣ ខ្ញុំបន្ថែមការងារមួយថ្មី គឺនាំកីឡាករថៃមកហ្វឹកហាត់ និងបញ្ជូនមករកទីផ្សារប្រកួតជាមួយសង្វៀនប្រដាល់អាស៊ីអាគ្នេយ៍ បន្ទាប់មកជាមួយសង្វៀន PNN និងសង្វៀនប៉ុស្តិ៍លេខ ៥»។
អាជីពជាប្រតិភូនាំកីឡាករបរទេសមកប្រកួតនេះ លោក ថៃ អ៊ូ បានបង្ហើបថា បានរីកធំធាត់ខ្លាំងជាមួយសង្វៀនអាស៊ីអាគ្នេយ៍ ក្នុងឆ្នាំ ២០១៤ ដោយក្នុង ១ សប្តាហ៍មានការប្រកួតចំនួន ៦ លើក មានសុក្រ សៅរ៍ និងអាទិត្យ ដោយត្រូវការកីឡាករបរទេសចំនួន ១២ នាក់ ខណៈសង្វៀន PNN ត្រូវការ ២ នាក់ និងសង្វៀនប៉ុស្តិ៍លេខ ៥ ត្រូវការតែ ១ នាក់ អ៊ីចឹងក្នុង ១ សប្តាហ៍ លោកត្រូវត្រៀមកីឡាកររហូតដល់ ១៥ នាក់ឯណោះ។
យ៉ាងណាក៏ដោយ ក្នុងពេលដែលប្រទេស កម្ពុជា ធ្លាក់ក្នុងវិបត្តិជំងឺកូវីដ ១៩ គឺអាជីពនាំកីឡាករបរទេសមកប្រកួតរបស់លោក ថៃ អ៊ូ បានធ្លាក់ចុះ រហូតមានការខាតបង់ប្រាក់រាប់ពាន់ដុល្លារ។ លោកបានបញ្ជាក់ថា៖ «នៅក្នុងឆ្នាំ ២០២០ នេះ ពិសេសរយៈពេល ៣ ថ្ងៃ នាថ្ងៃបុណ្យចូលឆ្នាំប្រពៃណីខ្មែរ គឺគម្រោងប្រកួត ៤ សង្វៀន ក្នុង ១ សង្វៀនមាន ១០ គូ ពីថ្ងៃទី ១៤ ដល់ទី ១៦ ខែមេសា ដែលសហការជាមួយអាជ្ញាធរខេត្ត និងក្រុងប៉ោយប៉ែត ត្រូវបានលុបចោលទាំងស្រុង ធ្វើឲ្យការត្រៀមអ្វីៗគ្រប់យ៉ាងរបស់ខ្ញុំ ត្រូវខាតបង់រាប់ពាន់ដុល្លារ»។
នៅក្នុងការលំបាកជាអន្តរកាលនេះ លោក ថៃ អ៊ូ បានវិលទៅបើកហាងលក់គុយទាវ និងកាហ្វេវិញ ប៉ុន្តែសុទ្ធតែចូលដើមទាំងអស់ គ្មានទទួលបានលទ្ធផលល្អនោះឡើយ ប៉ុន្តែលោកបានទម្លាយថា អាជីពជាប្រតិភូនាំកីឡាករបរទេសមកប្រកួត ក៏មិនមែនជារឿងងាយស្រួលនោះដែរ។
លោក ថៃ អ៊ូ បាននិយាយថា៖ «ក្នុងអាជីពជាប្រតិភូនាំកីឡាករបរទេសមកប្រកួតក្នុងប្រទេស កម្ពុជា មិនមែនជារឿងងាយស្រួលទេ គឺត្រូវស្គាល់ពីសមត្ថភាពកីឡាករ មានកត្តាសំខាន់ ៤ ចំណុច ទី ១ ស្គាល់ពីកម្រិតក្បាច់គុនរបស់កីឡាករនីមួយៗកម្រិតណា? ទី២ មានប្រភេទទម្ងន់ណាខ្លះ ដែលសង្វៀននៅកម្ពុជាត្រូវការចាំបាច់ ទី៣ មានទំនាក់ទំនងល្អជាមួយក្លិបក្រៅប្រទេសជាដៃគូ ក្នុងការផ្លាស់ប្តូរគូភ្លាមៗ និងទី៤ ត្រូវមានទុនវិនិយោគធំ ក្នុងការផ្តល់ឲ្យកីឡាករបរទេសប្រមូលផ្តុំ ហ្វឹកហាត់ ហូបចុកត្រៀមឲ្យបានគ្រប់គ្រាន់ ដើម្បីប្រកួតបានល្អក្នុងកម្មវិធីរបស់គេ។
លោកបានសង្កត់ធ្ងន់ថា៖ «ចំពោះប្រាក់ចំណូលបានមកវិញ គឺទទួលបានផលចំណេញតិចតួចណាស់ ហើយប្រឈមទៅនឹងការខាត់បង់ច្រើន ដូចជាផ្លាស់ប្តូរគូដោយសារសុខភាព ប្តូរគូដោយរក្សាទម្ងន់មិនបាន និងប្តូរគូដោយកីឡាកររបួសមិនទាន់ជាសះស្បើយជាដើម ប៉ុន្តែវាជាអ្វីដែលខ្ញុំចូលចិត្តខ្លាំងក្នុងការងារនេះ ហើយខ្ញុំមានកូនប្រុស ២ នាក់ បានចូលរួមជួយការងារនេះ គឺម្នាក់នៅប្រចាំការប្រទេស ថៃ ញឹកញាប់ និងម្នាក់ទៀតនាំកីឡាករមកក្នុងប្រទេស ដើម្បីប្រកួតចំណែកខ្ញុំជាអ្នកគ្រប់គ្រង និងសម្រេចរួមលើកិច្ចការនេះ»។
លោក ថៃ អ៊ូ បានបញ្ជាក់បន្ថែមថា៖ «បន្ថែមលើនេះ ប្រពន្ធ និងកូនស្រីរបស់ខ្ញុំ គ្រប់គ្រងលើមុខរបរម៉ៅការម្ហូប ក្នុងពិធីបុណ្យ ឬពិធីការផ្សេងៗ នៅក្រុងប៉ោយប៉ែត ដើម្បីយកថវិកាជួយផ្នែកសកម្មភាពកីឡានេះផងដែរ។ ប៉ុន្តែគិតមកដល់ពេលនេះ ការបើកឲ្យមានកម្មវិធីនាំកីឡាករបរទេសមកប្រកួតវិញ នៅមិនទាន់ឮដំណឹងអ្វីនៅឡើយទេ ហើយប្រសិនបើកវិញ ខ្ញុំនឹងបន្តការទំនាក់ទំនងឡើងវិញទៀត ដើម្បីស្តារការងារនេះមកវិញ ខណៈដែលពេលនេះ បានធ្លាក់ដល់ចំណុចសូន្យគ្មានសកម្មភាពអ្វីបន្តិចសោះឡើយ»៕
