.jpg)
Becker (ឆ្វេងទី ៣) តែតបញ្ចូលទីឱ្យ Liverpool នាំមុខ West Brom ២-១ អំឡុងការប្រកួត នៅក្របខ័ណ្ឌ Premier League កាលពីថ្ងៃអាទិត្យ។ រូបថត AFP
ក្រុងវេសប្រោមវិច: អ្នកចាំទី Alisson Becker របស់ក្រុម Liverpool តែតបាល់បញ្ចូលទី នូវគ្រាប់បាល់ជ័យជម្នះ នៅនាទីទី៩០+៥ ខណៈក្រុមហង្សក្រហម វាយបកយកឈ្នះ ២-១ លើក្រុម West Brom កាលពីថ្ងៃអាទិត្យ ដើម្បីជួយឱ្យក្ដីសង្ឃឹម ក្នុងការប្រជែងយកកៅអី សម្រាប់ទៅលេង នៅក្របខ័ណ្ឌ Champions League រដូវកាលក្រោយ នៅមិនទាន់រលាយបាត់ពីដៃរបស់ខ្លួននោះទេ។
ក្រុមរបស់លោក Jurgen Klopp នឹងត្រូវការការអនុគ្រោះពីក្រុម Leicester និង Chelsea ក្នុងការប្រកួត ២ លើកចុងក្រោយនៃរដូវកាល បើពួកគេមិនអាចឈ្នះក្រុម West Brom ដែលធ្លាក់ទៅលេងនៅលីគទី២ រួចហើយទេនោះ តែកីឡាករអន្តជាតិប្រេស៊ីល Alisson បានឡើងទៅធ្វើជាខ្សែប្រយុទ្ធ ពេល Liverpool ទាត់បាល់ជ្រុង ក្នុងម៉ោងបន្ថែមបង្រ្គប់មានរបួស ហើយតែតទម្លុះសំណាញ់ទីរបស់ក្រុមម្ចាស់ផ្ទះ ជាមួយនឹងការបញ្ជូនរបស់ Trent Alexander-Arnold។
ការដណ្ដើមបាន ៣ ពិន្ទុនេះ ឃើញថា Liverpool តាម ១ ពិន្ទុពីក្រោយក្រុមលេខ ៤ Chelsea និង ៣ ពិន្ទុ ពីក្រោយក្រុមលេខ ៣ Leicester ហើយដោយក្រុមនៅពីលើទាំង ២ នេះ ត្រូវប្រឈមជាមួយគ្នាថ្មីម្ដងទៀត ក្រោយជួបគ្នានៅ FA Cup ក្នុងវគ្គផ្ដាច់ព្រ័ត្រ កាលពីថ្ងៃសៅរ៍ នោះ ការឈ្នះលើក្រុម Burnley និង Crystal Palace នឹងនាំឱ្យ Liverpool ឈរក្នុងចំណោមក្រុមនៅទីកំពូលទាំង ៤ (Top4) ក្នុងតារាងក្របខ័ណ្ឌ Premier League មិនខានឡើយ។
ឪពុករបស់កីឡាករ Alisson បានលាចាកលោក កាលពីខែកុម្ភៈ ដោយសារលង់ទឹកក្នុងប្រទេសកំណើតប្រេស៊ីល ដូច្នេះអ្នកចាំទីវ័យ ២៨ ឆ្នាំ Alisson បានឧទ្ទិសគ្រាប់បាល់នេះដល់ព្រលឹងឪពុករបស់ខ្លួន។
Alisson បានប្រាប់ទូរទស្សន៍ Sky Sports ថា៖ «វាជារឿងរំជួលចិត្តខ្លាំងណាស់។ រយៈពេលប៉ុន្មានខែនេះ សម្រាប់គ្រប់យ៉ាង ដែលបានកើតឡើងចំពោះខ្ញុំ តែបាល់ទាត់ គឺជាជីវិតរបស់ខ្ញុំ។ ខ្ញុំលេងបាល់តាំងពីខ្ញុំដឹងក្ដីជាមួយឪពុករបស់ខ្ញុំ។ ខ្ញុំសង្ឃឹមថា គាត់នៅទីនេះ មើលឃើញគ្រាប់បាល់នេះ តែខ្ញុំជឿថា គាត់បានឃើញ ដោយមានព្រះជាម្ចាស់ នៅក្បែរគាត់ ហើយគាត់កំពុងធ្វើការអបអរ»។
យ៉ាងណាខ្សែប្រយុទ្ធ Hal Robson-Kanu ស៊ុតឱ្យក្រុម West Brom នាំមុខ នៅនាទីទី ១៥ តែក្រុម Liverpool តាមស្មើដោយគ្រាប់បាល់របស់ខ្សែប្រយុទ្ធដ៏គ្រោះថ្នាក់ Mohamed Salah នៅនាទីទី៣៣ ហើយ Alisson តែតឱ្យក្រុមជើងឯកចាស់របស់លីគកំពូលឈ្នះនៅវិនាទីចុងក្រោយនៃការប្រកួតនេះ៕ AFP/VN
