ក្រុងប៉ារីស៖ Ferran Torres ធ្វើបានហ៊ែតទ្រីក (ស៊ុត ៣ គ្រាប់) ពេលក្រុមអេស្ប៉ាញផ្ដល់មេរៀនយ៉ាងជូរចត់ដល់អាល្លឺម៉ង់ឱ្យជួបនូវបរាជ័យដ៏សែនអាម៉ាស់លើកដំបូង ក្នុងរយៈពេល ៨៩ ឆ្នាំ ដោយបំបាក់ក្នុងលទ្ធផល ៦-០ អំឡុងការប្រកួតនាក្រុង Seville កាលពីថ្ងៃអង្គារ ហើយលទ្ធផលនេះ ធ្វើឱ្យក្រុមរបស់លោក Luis Enrique ចូលរួមជាមួយក្រុមបារាំងឡើងទៅជុំចុងក្រោយនៃកម្មវិធី UEFA Nations League។
ខ្សែបម្រើប្រយុទ្ធ Torres របស់ក្រុម Manchester City រូបនេះ គឺទទួលបានការចាប់អារម្មណ៍ជាងគេសម្រាប់ក្រុមអេស្ប៉ាញ ដែលលេងបានយ៉ាងល្អ ខណៈអាល្លឺម៉ង់យ៉ាប់មែនទែន ហើយក្រោយប្រកួតនេះ ធ្វើឱ្យមានចម្ងល់ជាច្រើនចំពោះអនាគតរបស់គ្រូបង្វឹកអាល្លឺម៉ង់លោក Joachim Loew ដែលមានសម្ពាធរួចហើយ មុនប្រកួតនេះចាប់ផ្ដើម។
«នេះជាថ្ងៃដ៏ខ្មៅងងឹតសម្រាប់ពួកយើង»។ នេះជាសម្ដីរបស់លោក Loew ក្រោយអាល្លឺម៉ង់ចាញ់យ៉ាងដំណំលើកទី១ គិតតាំងពីបរាជ័យក្រោមថ្វីជើងក្រុមអូទ្រីស ក្នុងលទ្ធផលបែបហ្នឹងកាលពីឆ្នាំ ១៩៣១។
អាល្លឺម៉ង់ចាប់ផ្ដើមធ្វើការប្រកួតចុងក្រោយ ដោយឈរទីកំពូលក្នុងគ្រុបទី៤ នៃលីគ A ពោលគឺនាំមុខអេស្ប៉ាញ ១ ពិន្ទុ ដូច្នេះ ពួកគេត្រឹមតែស្មើសម្រាប់ប្រកួតនៅកីឡដ្ឋាន La Cartuja នោះនឹងបានឆ្លងទៅជុំចុងក្រោយនៃព្រឹត្តិការណ៍នៅខែតុលា ឆ្នាំក្រោយបានហើយ។
តែក្ដីសង្ឃឹមរបស់អាល្លឺម៉ង់ត្រូវបាត់បង់ ពេល Alvaro Morata, Torres, Rodri និង Mikel Oyarzabal រួមគ្នាបំប៉ោងសំណាញ់ទី ទាំងវគ្គទី១ និងទី២ រហូតដល់ទៅ ៦ គ្រាប់ ខណៈចំនួនគ្រាប់បាល់ហ្នឹង បង្ហាញថា តំបន់ការពារនៅតែជាបញ្ហាធំរបស់អាល្លឺម៉ង់។
ពេលនេះអាល្លឺម៉ង់ មានពេលជាច្រើនខែ ដើម្បីរៀនសូត្រពីបរាជ័យដ៏ធ្ងន់នេះ មុនចាប់ផ្ដើមយុទ្ធនាការវគ្គជម្រុះ World Cup 2022 នៅខែមីនា ហើយបន្ទាប់មកព្រឹត្តិការណ៍ Euro 2020 ដែលត្រូវលើកទៅខែមិថុនា និងកក្កដា ឆ្នាំក្រោយ។
ក្នុងពេលជាមួយគ្នា អេស្ប៉ាញក្លាយជាក្រុមទី២ ដែលបានឡើងទៅជុំចុងក្រោយនៃកម្មវិធី Nations League បន្ទាប់បារាំង ដណ្ដើមបានកៅអីនេះ ដោយការយកឈ្នះក្រុមជើងឯកចាស់ព័រទុយហ្គាល់កាលចុងសប្ដាហ៍កន្លងមក។
គ្រូបង្វឹកអេស្ប៉ាញ លោក Enrique ប្រាប់ថា៖ «វាជាការប្រកួតមួយ ក្នុងចំណោមការប្រកួតសម្បូរបែប និងល្អបំផុតរបស់ក្រុមអេស្ប៉ាញ»។
សម្រាប់ក្រុមបារាំងឯណោះវិញ ទោះជាបានឡើងទៅជុំចុងក្រោយហើយយ៉ាងណាក្ដី ក៏មិនបានបន្ធូរជើងឱ្យស៊ុយអែតដែរ ដោយប្រឹងប្រែងវាយបកពីការនាំមុខរបស់ក្រុមគូប្រជែង រហូតដណ្ដើមបានជ័យជម្នះ ៤-២ ខណៈកីឡាករ Olivier Giroud លេចធ្លោជាមួយនឹងការបន្តធ្វើកំណត់ត្រាស៊ុតបញ្ចូលទីក្នុងក្រុមជម្រើសជាតិ។
ទោះមានវ័យ ៣៤ ឆ្នាំក្ដី តែខ្សែប្រយុទ្ធរបស់ក្រុម Chelsea នៅតែជាកីឡាករសំខាន់របស់បារាំង ហើយសម្រាប់ប្រកួតចុងក្រោយនៅកីឡដ្ឋាន Stade de France ក្នុងគ្រុបទី៣ លីគ A នេះ រូបគេរកបាន ២ គ្រាប់បន្ថែមពីលើគ្រាប់បាល់របស់ Benjamin Pavard និង Kingsley Coman។
ឥឡូវនេះ Giroud មាន ៤៤ គ្រាប់ ក្នុងកំណត់ត្រារបស់ក្រុម រហស្សនាម «Les Bleus» ដោយនៅពីលើអតីតកីឡាករ លោក Michel Platini ដែលមាន ៤១ គ្រាប់ និងពីក្រោមកីឡាករចូលនិវត្តន៍ Thierry Henry ដែលរកបានច្រើនជាងគេ ៥១ គ្រាប់៕ AFP/VN