.jpg)
កីឡាករ ឈុន ហេង និងសេះឈ្មោះ Na Va Ra បានឈ្នះពានការប្រណាំងសេះក្នុងពូលC ប្រចាំខែមេសា កាលពីថ្ងៃសៅរ៍។ រូប សហការី
ភ្នំពេញៈ សេះលំដាប់ក្នុងស្រុកឈ្មោះ «អាផ្កាយ» នៅតែបានបង្ហាញពីការរត់យ៉ាងលឿន ដើម្បីបន្តឈ្នះតំណែងជើងឯក ក្នុងការប្រកួតកីឡាប្រណាំងសេះ ដណ្ដើមពានរង្វាន់ Smart Land Home Champion 2018 ប្រចាំខែមេសា នៅលើទឹកដីវិហារសួគ៌ កាលពីថ្ងៃសៅរ៍ ខណៈសេះឈ្មោះ Na Va Ra បានបង្ហាញពីសមត្ថភាពកាន់តែល្អ ដើម្បីឈ្នះតំណែងជើងឯក ជាលើកដំបូង។
ជាមួយនឹងកម្ពស់ ១,៣៩ ម៉ែត្រ អាផ្កាយ ដែលបញ្ជាដោយម្ចាស់របស់វាផ្ទាល់គឺកីឡាករ ស្រូល ស្រួច អាផ្កាយ បានរត់យ៉ាងលឿន ក្នុងរយៈចម្ងាយ ១៦០០ ម៉ែត្រ ដើម្បីទៅកាន់ទីផ្តាច់ព្រ័តបានមុនគេ និងទទួលបានចំណាត់ថ្នាក់លេខ ១ ក្នុងការប្រកួតពូល D ជាលើកទី ៣ អមជាមួយប្រាក់រង្វាន់ចំនួន ១,២ លានរៀល ហើយលេខ ២ បានទៅសេះឈ្មោះ អារ៉េ ដោយទទួលបានប្រាក់រង្វាន់ ១ លានរៀល និងលេខ ៣ បានទៅសេះឈ្មោះ ប្រុសប៉ាវ អមជាមួយប្រាក់រង្វាន់៨០ ម៉ឺនរៀល។
ការបន្តគ្រងតំណែងជើងឯកប្រចាំខែមេសា របស់ អាផ្កាយ វាបានបង្ហាញឲ្យឃើញថា សេះមួយក្បាលនេះ នៅតែមានសមត្ថភាពល្អ និងមិនទាន់រកគូប្រជែងបាន នៅក្នុងពូល D នេះ ព្រោះសម្រាប់ការប្រកួតប្រចាំខែកុម្ភៈ និងខែមីនា កន្លងមកនេះ អាផ្កាយ ប្រជែងបានលេខ ១ រហូត ខណៈការប្រកួតកាលពីខែមករា អាផ្កាយ បានចាញ់ អារ៉េ ដោយទទួលបានត្រឹមលេខ ២ ប៉ុន្តែ៣ខែចុងក្រោយនេះ អារ៉េ ដែលបញ្ជាដោយកីឡាករ ពិសី បានត្រឹមលេខ ២ រហូត។
ចំណែកការប្រកួតប្រចាំពូល C ដែលត្រូវបានធ្វើឡើង កាលពីថ្ងៃសៅរ៍នោះដែរ សេះឈ្មោះ Na Va Ra មានកម្ពស់ ១,៤២ ម៉ែត្រ ដែលបញ្ជាដោយម្ចាស់របស់វាផ្ទាល់ គឺកីឡាករ ឈុន ហេង បានក្លាយជាម្ចាស់ជើងឯក អមជាមួយប្រាក់ ២ លានរៀល ឯលេខ ២ បានទៅសេះឈ្មោះ អាឆ្លាម អមជាមួយប្រាក់រង្វាន់ ១,៦ លានរៀល ហើយលេខ ៣ បានទៅសេះ ដែលមានអ្នកគាំទ្រច្រើនជាងគេឈ្មោះថា KK អមជាមួយប្រាក់រង្វាន់ ១,២ លានរៀល។
ការទទួលបានចំណាត់ថ្នាក់លេខ១របស់ Na Va Ra ប្រចាំខែមេសានេះ វាបានបង្ហាញឲ្យឃើញពីការរីកចម្រើនរបស់សេះមួយក្បាលនេះ ព្រោះការប្រកួត កាលពីខែមករា Na Va Ra បានត្រឹមលេខ ៣ ហើយខែកុម្ភៈ បានលេខ ២ ខណៈការប្រកួតប្រចាំខែមីនា កន្លងមកនេះ Na Va Ra មិនទទួលបានចំណាត់ថ្នាក់នោះទេ៕
