.jpg)
អេលីត ភក្តី ព្យាយាមទប់ការទាត់របស់ គង់ សំបូរ នៅមុនពេលចៅក្រម ផ្តល់ពិន្ទុឱ្យឈ្នះមិនឯកច្ឆន្ទ។ សហការី
ភ្នំពេញ៖ អ្នកប្រដាល់ ថាប់ ភក្តី ដែលគេស្គាល់ថា ជា អេលីត ភក្តី របស់ក្លិបនាយកដ្ឋានអង្គរក្សក្រសួងមហាផ្ទៃនោះ បានរកឃើញជោគជ័យយ៉ាងសំខាន់របស់ខ្លួនហើយ គឺការយកឈ្នះលើជើងខ្លាំង គង់ សំបូរ នៅវគ្គផ្តាច់ព្រ័ត្រ ដើម្បីឈ្នះបានប្រាក់រង្វាន់ធំ លើកទី១ សម្រាប់ការចូលប្រឡូកនៅក្នុងវិស័យកីឡាប្រដាល់គុនខ្មែរអស់រយៈពេល ១០ ឆ្នាំកន្លងមកនេះ។
សម្រាប់ការប្រកួតដណ្តើមប្រាក់លាននៅលើសង្វៀនថោន កាលពីថ្ងៃអាទិត្យ កន្លងមកនេះ អេលីត ភក្តី បានយកឈ្នះ ធី វ៉ារិទ្ធ ក្នុងការប្រកួតជម្រុះ ៣ ទឹក ដោយពិន្ទុជាឯកច្ឆន្ទ ៥-០ ដើម្បីឡើងទៅជួប គង់ សំបូរ ដែលបានទម្លាក់ សោម ពិសិដ្ឋ ហើយបន្ទាប់ពីការប្រកួតផ្តាច់ព្រ័ត្រ ដែលមាន ៣ ទឹកដែរនោះ អេលីត ភក្តី ត្រូវបានចៅក្រមទាំង ៥ រូប ផ្តល់ពិន្ទុឱ្យឈ្នះ គង់ សំបូរ មិនឯកច្ឆន្ទ ៣-២។
ការឈ្នះ គង់ សំបូរ នៅក្នុងវគ្គដ៏សំខាន់នេះ វាបានជួយឱ្យ អេលីត ភក្តី សម្រេចការសងសឹកចំពោះការចាញ់ គង់ សំបូរ ចំនួន ៣ លើកកន្លងមក ហើយវាក៏ជាពេលដែលរូបគេ ឈ្នះបានប្រាក់រង្វាន់ធំ ចំនួន ៣,៤ លានរៀល ជាលើកដំបូងផងដែរ ខណៈក្នុងប្រវត្តិប្រកួត ៦៥ ដង ឈ្នះ ៥២ ចាញ់ ១០ និងស្មើ ៣ ដង ដោយផ្តួលដៃគូឱ្យសន្លប់បានចំនួន ១៧ ដងកន្លងមកនេះ អេលីត ភក្តី ធ្លាប់ចូលរួមប្រកួតដណ្តើមខ្សែក្រវាត់ស្រាបៀរកម្ពុជា តែម្តងគត់ និងបានចាញ់នៅវគ្គពាក់កណ្តាលផ្តាច់ព្រ័ត្រ។
ក្រោយទទួលបានជយលាភីជាប្រាក់រង្វាន់ ៣,៤ លានរៀលនេះ អេលីត ភក្តី បានប្រាប់ថា៖ «នេះជាប្រាក់រង្វាន់ធំ សម្រាប់អាជីពប្រដាល់ជិត ១០ ឆ្នាំរបស់ខ្ញុំ ព្រោះប្រាក់រង្វាន់ចំនួន ៣,៤ លានរៀលនេះ ជាលើកទី១ ដែលខ្ញុំទទួលបាន ហើយវាស្របពេលដែលខ្ញុំកំពុងខ្វះខាតសម្រាប់ភរិយារបស់ខ្ញុំកូនខ្ចី អ៊ីចឹងវាបានជួយខ្ញុំសម្រាប់កូនប្រពន្ធ ហេតុនេះខ្ញុំមានការត្រេកអររកអ្វីប្រៀបផ្ទឹមមិនបានទេ»។
អេលីត ភក្តី បានប្រាប់បន្ថែមថា៖ «ខ្ញុំជាកូនកំព្រា ដោយសារឪពុក និងម្តាយខ្ញុំបានបែកផ្លូវគ្នា ហើយខ្ញុំបានទៅរស់នៅជាមួយជីដូនចាស់ និងបានខ្ញុំធំដឹងក្តី នៅក្នុងបុរីកីឡា សង្កាត់វាលវង់ បន្ទាប់មក ខ្ញុំបានចូលប្រឡូកក្នុងសកម្មភាពហ្វឹកហាត់ ដើម្បីឡើងប្រកួតយកប្រាក់ចិញ្ចឹមជីវិត ជាមុខរបរ រហូតដល់បច្ចុប្បន្ន។ ទោះបីជា ខ្ញុំមិនទាន់មានផ្ទះខ្លួនឯង ប៉ុន្តែរស់នៅមិនជួលផ្ទះគេទេ ដោយលោកគ្រូបង្វឹកខ្ញុំ អនុញ្ញាតឱ្យរស់នៅក្នុងក្លិបផ្ទាល់តែម្តង»។
កីឡាករ អេលីត ភក្តី បានរៀបការតាំងពីដើមឆ្នាំ ២០២០ ហើយបច្ចុប្បន្នប្រពន្ធរបស់ ភក្តី កំពុងមានកូនខ្ចី ហើយក៏កំពុងនឹងត្រៀមចូលរៀនមហាវិទ្យាល័យផងដែរ។ រំឭកពីជីវិតក្នុងអាជីពប្រដាល់ជិត ១០ ឆ្នាំនេះ អេលីត ភក្តី បញ្ជាក់ថា៖ «មិនដែលធ្លាប់ទទួលបានប្រាក់រង្វាន់ច្រើនដូចពេលនេះនោះទេ ខណៈដែលតម្លៃខ្លួនប្រកួតរបស់ខ្ញុំច្រើនបំផុត បានត្រឹម ៣៥០ ដុល្លារ ក្នុង ១ លើក។ ខ្ញុំធ្លាប់ចូលប្រកួតដណ្តើមខ្សែក្រវាត់តែម្តងគត់នៅសង្វៀន CNC ហើយបានឈានចូលដល់វគ្គពាក់កណ្តាលផ្តាច់ព្រ័ត្រ និងបានចាញ់កីឡាករ សេក គឹមរួន ក្នុងប្រភេទទម្ងន់ ៦៣,៥ គីឡូក្រាម»។
បើទោះបីជាខ្លួនជាក្មេងកំព្រា និងរស់នៅជាមួយជីដូនតាំងពីនៅតូច ហើយបានចាប់យកប្រដាល់ ដើម្បីរកប្រាក់ចិញ្ចឹមជីវីត ប៉ុន្តែកីឡាករមានអាយុ ២៣ ឆ្នាំ កម្ពស់ ១,៧០ ម៉ែត្រ អេលីត ភក្តី មិនដែលបានត្អូញត្អែរពីជីវភាពដូចកីឡាករមួយចំនួននោះទេ។ ភក្តី បាននិយាយថា៖ «ក្នុង ១ ខែ ខ្ញុំអាចឡើងប្រកួតបាន ២ លើក តាមកិច្ចសន្យាចាប់គូបានជាមួយសង្វៀនផ្សេងៗ ប៉ុន្តែក្នុងករណីមានកីឡាករអវត្តមាន ឬឈឺ គឺខ្ញុំទទួលប្រកួតជំនួសបាន ចំណែកប្រាក់ចំណូលបានពីប្រដាល់ គឺអាចទប់ទល់ជីវភាពបានតាមលក្ខណៈសាមញ្ញ»៕
