.jpg)
សកម្មភាពប្រកួតអុកចត្រង្គ ដែលសហព័ន្ធកីឡាអុកចត្រង្គកម្ពុជា ធ្លាប់បានរៀបចំកន្លងមក។ ស្រេង ម៉េងស្រ៊ុន
ភ្នំពេញៈ សហព័ន្ធកីឡាអុកចត្រង្គកម្ពុជា បានបង្កើតឲ្យមានការប្រកួតលីកអុកចត្រង្គ លើកទី ១ ប្រចាំឆ្នាំ ២០១៨ ដែលចំណាយពេលដល់ ១៥ សប្តាហ៍ ហើយការប្រកួតនេះ បានចាប់ផ្តើមរៀងរាល់ថ្ងៃអាទិត្យ នៅតាមក្លិបមួយចំនួននៅរាជធានីភ្នំពេញ តាមកាលវិភាគ ដោយចាប់ផ្តើមប្រកួតតាំងពីថ្ងៃទី ១៥ ខែកញ្ញា នឹងគ្រោងបញ្ចប់ថ្ងៃ ៣០ ខែធ្នូ ដើម្បីសម្រិតសម្រាំងរកអ្នកឆ្នើមពិតប្រាកដឆ្ពោះទៅស៊ីហ្គេម លើកទី ៣២ ឆ្នាំ ២០២៣ ដែលត្រូវធ្វើនៅកម្ពុជា។
លោក គុជ គឹមឡុង ប្រធានសហព័ន្ធកីឡាអុកចត្រង្គកម្ពុជា ថ្លែងថា៖ «យើងចង់បង្កើតឲ្យមានព្រឹត្តិការណ៍ប្រកួតឲ្យបានច្រើន ដើម្បីពង្រឹងសមត្ថភាពកីឡាករយើង ជាបណ្តើរៗ ក្នុងគោលបំណងស្វែងរកអ្នកមានសមត្ថភាពខ្លាំងពិតប្រាកដ ត្រៀមឆ្ពោះទៅស៊ីហ្គេម ឆ្នាំ ២០២៣ ដែលកម្ពុជាធ្វើជាម្ចាស់ផ្ទះ»។
លោកបន្តថា៖ «បន្ថែមលើការប្រកួតថ្នាក់ជាតិនេះ សហព័ន្ធ នៅមានគម្រោង និងចក្ខុវិស័យក្នុងការចងក្រងឯកសារច្បាប់លក្ខខណ្ឌ នៃការប្រកួតជាភាសាខ្មែរ និងភាសាអង់គ្លេស បោះផ្សព្វផ្សាយទៅកាន់ប្រទេសមួយចំនួន ពិសេសក្នុងតំបន់ប្រទេសអាស៊ាន ដើម្បីឲ្យគេបានចេះលេង និងចូលរួមក្នុងព្រឹត្តិការណ៍ស៊ីហ្គេម នៅកម្ពុជានាពេលខាងមុខ»។
តាមលោក ឈាវ បូរ៉ា អគ្គលេខាធិការសហព័ន្ធកីឡាអុកចត្រង្គកម្ពុជា បានប្រាប់ភ្នំពេញប៉ុស្តិ៍ កាលពីថ្ងៃចន្ទថា ការប្រកួតលីកអុកចត្រង្គ ឆ្នាំ ២០១៨ នេះ មានក្លិបកីឡាអុកចត្រង្គចំនួន ៦ បានចូលរួម ចំណែកក្លិប ៦ ទៀត ដែលបានចុះឈ្មោះទទួលស្គាល់ដោយសហព័ន្ធរួចហើយ នៅឯខេត្តឆ្ងាយៗ មិនបានចូលរួមទេ ព្រោះការទ្រទ្រង់កម្មវិធីប្រកួតមានថវិកាកំណត់។
លោកបានបន្ថែមថា៖ «ចំពោះរូបមន្តប្រកួតលីកអុកចត្រង្គ ជាលើកទី ១ នេះ ស្រដៀងទៅនឹងលីកបាល់ទាត់ដែរ ហើយក្លិបកីឡាអុកចត្រង្គទាំង ៦ ដែលបានចូលរួមក្នុងការប្រកួតនេះ មានក្លិបសេះខៀវ, ប៊ូឌីង, អង្គរ, ទូកខ្មៅ, អស្សរិទ្ធ និងក្លិបស្តេចតោ ដែលសុទ្ធតែមានទីតាំងនៅក្នុងរាជធានីភ្នំពេញ»។
តាមរូបមន្តនៃការប្រកួតលីកអុកចត្រង្គនេះ គឺក្នុងក្លិបៗ មានកីឡាករ ៣ នាក់ចូលរួម ដោយត្រូវប្រកួតជម្រុះវិលជុំសន្សំពិន្ទុ ហើយកំណត់ចំណាត់ថ្នាក់តាមក្លិប។ ក្លិបចូលរួមទាំង ៦ នឹងត្រូវប្រកួតប្រជែងគ្នា វិញ្ញាសាឯកត្តជន ១ ទល់ ១ និងប្រកួតជាក្រុម ៣ នាក់ទល់ ៣ នាក់ រួចបូកសរុបលទ្ធផល កំណត់ចំណាត់ថ្នាក់តែម្តង ឯការប្រកួតថ្ងៃដំបូង គឺបានចាប់ផ្តើមពីក្លិបសេះខៀវ ដែលមានទីតាំងនៅជិតបុរីកីឡា។
ចំពោះប្រាក់រង្វាន់វិញ លោក គ្រួច ចន្ថារិទ្ធ មន្ត្រីគណៈកម្មការបច្ចេកទេសកីឡាអុកចត្រង្គកម្ពុជា បានប្រាប់ថា ក្រុមឬក្លិប ទទួលបានលេខ ១ នឹងទទួលបានប្រាក់រង្វាន់ចំនួន ១,៣ លានរៀល លេខ ២ បាន ៧០ ម៉ឺនរៀល និងលេខ ៣ បាន ៤០ ម៉ឺនរៀល ប៉ុន្តែប្រាក់រង្វាន់នេះមិនទាន់គិតពីប្រាក់ឧបត្ថម្ភរបស់សហព័ន្ធកីឡាអុកចត្រង្គកម្ពុជា ដែលកំពុងតែស្វះស្វែងរកការឧបត្ថម្ភនោះទេ។
ចំណែកលោក វ៉ាត់ ចំរើន អគ្គលេខាធិការ NOCC បានថ្លែងថា៖« NOCC គាំទ្រឲ្យមានការប្រកួតថ្នាក់ជាតិឲ្យបានច្រើន ព្រមទាំងជម្រើសអ្នកឆ្នើម ដើម្បីបំប៉នឲ្យក្លាយជាគ្រូបង្វឹកមួយចំនួន ដើម្បីទៅបង្ហាត់នៅប្រទេសនានាក្នុងអាស៊ាន ព្រោះប្រភេទកីឡាមួយ អាចដាក់ឲ្យប្រកួតក្នុងស៊ីហ្គេមបាន លុះត្រាតែមានការចូលរួមចាប់ពី ៤ ប្រទេសឡើងទៅ ទើបស្របតាមច្បាប់កីឡា និងមានចំណាត់ថ្នាក់សម្រាប់មេដាយបាន»៕
