.jpg)
អេលីត ចំរើន ត្រូវបានលើកដៃឲ្យឈ្នះទាំងមានរបួសភ្នែក។ រូប ពន្លក
ភ្នំពេញៈ អ្នកប្រដាល់ចិត្តធំ អេលីត ចំរើន (មុនឈ្មោះ ចាន់ ចំរើន) កំពុងមានទីផ្សារប្រកួតលក្ខណៈអន្តរជាតិកាន់តែច្រើន ព្រោះក្រោយបានផ្លាស់មកនៅក្លិបឆ្មាសសែនសុខគុនខ្មែរហើយឡើងឡើងប្រកួតបានជិត ២០ ដងនេះគឺចាញ់តិចបំផុត ពិសេសការប្រកួត ៥ ដងចុងក្រោយជាមួយកីឡាករបរទេសគឺគេបានថៃផ្តួលឲ្យសន្លប់ មិនឲ្យឆ្លងផុតទឹកទី ៥ នោះទេ។ លទ្ធផលល្អបែបនេះ បានធ្វើឲ្យសង្វៀនប្រដាល់ជាច្រើនចាប់អារម្មណ៍ និងចង់បាន អេលីត ចំរើន យកទៅប្រកួតរៀងៗខ្លួន។
សម្រាប់ការប្រកួតមិត្តភាពអន្តរជាតិនៅលើសង្វៀន SEATV កាលពីថ្ងៃអាទិត្យ អេលីត ចំរើន បានយកឈ្នះជើងខ្លាំងរបស់ថៃ Op Sai ដោយប្រើស្នៀតទាត់ផ្ទួនៗបណ្តាលឲ្យខូចដៃ និងបោះបង់ការប្រកួតត្រឹមចុងទឹកទី ២ ប៉ុណ្ណោះ។ នៅក្នុងទឹកទី ១ អេលីត ចំរើន វ៉ៃបានល្អ មានប្រៀបឈ្នះពិន្ទុថៃ Op Sai ដាច់ហើយឈានចូលដល់ទឹកទី ២ គេបានប្រើស្នៀតទាត់ឲ្យកីឡាករថៃរូបនេះខូចដៃ សុំចុះចាញ់តែម្តង។ ទោះបីជាយ៉ាងណា អេលីត ចំរើន បានទទួលរងនូវកណ្តាប់ដៃធ្ងន់ៗពី Op Sai បណ្តាលឲ្យហើមត្របកភ្នែកតាំងពីទឹកទី ១ មកផងដែរ។
តាមកំណត់ត្រាប្រកួតរបស់ អេលីត ចំរើន ដែលថ្មីៗបំផុតគឺប្រកួតអស់ពីសមត្ថភាព មានក្បាច់កណ្តាប់ដៃ ស្នៀតទាត់ និងជង្គង់បានគ្រប់ក្បាច់ ហើយការវ៉ៃបានយ៉ាងល្អនេះកំពុងតែធ្វើឲ្យរូបគេទទួលបានការគាំទ្រខ្លាំងពីមហាជនយ៉ាងខ្លាំងគឺមានប្រិយភាពជាកីឡាករជើងចាស់មួយចំនួនទៅទៀត។ ជាមួយគ្នានេះ គិតត្រឹម ៥ ប្រកួតចុងក្រោយ អេលីត ចំរើន បានឈ្នះកីឡាករថៃដែលខ្លាំងៗមានដូចជា Phousovan, Seksan និង Op Sai ជាដើម គឺសុទ្ធតែផ្តួលឲ្យបោះបង់ការប្រកួតមិនដល់ទឹកទី ៥។
លោក សន អេលីត ជាគ្រូបង្វឹកបាននិយាយថា៖ «ដោយការប្រកួតមានលក្ខណៈទាក់ទាញល្អនៅក្នុងខែកក្កដាឆ្នាំ ២០១៩ នេះ អេលីត ចំរើន ត្រូវបានសង្វៀនមួយចំនួនកក់ទុកសម្រាប់ប្រកួតរួចហើយចំនួន ៤ ប្រកួតឯណោះ ប៉ុន្តែដោយមានបទបញ្ជាថ្មីតាមសំណូមពររបស់គ្រូពេទ្យ ឲ្យកីឡាករប្រកួតត្រឹមចំនួន ២ លើកក្នុង ១ ខែនោះគឺ អេលីត ចំរើន ទទួលប្រកួត ២ កម្មវិធីទេ គឺ១ នៅសង្វៀន CNC នៅថ្ងៃទី ១៤ ខែកក្កដា និង ១ ទៀតនៅសង្វៀនអាស៊ីអាគ្នេយ៍នាថ្ងៃទី ២៨ ខែកក្កដា»។
គួររំឭកថា អេលីត ចំរើន ពីមុនធ្លាប់នៅក្លិបនិរោធមានជ័យរបស់លោកគ្រូ ចាន់ សុផល ដោយប្រើឈ្មោះ ចាន់ ចំរើន ធ្លាប់ឡើងប្រកួតជាមួយកីឡាករបរទេសយូរៗបានម្តង ប៉ុន្តែក្រោយពីលោក ចាន់ សុផល ស្លាប់ គេបានផ្លាស់មកនៅក្លិបឆ្មាសសែនសុខគុនខ្មែរ ជាមួយលោកគ្រូ សន អេលីត ហើយបានឡើងប្រកួតលក្ខណៈអន្តរជាតិចំនួន ១៨ លើក ចាញ់តែ ២ ដងប៉ុណ្ណោះ ហើយបច្ចុប្បន្នកំពុងតែមានទីផ្សារប្រកួតមមាញឹកដោយសារសង្វៀនប្រដាល់មួយចំនួនត្រូវការចង់បានបំផុត ចំណែកតម្លៃខ្លួនប្រកួតវិញ អេលីត ចំរើន អាចរកប្រាក់បាន ៣០០ ដុល្លារក្នុង ១ ប្រកួតផងដែរ។
ចំណែកការប្រកួតមិត្តភាពអន្តរជាតិមួយគូទៀតកីឡាករទម្ងន់ស្រាលរបស់កម្ពុជា ហ៊ីម គឹមរៀង មកពីក្លិបតាព្រហ្មមានជ័យដែលប្រកួតក្នុងទម្ងន់ ៥១ គីឡូក្រាមបានឈ្នះថៃ អ្នកប្រដាល់ថៃ Sun Chilek ដោយពិន្ទុ បន្ទាប់អ្នកទាំង ២ បានប្រកួតគ្នា ៥ ទឹកយ៉ាងស្វិតស្វាញ និងជក់ចិត្តនោះ៕
