.jpg)
ម៉ឺន មេឃា ត្រូវប្រកួតផ្តាច់ព្រ័ត្រដណ្តើមខ្សែក្រវាត់ជាមួយជើងខ្លាំងថៃ Link Loom នៅថ្ងៃសៅរ៍។ សហការី
ភ្នំពេញ៖ អតីតកីឡាករជើងខ្លាំង អេ ភូថង ដែលកំពុងមានជំងឺជាប់ខ្លួន ហើយបានប្រើឈើច្រត់សម្រាប់ជំនួយដល់ការដើរយឺតៗនោះ មានការជឿជាក់ថា ម៉ឺន មេឃា កូនប្រុសបង្កើតរបស់លោកបានត្រៀមខ្លួនរួចរាល់អស់ហើយ ដើម្បីឡើងប្រកួតជាមួយជើងខ្លាំងរបស់ថៃ Link Loom វគ្គផ្តាច់ព្រ័ត្រដណ្តើមយកខ្សែក្រវាត់ និងប្រាក់រង្វាន់ ៦ ០០០ ដុល្លារ នៅលើសង្វៀន CNC នាព្រឹកថ្ងៃសៅរ៍នេះ។
បើទោះបីជាមួយរយៈពេលនេះ អេ ភូថង មិនបានចូលរួមបង្វឹក ម៉ឺន មេឃា ដោយផ្ទាល់ដៃ ព្រោះលោកមានជំងឺជាប់ខ្លួន ប៉ុន្តែអតីតជើងខ្លាំងគ្មានគូប្រៀបប្រចាំនៅកម្ពុជារូបនេះ បានប្រាប់ភ្នំពេញប៉ុស្តិ៍ កាលពីព្រឹកថ្ងៃព្រហស្បតិ៍ថា៖ «បើទោះបីជា ខ្ញុំមិនបានទៅមើល និងបង្វឹកដោយផ្ទាល់ក្ដី ប៉ុន្តែ មេឃា បានហាត់ជាមួយពូរបស់គេ និងសិស្សច្បង ២ នាក់ទៀត អ៊ីចឹង មេឃា បានត្រៀមខ្លួនល្អហើយ»។
នៅមុនការឡើងមកជួបគ្នា នៅវគ្គផ្តាច់ព្រ័ត្រ ដើម្បីដណ្តើមយកខ្សែក្រវាត់ អមជាមួយប្រាក់ ៦ ០០០ ដុល្លារ សម្រាប់អ្នកលេខ ១ និង ៣ ០០០ ដុល្លារ សម្រាប់អ្នកចាញ់នេះ មេឃា និង Link Loom សុទ្ធតែបានបង្ហាញភាពខ្លាំងរៀងៗខ្លួន គឺការឈ្នះទាំង ៣ ប្រកួតជាប់គ្នា ដើម្បីទទួលបានលេខ ១ ប្រចាំក្រុមទី ១ និងក្រុមទី ២។
ការប្រកួតផ្តាច់ព្រ័ត្រប្រចាំក្រុមទាំង ២ កន្លងមកនេះ ជើងខ្លាំងវ័យក្មេង ម៉ឺន មេឃា បានយកឈ្នះថៃ Phit Nam Ek ដោយពិន្ទុ ដើម្បីក្លាយជាម្ចាស់ជើងឯកប្រចាំក្រុមទី ១ ចំណែក Link Loom បានឈ្នះ លន បញ្ញា ដោយពិន្ទុដាច់ ដើម្បីក្លាយជាម្ចាស់ជើងឯកប្រចាំក្រុមទី ២ ហើយជ័យជម្នះនោះ បានជួយឲ្យអ្នកទាំង ២ នេះ ទទួលបានប្រាក់រង្វាន់ ៥០០ ដុល្លារ និងម៉ូតូ Zoomer X ១ គ្រឿង ដូចគ្នា។
នៅក្នុងការប្រកួតនោះដែរ Link Loom ក៏បានវាយកែងបណ្តាលឲ្យ លន បញ្ញា ស្ទើរតែសន្លប់ធំ ដែលត្រូវលោកអាជ្ញាកណ្តាលរាប់នៅទឹកទី ២ ផងដែរ ហើយជើងខ្លាំងម្នាក់នេះ បាននិយាយក្រោយឈ្នះពិន្ទុ លន បញ្ញា ថា៖ «សម្រាប់ការត្រៀមទៅប្រកួតវគ្គផ្តាច់ព្រ័ត្រ ដណ្តើមយកខ្សែក្រវាត់ ខ្ញុំនឹងប្រឹងប្រែងហ្វឹកហាត់ឲ្យបានខ្លាំងជាងនេះទៀត និងប្រឹងប្រែងដណ្តើមយកជើងឯកឲ្យបាន»។
យ៉ាងណាក៏ដោយ នៅពេលរំឭកទៅដល់ការប្រកួតរបស់ Link Loom និង លន បញ្ញា លោក អេ ភូថង បានធ្វើការប្រៀបធៀប និងបញ្ជាក់យ៉ាងដូច្នេះថា៖ «ខ្ញុំទុកចិត្តលើកូនរបស់ខ្ញុំ ព្រោះគេមានផ្លែវ៉ៃច្រើនជាង លន បញ្ញា។ បញ្ញា មាន តែ ១ ផ្លែទេ គឺវ៉ៃជង្គង់ ចំណែក ម៉ឺន មេឃា អាចវ៉ៃបានគ្រប់ ក្បាច់ និងចេញបានគ្រប់ច្រកទាំងអស់ ហេតុនេះខ្ញុំរំពឹងឈ្នះដល់ ៧០ ភាគរយ»។
ជាមួយគ្នានេះ អេ ភូថង ក៏នឹងទៅមើលការប្រកួតនេះដោយផ្ទាល់ផងដែរ ទោះខ្លួនមិនទាន់ដើររួចដោយខ្លួនឯងក្ដី។
អេ ភូថង បានបញ្ជាក់ថា៖ «យើងអាចនឹងវ៉ៃជាប្រយោលច្រើន ព្រោះ មេឃា មិនចូលចិត្តវ៉ៃកៀកនោះទេ ខណៈកីឡាករថៃ គេមានជំនាញជង្គង់ និងវាយកែងខ្លីផងដែរ អ៊ីចឹងយើងនឹងវ៉ៃដកៗ ហើយនៅថ្ងៃប្រកួត ខ្ញុំក៏នឹងទៅមើលដោយផ្ទាល់ដែរ ដើម្បីលើកទឹកចិត្តដល់កូន ព្រោះនេះជាលើកដំបូងដែល មេឃា បានឡើងដណ្តើមខ្សែក្រវាត់នៅវគ្គផ្តាច់ព្រ័ត្រ»៕
