.jpg)
ក្បូនដង្ហែរបស់ម្ចាស់មេដាយមាស ប៉ាល់ ជីវ័ន និងប្រតិភូកីឡា ITF ពេលមកដល់ទីស្នាក់ការក្រសួង។ ឈន ណន
ភ្នំពេញ៖ ប្រតិភូកីឡាតេក្វាន់ដូ ITFរបស់កម្ពុជា បាននាំយកមហាកិត្តិយស គឺការឈ្នះបានមេដាយមាស ១ ប្រាក់ ២ និងសំរឹទ្ធ ២ ពីការប្រកួតជើងឯកពិភពលោក World Taekwon-do ITF Championship នៅក្រុង Plodiv ប្រទេស ប៊ុលហ្គារី មកដល់មាតុប្រទេសវិញ កាលពីថ្ងៃអាទិត្យ ដោយមានការរៀបចំដង្ហែក្បួនអមដោយម៉ូតូធំពីព្រលានយន្តហោះអន្តរជាតិភ្នំពេញ រហូតដល់ទីស្នាក់ការក្រសួងអប់រំ យុវជន និងកីឡា នៅក្បែរវិមានឯករាជ្យដ៏អធិកអធមបំផុត។
នៅក្នុងការទទួលស្វាគមន៍នោះ លោកស្រី គីម សេដ្ឋានី រដ្ឋលេខាធិការក្រសួងអប់រំ យុវជន និងកីឡា បានថ្លែងថា៖ «ក្នុងនាមឲ្យឯកឧត្តមបណ្ឌិតសភាចារ្យ ហង់ ជួនណារ៉ុន រដ្ឋមន្រ្តីក្រសួងអប់រំ នាងខ្ញុំសូមសម្តែងការស្វាគមន៍អបអរសាទរប្រកបដោយក្តីមោទនភាពជាទីបំផុត ចំពោះប្រតិភូកីឡា ITF ជាពិសេសអត្តពលិក ដែលខិតខំប្រឹងប្រែងដណ្តើមបានមេដាយជូនជាតិ ហើយបានបង្កើតកំណត់ត្រាប្រវត្តិសាស្រ្តថ្មី លើកទី ១ ដល់កម្ពុជាក្នុងការទទួលបានមេដាយមាស ព្រមទាំងមេដាយប្រាក់ និងសំរឹទ្ធ កម្រិតពិភពលោកលើកនេះ»។
លោកស្រី បានបន្ថែមថា៖ «សមិទ្ធផលជោគជ័យដ៏ថ្លៃថ្លានេះ វាមិនមែនកើតឡើងដោយចៃដន្យនោះទេ គឺប្រាកណាស់ថា ការឈ្នះមេដាយមាស ជាកំណត់ត្រាប្រវត្តិសាស្រ្តនេះ វាកើតឡើងដោយការខិតខំព្យាយាមរបស់កីឡាករយើង គ្រូបង្វឹក និងថ្នាក់ដឹកនាំរបស់សហព័ន្ធ ព្រមការចូលរួមពីគ្រប់ស្ថាប័នពាក់ព័ន្ធ ពិសេសការលើកទឹកចិត្ត និងការផ្តល់តម្លៃលើវិស័យកីឡាពីថ្នាក់ដឹកនាំប្រទេសគឺ សម្តេច ហ៊ុន សែន ហើយមោទនភាព ដែលបងប្អូនកីឡាកររបស់យើង ទទួលបាននៅពេលនេះ គឺមិនមែនសម្រាប់តែខ្លួនឯង និងក្រុមគ្រួសារទេ ប៉ុន្តែជាមោទនភាពរបស់កម្ពុជាទាំងមូល»។
គួរបញ្ជាក់ថា នៅក្នុងការប្រកួតជើងឯកពិភពលោកនេះ កីឡាករ ប៉ាល់ ជីវ័ន បានឈ្នះមេដាយមាស លើការសម្តែងមេគុនខ្សែក្រវាត់ខ្មៅ ៥ ដាន់ ហើយ ជីវ័ន ក៏បានឈ្នះមេដាយប្រាក់ក្នុងការសម្តែងពិសេស រួមគ្នាជាមួយកីឡាករ តាំង សៀងសុង, ស៊ុំ គង់ហេង, ឃឿន ប៊ុងលាង, ឃឿន ប៊ុនឡុង និង នេត្រ ហាក់លី ផងដែរ។ ចំណែកកីឡាករ បួនចាន់ ថារ៉ាត់ បានឈ្នះមេដាយប្រាក់ ១ លើការប្រកួតទម្ងន់ ៤៥ គីឡូក្រាម ហើយកីឡាករ ម៉េត សុខមាន, សុភ័ក្ត្រ ចន្ទឧត្តម, បួនចាន់ ថារ៉ាត់ និង វឿង វណ្ណៈ បានឈ្នះមេដាយសំរឹទ្ធ លើការសម្តែងជាក្រុម ខណៈលោកគ្រូ ហឹម រីដា បានឈ្នះមេដាយសំរឹទ្ធ ក្នុងការប្រកួតបំបែកក្តារ ក្រុមអាយុ ៤០ ដល់ ៤៩ ឆ្នាំ។
យ៉ាងណាក៏ដោយ នៅពីក្រោយការបង្កើតប្រវត្តិសាស្រ្តជូនជាតិនេះ ប្រតិភូកីឡាតេក្វាន់ដូ ITF ដែលដឹកនាំដោយលោក កែវ រ៉េមី ជាប្រធានសហព័ន្ធ បានបិទបាំងនូវឆន្ទៈ និងជម្នះការលំបាកយ៉ាងច្រើន ខណៈអ្នកខ្លះបានខំប្រឹងប្រកួតទាំងខ្លួនមានរបួស ហើយអ្វីដែលគួរកត់សម្គាល់បំផុតនេះ គឺកីឡាករ ៥ នាក់ បានវិលមកវិញទាំងមានរបួសជាប់ខ្លួន ក្នុងនោះ នេត្រ ហាក់លី បានរយះកែងជើង និងខ្ទាំបាតជើង, ឃឿន ប៊ុនឡុង របួសដៃ និងហើមប្រអប់ដៃ ខណៈ ស៊ុំ គង់ហេង ក៏មានរបួសដៃផងដែរ។ ចំណែកកីឡាករ វឿង វណ្ណៈ បានរបូតសន្លាក់ឆ្អឹងស្មា ពេលធ្លាក់ពីការលោតសម្តែង ១ នាក់ ទល់នឹង ៣ នាក់ ហើយលោកគ្រូ ហឹម រីដា បានរបួសជើង និងហើមប្រអប់ជើង ក្នុងការប្រកួតទាត់បំបែកក្តារ។
ជុំវិញនឹងបញ្ហារបួសនេះលោក ផាន់ វណ្ណរ័ត្ន អនុប្រធានសហព័ន្ធកីឡាតេក្វាន់ដូ ITF កម្ពុជាថ្លែងថា៖ «គ្រប់កីឡាករ ITF របស់កម្ពុជា បានតស៊ូ មិនខ្លាចពួកច្រមុះស្រួច អឺរ៉ុប រុស្ស៊ី ឬប្រទេសណានោះទេ ហើយពេលឃើញសកម្មភាពប្រកួតរបស់ពួកគាត់ សឹងតែស្រក់ទឹកភ្នែក។ ទោះបីជាយើងខ្លួនតូច និងទាបជាងគេ ហើយអ្នកខ្លះមានទាំងរបួសជាប់ខ្លួន ប៉ុន្តែកីឡាកររបស់យើងមិនបោះបង់នោះទេ គឺពួកគាត់ប្រឹងប្រែងប្រកួតដោយឆន្ទៈខ្ពស់បំផុត ទើបទទួលបានលទ្ធផលដ៏ល្អប្រសើរ នៅពេលនេះ គឺខ្ញុំសូមសរសើរពួកគាត់អស់ពីដួងចិត្ត»៕
