ប៉ារីស: ការគ្រងពានកម្មវិធី French Open លើកទី ១៣ របស់ Rafael Nadal ត្រូវបាន Roger Federer សរសើរថា ជាការសម្រេចជោគជ័យអស្ចារ្យបំផុត ប៉ុន្តែសម្រាប់ការចង់គ្រវីទង់របស់កីឡាវាយកូនបាល់ (តិន្នីស) ឱ្យបានច្រើនជាងគេ ជាកាំបិតដោតជាប់ក្នុងមហិច្ឆតារបស់ពួកគេ។
Nadal ដែលពេលនេះឈ្នះពាន Grand Slam ២០ ដង ស្មើនឹង Federer នោះ ឈ្នះជើងឯកបាន ៦ លើកហើយ គិតតាំងពីចូលវ័យ ៣០ ឆ្នាំ ហើយកីឡាករលេខ ១ ពិភពលោក Novak Djokovic លើកពានបាន ៥ តាំងពីឆ្លងផុតអាយុ ២០ ឆ្នាំ ខណៈសូម្បី Federer ឥឡូវវ័យ ៣៩ ឆ្នាំកាន់ពាន ៤ ក្រោយធ្វើខួបអាយុ ៣០ ឆ្នាំហើយ។
នេះគឺជាស្ថិតិដែលបង្ហាញយ៉ាងច្បាស់ថា តើវាមានគម្លាតឆ្ងាយយ៉ាងណាដែររវាងកំពូលកីឡាករទាំង ៣ «Big Three» និងកីឡាករដទៃៗទៀតរបស់កីឡាវាយកូនបាល់នេះ។
ការឈ្នះរបស់ Nadal ជាមួយនឹងលទ្ធផលសឹងមិនគួរឱ្យជឿ ៦-០ ៦-២ និង ៧-៥ លើ Djokovic អំឡុងការប្រកួតនៅ Roland Garros វគ្គផ្ដាច់ព្រ័ត្រ កាលពីថ្ងៃអាទិត្យបានជួយឱ្យកីឡាករសញ្ជាតិអេស្ប៉ាញចូលរួមជាមួយកីឡាករស៊ែប៊ី ក្នុងការឈ្នះពានពីព្រឹត្តិការណ៍ធំៗជាច្រើនជាមួយនឹងរយៈពេល ៣ ទសវត្សរ៍ផ្សេងគ្នា។
Nadal វ័យ ៣៤ ឆ្នាំ និយាយថា រូបគេនឹងមិនរវល់គិតតែរឿងបញ្ចប់អាជីពរបស់ខ្លួនក្នុងនាមជាម្ចាស់ជយលាភីពាន Grand Slam ច្រើនជាងគេក្នុងកំណត់ត្រានោះឡើយ។
«ខ្ញុំចង់បញ្ចប់អាជីព នាមជាកីឡាករម្នាក់ដែលឈ្នះពាន Grand Slam ថែមទៀត»។ នេះជាសម្ដីរបស់កីឡាករលេខ ២ ពិភពលោកដែលបានលើកឡើង ក្រោយឈ្នះលើកទី ១០០ នៅ French Open ពោលគឺចាញ់តែ ២ ដងប៉ុណ្ណោះក្នុងរយៈពេល ១៥ ឆ្នាំនេះ។
ជើងឯកនៅក្រុងប៉ារីសច្រើនជាងគេបន្តថា៖ «តែខ្ញុំនឹងមិនអង្គុយគិតតែរឿងហ្នឹងទេ ដូចជា Djokovic ឈ្នះពាននេះ ហើយ Federer ឈ្នះពាននោះ។ មែន ខ្ញុំខ្វល់ពីកំណត់ត្រា។ សម្រាប់ខ្ញុំ វាមានន័យណាស់ដែលបានរួមតួលេខនេះ»។
ចំណែកកីឡាករស្វ៊ីស Federer ដែលខកខានមិនបានចូលរួមប្រកួតទាំង US Open និង Roland Garros នេះ ដោយសារវះកាត់ជង្គង់ ជឿថា រូបគេ និង Nadal គឺជាកត្តាជំរុញឱ្យគ្នាទៅវិញទៅមក ដើម្បីក្លាយជាកីឡាករឆ្នើម។ Nadal គឺជាជើងឯកនៅ Roland Garros ដែលមានវ័យចំណាស់ជាងគេបំផុត គិតតាំងពី Andres Gimeno ក្នុងឆ្នាំ ១៩៧២។
ក្នុងចំណោមកីឡាករកំពូលទាំង ៣ ឃើញថា Djokovic វ័យ ៣៣ ឆ្នាំគឺក្មេងជាងគេបំផុត ហើយបើទោះជាបរាជ័យនៅថ្ងៃអាទិត្យ ដែលធ្វើឱ្យគេបាត់បង់ឱកាសក្លាយជាអត្តពលិកទី ១ គិតតាំងពី Rod Laver កាលពីឆ្នាំ ១៩៦៩ ក្នុងការឈ្នះពានទាំង ៤ ព្រឹត្តិការណ៍ធំៗចំនួន ២ លើកក៏ដោយ ក៏គេជឿថាកំណត់ត្រា ២០ ដង អាចធ្វើបាន។
Djokovic បាននិយាយទៅកាន់បណ្ដាញសារព័ត៌មាននៅប្រទេសកំណើតថា៖ «ប្រសិនបើខ្ញុំគិតថា វាយឺតពេលហើយនោះ ខ្ញុំគួរតែឈប់វាយតិន្នីសថ្ងៃនេះតែម្ដង។ ខ្លួនខ្ញុំផ្ទាល់ Nadal និង Federer សុទ្ធតែធ្លាប់ជួបបញ្ហាជាច្រើនដងដូចគ្នា តែពួកយើងនៅតែអាចប្រសើរឡើងវិញបាន ហើយបានបង្ហាញឱ្យឃើញថា ពួកយើងនៅតែល្អជាងគេក្នុងលោកនេះ»៕ VN