.jpg)
ក្រុងកៀវ: ១ គ្រាប់របស់កីឡាករបម្រុង Viktor Tsygankov ជួយឱ្យក្រុមជម្រើសជាតិអ៊ុយក្រែនឈ្នះ ១-០ លើអេស្ប៉ាញ ទាំងមិនគួរឱ្យជឿ នៅផ្ទះខ្លួនឯង អំឡុងការប្រកួតទី ៤ ក្នុងកម្មវិធី Nations League នាក្រុងកៀវ កាលពីថ្ងៃអង្គារ។
កីឡាករវ័យ ២២ ឆ្នាំ របស់ក្រុម Dynamo Kiev ត្រូវបានគ្រូបង្វឹករបស់អ៊ុយក្រែនលោក Andriy Shevchenko ដាក់ឱ្យលេងមិនប៉ុន្មាននាទីផង ក៏មានឱកាសទទួលបានបាល់បោះទម្លុះរបស់ Andriy Yarmolenko ហើយស៊ុតផុតដៃអ្នកចាំទី David de Gea ដែលឡើងជ្រុល បញ្ចូលទីបានយ៉ាងល្អនៅនាទីទី៧៦។
វាជាលទ្ធផលគួរឱ្យភ្ញាក់ផ្អើល ក្រោយអេស្ប៉ាញដែលមិនចាញ់តាំងពីខែវិច្ឆិកា ឆ្នាំ ២០១៨ មក បានយកឈ្នះ ៤-០ ពេលក្រុមទាំង ២ ជួបគ្នានៅក្រុងម៉ាឌ្រីដ កាលពីខែមុន ហើយអ៊ុយក្រែនឥឡូវនេះ តាមក្រុមរបស់លោក Luis Enrique តែ ១ ពិន្ទុ ក្នុងគ្រុបទី៤ នៅ League A។
ជាមួយនឹងការប្រកួតនៅសល់តែ ២ លើកទៀត ក្រុមអេស្ប៉ាញ កំពុងឈរទីកំពូលតារាង ដោយមាន ៧ ពិន្ទុ ពោលគឺមាន ១ ពិន្ទុ នាំមុខក្រុមលេខ ២ អាល្លឺម៉ង់ និងលេខ ៣ អ៊ុយក្រែន ខណៈស្វ៊ីស នៅបាតតារាងមាន ២ ពិន្ទុ។
វាជាការវិលត្រឡប់គួរឱ្យខកចិត្តសម្រាប់ប្រទេសអេស្ប៉ាញ មកកាន់កីឡដ្ឋាន ដែលពួកគេបានបំបាក់អ៊ីតាលី ៤-០ កាលពីព្រឹត្តិការណ៍ Euro 2012 ក្នុងវគ្គផ្ដាច់ព្រ័ត្រ ខណៈក្រុមមានរហស្សនាមថា «គោជល់» បំប៉ោងសំណាញ់ទីបានតែ ១ គ្រាប់គត់ សម្រាប់ការប្រកួត ៣ លើកចុងក្រោយ ក្នុងខែនេះ។
ដោយត្រូវរិះគន់ជាញឹកញាប់ពីទម្រង់របស់ខ្លួន ពេលឈរចាំបង្គោលទីឱ្យក្រុម Manchester United កីឡាករ De Gea នឹងត្រូវប្រឈមការពិចារណាពីតំណែងរបស់គេនាពេលនេះ ក្នុងក្រុមជម្រើសជាតិ ហើយការប៉ះអាល្លឺម៉ង់ ខែក្រោយក្នុងផ្ទះខ្លួនឯង គឺសំខាន់ណាស់ ព្រោះវាអាចសម្រេចថា ក្រុមណាបានឆ្លងទៅវគ្គ ៤ ក្រុមចុងក្រោយ។
តែលោក Enrique មិនយល់ស្របនឹងការរិះគន់នេះ ដោយនិយាយទៅកាន់អ្នកសារព័ត៌មានថា៖ «អ្នកអាចនិយាយអ្វីច្រើនជាងនេះក៏បាន តែការបន្ទោស De Gea គឺជាមារយាទមិនល្អស្រេចទៅហើយ។ ប្រសិនបើ De Gea ត្រូវបានស្ដីបន្ទោស សម្រាប់ការប្រកួតដូចនេះ បិទម៉ៃក្រូហ្វូន ហើយពួកយើងបែកគ្នាតែម្ដង»៕ AFP/VN
