ភ្នំពេញ៖ វីរកីឡាករម៉ូតូទឹក សាលី អ៊ូមើត បានបង្ហើបឲ្យដឹងថា រូបគេពិតជាបានជួបការលំបាកច្រើនក្នុងការបន្តឈ្នះតំណែងជើងឯក នៅក្នុងការប្រកួតកីឡាម៉ូតូទឹកជើងឯកពិភពលោក Thai Airways International Jet Ski World Cup 2019 នៅប្រទេស ថៃ កាលពីពេលថ្មីៗនេះ ព្រោះមានកីឡាករជើងខ្លាំងជាច្រើនប្រទេសបានព្យាយាមផ្តួលគេ ដើម្បីប្រជែងយកតំណែងជើងឯក លើវិញ្ញាសា Pro-Am Ski Superstock ដ៏ពេញនិយមនេះ។
សាលី អ៊ូមើត បាននិយាយនៅក្នុងសន្និសីទកាសែតកាលពីព្រឹកថ្ងៃព្រហស្បតិ៍ថា៖ «ខ្ញុំពិតជាមានអារម្មណ៍រំភើបសប្បាយរីករាយ ដែលបានរក្សាការឈ្នះមេដាយមាស ឬតំណែងជើងឯកក្នុងការប្រកួតជើងឯកពិភពលោក នៅប្រទេស ថៃ នេះ ប៉ុន្តែប្រភេទកីឡាណាក៏ដោយ គឺការរក្សាតំណែងជើងឯក ជាលើកទី ២ វាពិតជាមានការលំបាកខ្លាំង»។
កីឡាករ សាលី អ៊ូមើត ដែលធ្លាប់ឈ្នះទាំងមេដាយមាស និងមេដាយសំរឹទ្ធ ពីការប្រកួតកីឡាអាស៊ី ឆ្នាំ ២០១៨ នៅប្រទេស ឥណ្ឌូនេស៊ី នោះ បានបន្ថែមថា៖ «ការឈ្នះបានមេដាយមាស នៅឆ្នាំដំបូង វាមិនសូវពិបាកទេ ប៉ុន្តែចូលឆ្នាំទី ២ វាពិតជាមានការលំបាកខ្លាំង ព្រោះមានកីឡាករខ្លាំងៗ មកពីតាមបណ្តាប្រទេសផ្សេងៗ ចង់មកផ្តួលខ្ញុំ ដើម្បីដណ្តើមយកតំណែងនេះ»។
សម្រាប់ការប្រកួត ដែលត្រូវបានធ្វើឡើង កាលពីថ្ងៃទី ៥ និងបញ្ចប់នៅថ្ងៃទី ៨ ខែធ្នូ កន្លងមកនេះ សាលី អ៊ូមើត ធ្វើបានយ៉ាងល្អសម្រាប់ការប្រកួតទាំង ៤ ជុំ ដោយរកបានពិន្ទុសរុបចំនួន ២៣៣ ដើម្បីទទួលបានលេខ ១ ខណៈកីឡាករអារ៉ាប់រួម Sultan Eisa Alhammadi ដែលបានលេខ ២ មានពិន្ទុសរុបត្រឹម ២០៤ ប៉ុណ្ណោះ ហើយកីឡាករបានលេខ ៣ មកពីកាណាដា ធ្វើបានត្រឹម ១៦១ ពិន្ទុទេ។ ប៉ុន្តែកីឡាករកម្ពុជា ម៉ឺន មូសស្តាន បានបញ្ចប់ការប្រកួតត្រឹមជុំទី ២ ខណៈរូបគេមានរបួស ដោយសារគូប្រជែងបានបើកបុក រីឯកីឡាករកម្ពុជា ៣ នាក់ទៀតបានធ្លាក់ត្រឹមវគ្គ ១/២ ផ្តាច់ព្រ័ត្រ។
កីឡាករ អ៊ូមើត បានបញ្ជាក់ថា៖ «ការព្យាយាមហ្វឹកហាត់ ក្រោមការណែនាំទាំងគ្រូបរទេស និងគ្រូជំនួយ រួមទាំងការប្តេជ្ញាចិត្តរបស់ខ្ញុំ និងការលើកទឹកចិត្តរបស់ពុកម៉ែបងប្អូន បានជួយឲ្យខ្ញុំ អាចសម្រេចគោលបំណងក្នុងការឈ្នះបានមេដាយមាសជូនប្រទេសជាតិជាថ្មីម្តងទៀត គឺខ្ញុំពិតជាមានមោទនភាពខ្លាំងណាស់ ហើយខ្ញុំសូមសន្យាថា សម្រាប់ការប្រកួតជាបន្តទៀត ទោះនៅប្រទេសណាក៏ដោយ ខ្ញុំនឹងព្យាយាមរកជ័យជម្នះឲ្យសហព័ន្ធកីឡាម៉ូតូទឹកកម្ពុជា ក៏ដូចជាប្រទេសជាតិកម្ពុជា ដើម្បីលើកស្ទួយវិស័យកីឡាម៉ូតូទឹក និងមុខមាត់ប្រទេសរបស់យើងម្តងទៀត»។
ចំណែកលោក ណេះ ស្លេះ ប្រធានសហព័ន្ធកីឡាម៉ូតូទឹកកម្ពុជា បានថ្លែងថា៖ «ខ្ញុំមើលឃើញថា ការប្រកួតនេះ មានលក្ខណៈធំជាងគេ នៅលើពិភពលោក ដោយមាន ៦២ ប្រទេសចូលរួម អ៊ីចឹងទើបសហព័ន្ធកីឡាម៉ូតូទឹកអន្តរជាតិជ្រើសរើសយកប្រទេស ថៃ សម្រាប់ការប្រកួតផ្តាច់ព្រ័ត្រ»។
លោកបានបន្ថែមថា៖ «សម្ទុះនៃការប្រកួតនេះ មានភាពស្វិតស្វាញខ្លាំងមែនទែន ប៉ុន្តែជាសំណាងផងដែរ ដែលវីរកីឡាកររបស់យើងនៅតែអាចរក្សាការឈ្នះមេដាយមាស។ តែទោះបីជាយ៉ាងណា យើងនឹងនៅតែបន្តខិតខំប្រឹងប្រែងបន្ថែមទៀត ក្នុងការបណ្តុះបណ្តាលកីឡាករថ្នាលរបស់យើងបន្ថែម។ បន្ទាប់មក យើងនឹងជ្រើសរើសថ្នាល ដែលមានសមត្ថភាព ឲ្យឈានចូលជម្រើសជាតិ ហើយយើងនឹងខំប្រឹងបង្វឹកកីឡាកជម្រើសជាតិរបស់យើងបន្ថែមទៀត ដើម្បីចូលរួមប្រកួតដណ្តើមយកមេដាយសម្រាប់ការប្រកួតនៅឆ្នាំក្រោយៗទៀត»៕