ក្រុងឡុងដ៍ៈ អ្នកគាំទ្រដ៏មានឥទ្ធិពលមួយក្រុមរបស់ក្លិបកាំភ្លើងធំ Arsenal មានដូចជាអង្គការ ទស្សនាវដ្ដី និងប្លុកផ្សេងៗទៀតបានរួមគ្នាអំពាវនាវសុំឲ្យធ្វើការផ្លាស់ប្ដូរការដឹកនាំក្លិបនេះឲ្យកាន់តែប្រសើរជាងមុន និងបានរិះគន់ចំពោះការគ្រប់គ្រងដ៏អសកម្មរបស់ប្រធានក្លិបនេះគឺលោក Stan Kroenke ផងដែរ។
ហត្ថលេខីសរុបចំនួន ១៦ រួមទាំងអង្គភាព Arsenal Supporters'' Trust បានចេញផ្សាយរបាយការណ៍មួយកាលពីថ្ងៃចន្ទដោយទាមទារឲ្យមានការផ្លាស់ប្ដូរ ខណៈក្លិបកាំភ្លើងធំកំពុងត្រៀមខ្លួនសម្រាប់រដូវកាលដែលមិនបានលេងនៅក្របខ័ណ្ឌ Champions League ជាបន្តបន្ទាប់លើកទី ៣ របស់ពួកគេ។
ក្រុមអ្នកគាំទ្រទាំងនេះបានបង្ហាញបញ្ហាមួយចំនួនរួមទាំងបរិយាកាស «គ្មានព្រលឹងក្នុងខ្លួន» នៅកីឡដ្ឋាន Emirates និងកង្វះយុទ្ធសាស្ត្រដោះដូរកីឡាករផងដែរ។
របាយការណ៍នេះបានចាប់ផ្ដើមសរសេរថា៖ «ក្នុងនាមជាអ្នកគាំទ្រក្លិប Arsenal យើងបានមើលទាំងការខកចិត្តនៅពេលឃើញទម្រង់លេងរបស់ក្លិបនេះបានធ្លាក់ចុះក្នុងរយៈពេល ១ ទសវត្សរ៍មកនេះ»។
របាយការណ៍របស់អ្នកគាំទ្របានបន្តថា៖ «នៅពេលលោក Stan Kroenke បានចាប់ផ្ដើមទិញភាគហ៊ុនក្លិប Arsenal មកក្លិបនេះទើបតែបានមានឱកាសលេងនៅក្នុងវគ្គផ្ដាច់ព្រ័ត្រក្របខ័ណ្ឌ Champions League ម្ដងគត់ ហើយក្នុងរយៈពេល ១២ ឆ្នាំមកនេះក្លិប Arsenal គ្រាន់តែជិតបានមានឱកាសលេងនៅក្របខ័ណ្ឌ Europa League រយៈពេល ៣ ឆ្នាំជាប់ៗគ្នា»។
លោក Kroenke បានចាប់ផ្ដើមវិនិយោគនៅក្នុងក្លិបនេះនៅឆ្នាំ ២០០៧ ហើយតាមរយៈក្រុមហ៊ុនរបស់គាត់ Kroenke Sports Enterprises (KSE) គឺគាត់បានបន្តបង្កើនភាគហ៊ុនរបស់ខ្លួនរហូតទាល់តែរូបគាត់បានគ្រប់គ្រងពេញលេញនៅក្លិបនេះនៅក្នុងឆ្នាំ ២០១៨។
របាយការណ៍រួមនេះបានបន្តទៀតថា៖ «នៅខាងក្រៅទីលានប្រកួត ពួកគេមិនដែលយកចិត្តទុកដាក់ចំពោះយើងទេ មិនដែលស្ដាប់យើងទេ ឬមិនឲ្យតម្លៃយើងឡើយ»។
របាយការណ៍នេះបានបន្ថែមថា៖ «ក្លិបយើងមានអារម្មណ៍ដូចជារថយន្តបណ្ដាក់ទុន ១ គ្រឿងក្រោមការបញ្ជារបស់ម្ចាស់ក្លិបនេះដែលគាត់មិនបានជួយឲ្យក្លិប Arsenal ឈ្នះពានរង្វាន់នោះទេ ហើយវាគួរឲ្យសោកស្ដាយដែលថា ស្ថាប័នដ៏សំខាន់មួយដូចជាក្លិប Arsenal នេះមានអ្នកគ្រប់គ្រងអសកម្មបែបនេះសោះ»។
ការអំពាវនាវនេះបានកើតឡើងដំណាលគ្នានឹងក្លិប Arsenal ដែលកំពុងប្រកួតបើកឆាកមិត្តភាពជាមួយក្លិប Colorado Rapids នៅក្នុងការប្រកួតមុនរដូវកាលលើកដំបូងរបស់ខ្លួននៅក្នុងពេលធ្វើដំណើរទៅសហរដ្ឋអាមេរិកកាលពីថ្ងៃចន្ទ។
ក្នុងការប្រកួតមិត្តភាពនេះក្លិប Arsenal បានឈ្នះក្លិប Colorado ៣-០ ហើយកីឡាកររកបានគ្រាប់បាល់សម្រាប់ក្លិបនេះគឺកីឡាករ Gabriel Martinelli, Bukayo Saka និង James Olayinka នៅក្នុងកីឡដ្ឋាន Sporting Goods Park ក្នុងទីក្រុង Denver រដ្ឋ Colorado សហរដ្ឋ-អាមេរិក។
ក្លិប Arsenal បានចាប់ផ្ដើមបង្កើតក្រុមបម្រុងមួយ ខណៈពួកគេចាប់ផ្ដើមបង្កើនសមត្ថភាពឆ្ពោះទៅរករដូវកាល Premier League ក្រោយពីបាត់បង់ឱកាសលេងនៅក្នុងក្របខ័ណ្ឌ Champions League៕ SN