ក្រុងមែលប៊ន: អត្តពលិកវាយកូនបាល់ (តិន្នីស) ២ នាក់បន្ថែមទៀត ដែលចូលរួមប្រកួត ក្នុងកម្មវិធី Australian Open នាប្រទេសអូស្ត្រាលី ទទួលបានលទ្ធផលវិជ្ជមានវីរុសកូរ៉ូណា។ នេះបើតាមការឱ្យដឹងពីមន្ត្រីការប្រកួតកាលពីថ្ងៃពុធ ដោយនាំឱ្យចំនួនវិជ្ជមានសម្រាប់អ្នកដែលពាក់ព័ន្ធនឹងព្រឹត្តិការណ៍នេះ កើនឡើងដល់ ១០ ករណី។
វាគឺជាផលប៉ះពាល់ថ្មីចុងក្រោយ សម្រាប់ការត្រៀមរៀបចំការប្រកួតប្រជែងដណ្ដើមពានរង្វាន់ Grand Slam ដំបូងគេប្រចាំឆ្នាំ នាក្រុងមែលប៊ន ដែលត្រូវបានពន្យារពេលរួចម្ដងទៅហើយ រយៈពេល ៣ សប្ដាហ៍ ដោយសារតែការរាតត្បាតនៃជំងឺឆ្លងនេះ។
ករណីឆ្លងហូរហែ ដែលត្រូវបានរកឃើញដោយមន្រ្តីអូស្ត្រាលី បានធ្វើឱ្យកីឡាករកីឡាការិនី ៧២ នាក់ ត្រូវនៅតែក្នុងបន្ទប់សណ្ឋាគាររបស់ពួកគេ រយៈពេល ២ សប្ដាហ៍។
រដ្ឋមន្រ្តីប៉ូលិសរបស់រដ្ឋ Victoria អ្នកស្រី Lisa Neville បានឱ្យដឹងថា កីឡាករអាជីព ២ រូប និងមិនមែនជាកីឡាករ ២ រូប ដែលពាក់ព័ន្ធនឹងព្រឹត្តិការណ៍នេះ បានធ្វើតេស្តវិជមាន នៅ ២៤ ម៉ោងចុងក្រោយនេះ។
អ្នកស្រីបានប្រាប់អ្នកសារព័ត៌មានថា អត្តពលិកម្នាក់នឹងត្រូវដាក់ឱ្យនៅដាច់ឡែកពីគេទាំងស្រុង ព្រោះគាត់បានធ្វើដំណើរមកតាមជើងហោះហើរមួយ ដែលយើងរកឃើញមានករណីវិជ្ជាមាន។
ករណីជាច្រើន ដែលត្រូវបានប្រកាសនៅមុនហ្នឹងថា វិជ្ជមានត្រូវបានបញ្ចេញជាសាធរណៈវិញថា អត់មានជំងឺឆ្លងនេះនោះទេ ដោយមានន័យថា ចំនួនដែលត្រូវបានអះអាងនៃករណីនេះ ក្នុងចំណោមក្រុមអ្នកចូលរួមប្រកួតប្រជែង ឥឡូវនេះ មានចំនួន ១០ ករណី។
គ្រប់ក្រុមទាំងអស់ កំពុងនៅដាច់់ឡែក ក្នុងរយៈពេល ១៤ ថ្ងៃ ដោយអត្តពលិក ដែលមិនបានទាក់ទងជិតដិតនឹងអ្នកវិជ្ជមាន ត្រូវបានអនុញ្ញាតឱ្យចេញក្រៅ ដើម្បីធ្វើការហ្វឹកហាត់រយៈពេលរហូតដល់ ៥ ម៉ោង ក្នុង ១ ថ្ងៃ នៅឯកន្លែង ដែលបានកំណត់ទុក។
លក្ខខណ្ឌនោះ បានធ្វើឱ្យមានការរអ៊ូរទាំពីកីឡាករឆ្នើមៗចំនួន ក្នុងនោះមានទាំងកីឡាករចំណាត់ថ្នាក់ទី ១៣ របស់ពិភពលោក Roberto Bautista Agut ដែលប្រាប់ទូរទស្សន៍មួយថា ការធ្វើចត្តាឡីស័កនោះ ដូចនៅក្នុងពន្ធនាគារ ដែលមានហវ៉ាយហ្វាយអ៊ីចឹង។
តែក្រោយមកកីឡាករអេស្ប៉ាញរូបនេះ បានធ្វើការសុំទោសតាមរយៈគណនី Twitter ថា៖ «ដល់អ្នកគ្រប់គ្នា ដែលអត់សប្បាយចិត្តនឹងការលើកឡើងរបស់ខ្ញុំ។ ការនិយាយនោះ គឺជាការសន្ទនាឯកជន ដែលធ្វើឡើងក្រៅប្រធានបទ»។
Bautista Agut បានសរសេររៀបរាប់ថា៖ «ខ្ញុំចង់អរគុណដល់មនុស្សគ្រប់គ្នា ដែលកំពុងធ្វើឱ្យការប្រកួតតិន្នីសអាចកើតឡើងម្ដងទៀត។ ដូចគ្នាផងដែរ ដល់អ្នកទាំងអស់គ្នា ដែលប្រយុទ្ធប្រឆាំងនឹងជំងឺកូវីដ ១៩ រាល់ថ្ងៃ។ ការគ្រប់គ្រង ដែលត្រូវបានធ្វើឡើង ណោអូស្ត្រាលី ដើម្បីទប់ស្កាត់ការឆ្លងរាលដាលនូវវីរុសនេះ គួរឱ្យសរសើរណាស់»។
តែទោះជាយ៉ាងណា គណៈកម្មការទទួលខុសត្រូវរៀបចំការប្រកួត បាននិយាយដដែលៗថា អត្តពលិកភាគច្រើនបំផុត ទទួលយកការនៅដោយឡែករបស់ពួកគេ ដោយមិនមានការតវ៉ាអ្វីទាំងអស់។ កម្មវិធី Australian Open គ្រោងនឹងចាប់ផ្ដើមនៅថ្ងៃទី ៨ ខែកុម្ភៈ ខាងមុននេះ៕ AFP/VN