ភ្នំពេញ៖ អាថ៌កំបាងនៅពីក្រោយនៃជ័យជម្នះរបស់ រិន សារ័ត្ន លើ សោម វិឆ័យ ដើម្បីក្លាយជាម្ចាស់ជើងឯក ការប្រកួតដណ្តើមពានរង្វាន់ TV5 Boxing Knock Out Series ទម្ងន់ ៦៣,៥ គីឡូក្រាម ត្រូវបាន សារ័ត្ន និងអ្នកគ្រប់គ្រងរូបគេផ្ទាល់ទម្លាយថា វាកើតចេញពី «ការឈឺចាប់» ជុំវិញការមើលស្រាលរបស់ សោម វិឆ័យ នៅមុនការប្រកួតចាប់ផ្តើម។
ក្រោយទទួលបានជ័យជម្នះភ្លាម អ្នកស្រី Chhanun Ma អ្នកគ្រប់គ្រង និងមើលថែ រិន សារ័ត្ន បានទម្លាយឲ្យដឹងថា៖ «ការឈ្នះរបស់ រិន សារ័ត្ន បានកើតឡើងពីការឈឺចាប់ ក្រោយពេលឮដំណឹងពីការពោលពាក្យចំអករបស់ដៃគូប្រជែង គឺ សោម វិឆ័យ ថា មិនសមជាដៃគូ»។
អ្នកស្រីបានបន្ថែមថា៖ ខ្ញុំនាំ រិន សារ័ត្ន ទៅហាត់ជាមួយ ហ៊ុន ចាន់រាជ ដើម្បីពង្រឹងកម្លាំង និងបច្ចេកទេស ហើយលោកគ្រូប្រដាល់ សាន់ សៅយ៉ាន់ ក៏បានមកបង្វឹកផ្ទាល់បាន ២ សប្តាហ៍ដែរ ខណៈ សារ័ត្ន បានហាត់ជាប់ ៤ សប្តាហ៍ គ្មានគិតថ្ងៃសៅរ៍ និងថ្ងៃអាទិត្យនោះទេ ទើបទទួលលទ្ធផលឈ្នះបែបនេះ»។
តាមរយៈការប្រកួតផ្តាច់ព្រ័ត្រនៅសង្វៀនប៉ុស្តិ៍លេខ ៥ កាលពីថ្ងៃសៅរ៍នោះ រិន សារ័ត្ន មានប្រៀបដាច់នៅទឹកទី ៣ ដែលជាទឹកផ្តាច់ព្រ័ត្រ ដោយរូបគេបានវ៉ៃឲ្យ សោម វិឆ័យ ថមថយកម្លាំង និងបានដួលចំនួន ៣ លើក ចំណែកទឹកទី ១ វិឆ័យ មានប្រៀបបន្តិចបន្តួច ហើយទឹកទី ២ សារ័ត្ន ដណ្តើមប្រៀបបានវិញ និងបានវ៉ៃផ្តាច់ក្នុងទឹកទី ៣ តែម្តង។
អ្នកស្រី Chhanun Ma បានអះអាងថា៖ «ការឈ្នះរបស់ រិន សារ័ត្ន គឺឯកច្ឆន្ទពីចៅក្រម គ្មានការតវ៉ា ព្រោះជាការប្រើសមត្ថភាពពិត និងការតស៊ូប្រឹងប្រែងបំផុត ដោយប្រែក្លាយពីការឈឺចាប់ មកទទួលបានផលល្អ។ ជ័យជម្នះនេះល្បីល្បាញខ្លាំងណាស់ ព្រោះ សារ័ត្ន មិនធ្លាប់បានលេខ ១ ទេ បានត្រឹមលេខ ២ តែពេលនេះ ឈ្នះជើងចាស់ សោម វិឆ័យ ដែលមានបទពិសោធយូរជាង ល្អជាង ខ្លាំងជាង គឺពិតជាអស្ចារ្យណាស់»។
តាមរយៈជ័យជម្នះនេះបានធ្វើឲ្យ រិន សារ័ត្ន ក្លាយជាកីឡាករតែម្នាក់គត់ ដែលបានឈ្នះគ្រប់ការប្រកួត តាំងពីវគ្គជម្រុះ ៣២ នាក់ ដល់វគ្គផ្តាច់ព្រ័ត្រនេះ ដើម្បីក្លាយម្ចាស់ជើងឯកនិងប្រាក់រង្វាន់ ៤ ០០០ ដុល្លារ ចំណែក សោម វិឆ័យ បានប្រាក់រង្វាន់ ២ ០០០ ដុល្លារ។
រិន សារ័ត្ន បាននិយាយក្រោយពេលឈ្នះថា៖ «មុនពេលប្រកួត ខ្ញុំសង្ឃឹមឈ្នះតិច ប៉ុន្តែក្នុងចិត្តគិតថា នឹងយកឈ្នះឲ្យបាន ដើម្បីកុំឲ្យ សោម វិឆ័យ មាក់ងាយ ហើយជ័យជម្នះនេះ អាចចាត់ទុកថា ជាប្រវត្តិល្អ សម្រាប់អាជីពប្រដាល់របស់ខ្ញុំ ក្នុងនោះពាក្យសម្តីរបស់ សោម វិឆ័យ ដែលចំអកមកលើខ្ញុំ នាំឲ្យខ្ញុំឈឺចាប់ និងក្លាយទៅជាការប្រឹងប្រែង ហើយទទួលបានផលល្អបែបនេះតែម្តង»។
សារ័ត្ន បានបញ្ជាក់ថា៖ «ខ្ញុំបានស្ទង់ស្ទាបពីដំបូងនូវទម្ងន់ជើងរបស់ សោម វិឆ័យ ដែលទាត់មកលើខ្ញុំ គឺមិនធ្ងន់ ហើយខ្ញុំបានសងទៅវិញ ព្រមទាំងចាប់ឡើងជង្គង់ភ្លាមៗ ធ្វើឲ្យកម្លាំងគាត់ ចាប់ផ្តើមខ្សោយចុះ ត្រឹមទឹកទី ២ ហេតុនេះខ្ញុំត្រូវវាយសម្រុកខ្លាំងតែម្តង បង្ខំឲ្យគាត់ដួលញឹកញាប់។ ប៉ុន្តែខ្ញុំគិតថា គាត់ប្រហែលជាឈឺជើង បានជាមិនសូវទាត់ ហើយខ្ញុំបានតាមដានការប្រកួតមុនៗ ឃើញថា គាត់ល្អបានតែ ២ ទឹកប៉ុណ្ណោះ អ៊ីចឹងខ្ញុំមានគំនិតប្រយុទ្ធខ្លាំង គ្មានដកថយ ដើម្បីយកឈ្នះផ្នែកកម្លាំង និងក្បាច់ជង្គង់»។
ចំណែក ពុយ វណ្ណៈ បានយកឈ្នះ វ៉ែន ហុងជីវ៉ុង ដោយពិន្ទុ ដើម្បីទទួលបានលេខ ៣ និងប្រាក់រង្វាន់ ៧៥០ ដុល្លារ ខណៈអ្នកលេខ ៤ ហុងជីវ៉ុង បាន ៥០០ ដុល្លារ៕