ភ្នំពេញៈ អតីតកីឡា្កករមានជំនាញទាំងប្រដាល់ និងតេក្វាន់ដូ ស៊ន អេលីត ដែលជាបងប្រុសរបស់វីរកីឡាការិនីតេក្វាន់ដូ ស៊ន សៀវម៉ី និង ស៊ន ដាវីន បានបង្ហាញការជឿជាក់ថា សិស្សរបស់ខ្លួន សុខ សាវិន នឹងយកឈ្នះថៃ Phat Chhayak Phum ក្នុងការប្រកួតជម្រុះសន្សំពិន្ទុលើកទី ២ ដណ្តើមខ្សែក្រវាត់ខារ៉ាបាវ ទម្ងន់ ៦០ គ.ក្រ នៅលើសង្វៀន SEATV ល្ងាចថ្ងៃសៅរ៍ តែលោក ហេង ប៊ុនឃីម ហាក់មិនសូវជឿជាក់លើកូនប្រុសលោក ឃីម បូរ៉ា ប៉ុន្មានទេ។
លោក ស៊ន អេលីត បានប្រាប់កាលពីម្សិលមិញថា៖ «មានមតិភាគច្រើនគេនិយាយថា កីឡាករថៃ Phat Chayak Phum ខ្លាំង រឹងមាំ ហើយ សាវិន មិនអាចទៅរួចទេ ប៉ុន្តែសម្រាប់ខ្ញុំគិតថា សាវិន មានភាគរយខ្ពស់បំផុត ក្នុងការយកឈ្នះថៃរូបនេះ ព្រោះខ្ញុំខំបង្វឹកគេដោយផ្ទាល់ដៃ និងដឹងពីសមត្ថភាពពិតរបស់គេកំពុងល្អ»។
អេលីត បានបន្តថា៖ «សុខ សាវិន ឥឡូវគឺល្អជាងមុនឆ្ងាយណាស់ ទាំងស្នៀតជង្គង់ និងកែង។ តាំងពី សាវិន មកនៅក្នុងក្លិបរបស់ខ្ញុំ គឺប្រកួត ១០ ដង ឈ្នះទាំង ១០ ក្នុងនោះផ្តួលដៃគូឲ្យសន្លប់ ៧ ដង គឺឈ្នះកីឡាករខ្មែ ២ នាក់ មាន តាំង សីហា និង សុខ សុវណ្ណ និងឈ្នះកីឡាករថៃចំនួន ៧ នាក់ទៀត ហើយការប្រកួតនេះ ទោះជាថៃខ្លាំងក៏ខ្ញុំជាគ្រូបង្វឹកសង្ឃឹមឈ្នះដល់ទៅ ៨០ ភាគរយដែរ»។
សម្រាប់ការប្រកួតជុំទី ១ កន្លងមក សុខ សាវិន បានផ្តួលជើងខ្លាំងថៃ Phat Maha ឲ្យសន្លប់ធំត្រឹមទឹកទី ២ ប៉ុណ្ណោះ និងកំពុងមាន ៣ ពិន្ទុក្នុងដៃ ព្រមទាំងឈរលំដាប់ពីលើគេនៅក្នុងពូលកម្ពុជា។ ប៉ុន្តែការជួប Phat Chayak Phum លើកនេះ វាជាការប្រកួតដ៏តឹងតែងរបស់ សុខ វាសនា ព្រោះសមត្ថភាពកីឡាករថៃរូបនេះខ្លាំង និងរឹងមាំ ព្រមទាំងមានស្នៀតទាត់ធ្ងន់ ធ្លាប់មកប្រកួត ភាគច្រើនឈ្នះកីឡាករកម្ពុជា។
ចំណែកគូខ្សែក្រវាត់ ១ គូទៀត គឺ ឃីម បូរ៉ា ត្រូវប៉ះថៃ Phat Maha។ បើទោះបីជា កីឡាករ ធ្លាប់ប្រកួតត្រឹម ៥៨ ដង ឈ្នះ ៥០ ចាញ់ ៨ ដង Phat Maha បានសន្លប់ក្រោមស្នាដៃ សុខ សាវិន ប៉ុន្តែ ឃីម បូរ៉ា ដែលធ្លាប់ប្រកួត ១០ ៩ដង ឈ្នះ ៨៩ ចាញ់ ២៨ និងស្មើ ២ ដង ហាក់មិនទទួលបានការជឿជាក់ពីឪពុករបស់ខ្លួនប៉ុន្មានឡើយ។
លោក ហេង ប៊ុនឃីម ជាឪពុកបង្កើត និងជាគ្រូបង្វឹក ឃីម បូរ៉ា ប្រាប់ថា៖ «ខ្ញុំមិនសង្ឃឹមច្រើនទេ ព្រោះ បូរ៉ា ឥឡូវខ្សោយកម្លាំងជាងមុន ប៉ុន្តែធានាវ៉ៃអស់ពីសមត្ថភាព»។
លោកបន្តថា៖ «ខ្ញុំមានទំនុកចិត្តឈ្នះ នៅក្នុងអំឡុងការប្រកួត ៣ ទឹកដំបូង ប៉ុន្តែបើការប្រកួតអូសបន្លាយចូលដល់ទឹកទី ៤ ឬទី ៥ គឺលំបាកសន្និដ្ឋាន ឬវាយតម្លៃដែរ ព្រោះយើងអាចចាញ់កម្លាំងគេ»។
ទោះជាយ៉ាងណាលោក ប៊ុនឃីម បានបង្ហើបថា មិនអីទេ ព្រោះ បូរ៉ា ខំហ្វឹកហាត់ និងរក្សាសុខភាពបានល្អ ធានាប្រកួតឲ្យល្អ ហើយអ្វីដែលសំខាន់ យើងសង្ឃឹមមានប្រៀបជាងផ្នែកក្បាច់កែង និងឱបឡើងវ៉ៃជង្គង់នេះតែម្តង។
គួររំឭកថា ការប្រកួតកន្លងមកនេះ ឃីម បូរ៉ា បានឈ្នះថៃ Phat Chayak Phum ចំណែក លី ភា ឈ្នះថៃ Phat Ngenthong ខណៈ សូត្រ ប៊ុនធី ឈ្នះ Phat Thana ហើយលទ្ធផលនេះ បានបង្ហាញឲ្យឃើញថា ការប្រកួត ២ លើកកន្លងមកនេះ បេក្ខភាពទាំង ៤ នាក់របស់កម្ពុជា ឈ្នះបាន ៣ ពិន្ទុដូចគ្នា ធ្វើឲ្យកីឡាករថៃទាំង ៤ នៅមិនទាន់រកឃើញការឈ្នះនៅឡើយទេ៕