ភ្នំពេញ៖ កីឡាករ អេលីត ចំរើន របស់ក្លិបឆ្មាសសែនសុខ បានវ៉ៃឲ្យជើងខ្លាំង ម៉ន សាម៉េត មកពីក្លិបកងចក្ររាជសីហ៍ ចាញ់ដោយអស់ចិត្ត និងបន្សល់នូវស្នាមបែកចំនួន ១៥ ថ្នេរ ដើម្បីគ្រងតំណែងជើងឯកខ្សែក្រវាត់ស្ថាប័ន KIC ចំណែក មាស សារ៉ាក់ របស់ក្លិបអាណាចក្រខ្មែរទទួលបានចំណាត់ថ្នាក់លេខ ៣ ជំនួសកីឡាករថៃ Lafan ត្រូវបានគណៈកម្មការរៀបចំប្រកួតដាក់ពិន័យ។
ការឡើងមកជួបគ្នារវាង អេលីត ចំរើន និង ម៉ន សាម៉េត នៅវគ្គផ្តាច់ព្រ័ត្រនេះ គឺមានការតាមដានខ្លាំងពីមហាជន ស្របពេលដែលសមត្ថភាពរបស់អ្នកទាំង ២ គឺជើងខ្លាំងជំនាន់មុន និងខ្លាំងជំនាន់ក្រោយ។ ទោះបីជាយ៉ាងណា អេលីត ចំរើន ដែលមានក្តីសង្ឃឹមឈ្នះតិច តាំងពីមុនពេលប្រកួតនោះបែរជាទទួលបានលទ្ធផលល្អ និងបានធ្វើឲ្យជើងចាស់ ម៉ន សាម៉េត បរាជ័យទាំងអស់ចិត្ត។
អេលីត ចំរើន បាននិយាយក្រោយការប្រកួតថា៖ «មុនពេលប្រកួត ខ្ញុំមិនសូវរំពឹងឈ្នះទេ ព្រោះសិស្សច្បង ម៉ន សាម៉េត មានបទពិសោធខ្ពស់ ហើយបច្ចេកទេសវ៉ៃរបស់ខ្ញុំ គិតថា ចាំវាយឆ្មក់កែង និងជង្គង់ព្រោះមិនហ៊ានវាយសម្រុកទៅលើដៃគូទេ។ ការសម្រេចចិត្តវ៉ៃរបៀបនេះ គឺខ្ញុំតាមដានវីដេអូប្រកួតរបស់បង ម៉ន សាម៉េត ច្រើនលើកណាស់ ដើម្បីទប់ទល់ និងយកឈ្នះគាត់ ហើយខ្ញុំក៏ទទួលបានលទ្ធផលល្អ»។
អេលីត ចំរើន បានបន្តថា៖ «ទោះជាយ៉ាងនេះក្តី ខ្ញុំចាត់ទុកបង ម៉ន សាម៉េត ជាកំពូលកីឡាករ ដែលលំបាកទប់ទល់ណាស់ ហើយអ្វីដែលខ្ញុំយកឈ្នះបាន គឺស្នៀតកែង និងជង្គង់ចាំស្រង់ចូលគោលដៅបានល្អ ព្រោះនៅក្នុងទឹកទី ២ ខ្ញុំវាយកែង និងជង្គង់ឲ្យអាជ្ញាកណ្តាលរាប់ទៅលើ ម៉ន សាម៉េត ដល់ ៨ នៅពេលនោះខ្ញុំបានគិត និងមើលឃើញថា ខ្ញុំនឹងទទួលបានខ្សែក្រវាត់»។
ចំណែក ម៉ន សាម៉េត បាននិយាយក្រោយពេលប្រកួតចាញ់ថា៖ «ខ្ញុំចាញ់ដោយអស់ចិត្តហើយ ខ្ញុំប្រឹងអស់ពីសមត្ថភាព តែមិនអាចផ្តួល ចំរើន ឲ្យសន្លប់បាន។ មូលហេតុដែលខ្ញុំចាញ់ គឺភ្លាត់ស្នៀតចូលកែង ក្នុងទឹកទី ២ ក្នុងពេលដែលខ្ញុំចូលកៀក ហើយបន្ទាប់មក ចំរើន បានសម្រុកវាយសន្ធាប់ភ្លាមៗ ធ្វើឲ្យខ្ញុំស្រុតកម្លាំង។ ទោះបីជាយ៉ាងណា នៅ ៣ ទឹកចុងក្រោយ ខ្ញុំធ្វើបានល្អ គឺវាយបកវិញ ធ្វើឲ្យគេវង្វេងវង្វាន់ម្តងៗដែរ»។
ម៉ន សាម៉េត បន្ថែមថា៖ «ផ្លូវឈ្នះ របស់ខ្ញុំ គឺត្រូវវ៉ៃ ចំរើន ឲ្យសន្លប់ ប៉ុន្តែពេលវេលាកាន់តែខ្លី ហើយគេឆ្លាតផង ដោយភាគច្រើន ដកថយ។ បន្ថែមលើនេះពេលដែលខ្ញុំចាប់ជាប់ ត្រៀមឡើងជង្គង់ អាជ្ញាកណ្តាលតែងតែព្យាយាមបំបែកភ្លាមៗ ធ្វើឲ្យខ្ញុំកាន់តែមិនអាចផ្តួលគេឲ្យសន្លប់បាន។ ទោះបីយ៉ាងណា ការចាញ់នេះ គឺខ្ញុំអស់ចិត្តហើយបើមានជួបប្រកួតគ្នាសងសឹកលើកក្រោយ ធានាឈ្នះវិញបាន»។
តាមរយៈការឈ្នះខ្សែក្រវាត់នេះ អេលីត ចំរើន ទទួលបានប្រាក់រង្វាន់ ៤ ០០០ ដុល្លារ ខណៈអ្នកលេខ ២ ម៉ន សាម៉េត បានប្រាក់ ២ ០០០ ដុល្លារ។ ចំណែក មាស សារ៉ាក់ ដែលបានឡើងប្រកួតដណ្តើមយកលេខ ៣ និងលេខ ៤ ជំនួសកីឡាករថៃ Lafan ដែលត្រូវបានពិន័យមិនឲ្យឡើងប្រកួត ព្រោះល្មើសច្បាប់ប្រកួតនោះ គឺបានឈ្នះពិន្ទុថៃ Neong Thavat ដោយពិន្ទុដៃ ដើម្បីទទួលបានប្រាក់រង្វាន់ ១ ពាន់ដុល្លារ ឯអ្នកលេខ ៤ របស់ថៃ Neong Thavat បាន ៥០០ ដុល្លារ។
លោក ភួង ពុទ្ធិ នាយកគ្រប់គ្រងទីផ្សារប្រចាំទូរទស្សន៍ Sky One នៃសង្វៀន One TV បាននិយាយថា៖ «ព្រឹត្តិការណ៍ប្រកួតរដូវកាលទី ១ នៃស្ថាប័ន KIC បានបញ្ចប់ក្នុងបទពិសោធល្អ ហើយយើងនឹងត្រៀមបើករដូវកាលទី ២ បន្តបន្ទាប់ ព្រោះយើងកំពុងត្រៀមសហការជាមួយដៃគូផ្សេងៗ ដើម្បីបម្រើទស្សនិកជនឲ្យបានល្អរៀបចំឲ្យកាន់តែល្អ»។
លោកភួង ពុទ្ធិ បន្ថែមថា៖ «សម្រាប់ការប្រកួតនៅរដូវកាលទី ២ យើងនឹងត្រៀមនូវយុទ្ធសាស្ត្រថ្មី គូប្រកួតមានកម្រិតល្អជាងនេះ និងមានទីតាំងល្អ ប្រសើរ សមស្របទៅនឹងការចង់បានរបស់មហាជនទូទៅ ដើម្បីឲ្យកម្មវិធីទទួលបានលទ្ធផលកាន់តែល្អ»៕