ភ្នំពេញ៖ ជើងខ្លាំងបាត់មុខពីសង្វៀន អ៊ុង វិរៈ និង ធឿន ធារ៉ា ត្រូវបានគេផ្គូផ្គងឲ្យប្រកួតជាមួយអ្នកប្រដាល់ថៃ និងអ៊ូសបេគីស្ថាន ក្នុងព្រឹត្តិការណ៍ Mas Fight Cambodia នៅសង្វៀន Town នាល្ងាចថ្ងៃអាទិត្យ ខណៈនាយកគ្រប់គ្រងកម្មវិធីនេះ បានអះអាងថា ការប្រកួតដែលសហការជាមួយប្រដាល់សេរីអន្តរជាតិ MAS Fight Kunkhmer មួយនេះទទួលបានការទាក់ទាញ និងនិយមគាំទ្រពីអ្នកទស្សនាដល់ទៅ ៨០ ភាគរយ។
លោក ស្រុន គឹមកុសល ហៅ Tommy នាយកគ្រប់គ្រងកម្មវិធីទូរទស្សន៍ថោន និងជាប្រធានចាត់ការទូទៅរបស់ MAS Fight បានប្រាប់ភ្នំពេញប៉ុស្តិ៍កាលពីម្សិលមិញថា៖ «គិតមកដល់សប្តាហ៍ទី ៤ នេះ កម្មវិធីរបស់យើង ទទួលបានការគាំទ្រគួរឲ្យកត់សម្គាល់ ហើយយើងបានរៀបចំកីឡាករប្រកួតកាន់តែមានសមត្ថភាពល្អជាលំដាប់ យើងឈានឡើងជាបន្តបន្ទាប់។ គិតមកដល់ពេលនេះ ក្នុងមួយកម្មវិធី យើងមានគូប្រកួតចំនួន ៨ គូ ក្នុងនោះគូថ្នាក់ជាតិខ្មែរប៉ះខ្មែរប្រកួតតាមរបៀប MAS Fight ចំនួន ៥ គូ និងគូមិត្តភាពខ្មែរ និងកីឡាករបរទេសចំនួន ៣ គូ ខណៈដែលអ្នកទស្សនាផ្ទាល់ នៅក្នុងទីលានប្រកួតមានចំនួនច្រើនជាង ៤០០ នាក់»។
លោកបន្តថា នៅល្ងាចថ្ងៃអាទិត្យសប្តាហ៍នេះ យើងមានគូគួរឲ្យចាប់អារម្មណ៍ចំនួន ២ គឺកីឡាករ អ៊ុង វិរៈ មកពីកងទ័ពឆត្រយោង ៩១១ ប៉ះជាមួយកីឡាករថៃ Nattapon ក្នុងទម្ងន់ដល់ទៅ ៨៥ គីឡូក្រាម។ ចំណែកជើងខ្លាំងកម្ពុជា ធឿន ធារ៉ា មកពីសមាគមប្រដាល់ក្រសួងកសិកម្ម ត្រូវជួបជាមួយកីឡាករមកពីអ៊ូសបេគីស្ថាន Sanjar Saidmuradov ក្នុងទម្ងន់ ៧០ គីឡូក្រាម។
កីឡាករកម្ពស់ ១,៧៥ អ៊ុង វិរៈ ធ្លាប់ប្រកួតបាន ៩៥ ដង ឈ្នះ ៨៦ ចាញ់ ៧ ស្មើ ២ ក្នុងនោះផ្តួលដៃគូឲ្យសន្លប់បាន ២០ លើក ចំណែកកីឡាករកម្ពស់ ១,៨០ ម៉ែត្រ Nattapon ធ្លាប់ឆ្លងកាត់ការប្រកួតបាន ៩៦ ឈ្នះ ៧០ ចាញ់ ២១ ស្មើ ៥ ដង ក្នុងនោះធ្លាប់ផ្តួលគូប្រកួតឲ្យសន្លប់បាន ១០ ដង។
លោក ហង្ស ស៊ឺន គ្រូបង្វឹក អ៊ុង វិរៈ បានប្រាប់ថា៖ «យើងមិនដឹងពីសមត្ថភាពក្បាច់គុនកីឡាករថៃរូបនោះទេ ប៉ុន្តែគូដែលប្រកួតគ្នាក្នុងទម្ងន់ធ្ងន់បែបនេះ ពួកគេសុទ្ធតែជាកីឡាករជើងចាស់ និងមានបច្ចេកទេស បទពិសោធច្រើនក្នុងការប្រកួត ហើយបញ្ហាកម្លាំងជាចំណុចមួយដែលមិនអាចសម្រុកតាមចិត្តបានទេ ព្រោះពេលចូលកណ្តាប់ដៃ ឬស្នៀតអ្វីមួយ គឺធ្ងន់ៗដូចគ្នា។ ទោះយ៉ាងណា អ្នកប្រដាល់ក្នុងក្លិបរបស់ខ្ញុំធានាវ៉ៃអស់ពីសមត្ថភាព ប៉ុន្តែបញ្ហាឈ្នះ ឬចាញ់មិនទាន់ហ៊ាននិយាយមុនឡើយ»។
ចំណែក លោក ស្រុន គឹមកុសល ដែលត្រួតពិនិត្យលើការផ្គូផ្គងផងនោះ បាននិយាយថា៖ «កីឡាករថៃ Nattapon នេះជាជើងចាស់មួយរូបរបស់ថៃ ហើយការប្រកួតគ្នាតែមួយទឹកមានរយៈពេល ៩ នាទីនោះ ពួកគេអាចនឹងចាញ់ឈ្នះគ្នា មិនអាចឈានដល់ចប់ទឹកនោះឡើយ»។
ចំណែកការជួបគ្នារវាង ធឿន ធារ៉ា និង Sanjar Saidmuradov ត្រូវបានគេរំពឹងថា អាចយកឈ្នះបានដោយទំនងស៊ីផុយ ព្រោះតាមរយៈបទពិសោធប្រកួតរបស់អ្នកទាំង ២ នេះ មានគម្លាតឆ្ងាយពីគ្នា គឺ ធឿន ធារ៉ា ប្រកួតបាន ៦០ ដង ឈ្នះ ៤៥ ចាញ់ ១០ ស្មើ ៥ ដង ក្នុងនោះផ្តួលដៃគូឲ្យសន្លប់បាន ១៥ លើក ប៉ុន្តែ Sanjar Saidmuradov មានប្រវត្តិប្រកួតត្រឹម ១៦ ដង ឈ្នះ ១៤ ចាញ់តែ ២ ដងប៉ុណ្ណោះ ហើយក្នុងនោះធ្លាប់ផ្តួលដៃគូឲ្យសន្លប់បាន ៣ ដង។
លោក អេ ភូថង គ្រូបង្វឹក ធឿន ធារ៉ា បានប្រាប់ថា៖ «ធឿន ធារ៉ា អាចឈ្នះ ព្រោះក្បាច់ប្រកួតមានកែង និងជង្គង់ល្អ ប៉ុន្តែការបារម្ភ គឺផ្នែកកម្លាំងព្រោះកីឡាករមកពីបរទេសភាគច្រើនកម្លាំងស៊ូជាងយើងបានល្អ។ ទោះបីជាយ៉ាងណា Sanjar Saidmuradov ពិតជាលំបាកទប់ទល់នឹងក្បាច់កែងបុក និងស្នៀតជង្គង់របស់ ធារ៉ា ណាស់ គឺខ្ញុំសង្ឃឹមឈ្នះ ៨០ ភាគរយ»។
ជាមួយគ្នានោះកីឡាករកូរ៉េខាងត្បូង Kim Jonghee ប្រកួតជាមួយកីឡាករថៃ Loy Phitmay ក្នុងទម្ងន់ ៧៤ គីឡូក្រាម ខណៈដែលកីឡាករខ្មែរប្រកួតជាមួយខ្មែរចំនួន ៥ គូទៀត វ៉ៃតាមច្បាប់ MAS Fight តែមួយទឹក មានរយៈពេល ៩ នាទី បើភាគីណាមិនសន្លប់ចាត់ទុកថា ស្មើគ្នា៕