The Phnom Penh Post Search

Search form




Logo of Phnom Penh Post newspaper Phnom Penh Post - អ្នក​ចូលរួម​រត់​ចម្ងាយ ​Angkor Ultra Trail ​​កើន ១០ ​ភាគរយ​​

អ្នក​ចូលរួម​រត់​ចម្ងាយ ​Angkor Ultra Trail ​​កើន ១០ ​ភាគរយ​​

Content image - Phnom Penh Post
មន្ត្រី​រៀប​ចំ​ព្រឹត្តិ​ការណ៍​ Angkor Ultra Trail 2020 ធ្វើ​សន្និសីទ​កាសែត​ពីថ្ងៃទី​ ៩​ ខែ​មករា​​​។ រូប​ សហ​ការី

អ្នក​ចូលរួម​រត់​ចម្ងាយ ​Angkor Ultra Trail ​​កើន ១០ ​ភាគរយ​​

ភ្នំពេញ៖ ព្រឹត្តិការណ៍​កីឡា​​អត្តពលកម្ម​ប្រភេទ​ទិវា​រត់​ប្រណាំង​ចម្ងាយ​ឆ្ងាយ​នៅ​តំបន់​អង្គរ​ ហៅ​​ថា​ Angkor Ultra Trail 2020 ​បាន​ឈាន​ចូល​ដល់​ឆ្នាំ​ទី ​៥​ ​ដែល​គ្រោង​​នឹង​ចាប់​ផ្ដើម​ធ្វើ​នៅ​ថ្ងៃទី ​១៨ និង ​១៩ ខែ ​មករា ​ឆ្នាំ ​២០២០ ​ខាង​មុខ​នៅ​​ក្នុង​ខេត្ត​សៀមរាប ​ខណៈ​ដែល​មន្ត្រី​គ្រប់គ្រង​កម្មវិធី​អះអាង​ថា​ ចំនួន​អ្នក​ចូលរួម​បាន​កើន​ឡើង​ជាង ​១០ ​ភាគរយ​។

នេះ​ជា​ព្រឹត្តិការណ៍​កីឡា​បែប​ទេសចរណ៍​រត់​ផ្សង​ព្រេង​ចម្ងាយ​ឆ្ងាយ​ដល់​ទៅ ​១២៨ ​គីឡូ​ម៉ែត្រ​នៅ​តំបន់​អង្គរ ដោយ​ចំណាយ​ពេល​ច្រើន​ម៉ោង​មិន​គិត​ពី​យប់ ​ឬ​ថ្ងៃ​ឡើយ​​។

លោក វ៉ាត់ ចំរើន អគ្គលេខាធិការ​គណៈកម្មាធិការ​ជាតិ​អូឡាំពិក​កម្ពុជា​បាន​ឲ្យ​ដឹង​ក្នុង​សន្និសីទ​កាសែត​​ពី​​ចុង​សប្តាហ៍​ថា៖ ​«​ព្រឹត្តិការណ៍​នេះ​មាន​កីឡាករ-កីឡាការិនី​ចូលរួម​រត់​ប្រមាណ ​១ ២០០ ​ទៅ​ ១ ៣០០ ​នាក់ ​ក្នុង​នោះ​មាន​បរទេស​ជាង ​៧០០ ​នាក់ ​មក​​ពី​ ​៤៤ ​ប្រទេស​លើ​ពិភព​លោក​​ហើយ​តាម​ការ​កត់​សម្គាល់​នោះ ​មាន​ជនជាតិ​បារាំង​ច្រើន​ជាង​គេ​បន្ទាប់​មក​មាន​ជនជាតិ​អង់គ្លេស ​និង​កូរ៉េ​»​។

លោក វ៉ាត់ ចំរើន ​​បាន​កត់​សម្គាល់​ឃើញ​ថា៖ ​«នៅ​ក្នុង​ការ​រត់​ចម្ងាយ​ Angkor Ultra Trail ​ឆ្នាំ ​២០២០ ​នេះ កីឡាករ​កម្ពុជា​ចូលរួម​ច្រើន​ជាង​ឆ្នាំ​មុនៗ ​ហើយ​មាន​ខ្មែរ​ចំនួន ​៣ នាក់ ​ដែល​ចូលរួម​រត់​ចម្ងាយ​ឆ្ងាយ ​១២៨ ​គីឡូម៉ែត្រ ​​ដែល​នាំ​ឲ្យ​ចំនួន​អ្នក​ចូលរួម​កើន​ប្រមាណ​ជាង ​១០ ​ភាគរយ ​គឺ​ឡើង​ពី​ប្រមាណ​ ១ ២០០​ នាក់ ​ទៅ ​១ ៣០០ ​នាក់។​ ជាមួយ​គ្នា​នេះ​ដែរ ​ត្រូវ​បាន​សហការ​រវាង​គណៈកម្មាធិការ​ជាតិ​អូឡាំពិក​កម្ពុជា​ និង​ក្រុមហ៊ុន​ Phoenix ​Voyage​​ ដែល​​ចាប់​ផ្ដើម​ចេញ​ដំណើរ​រត់​ពី​មុខ​ទីលាន​ជល់​ដំរី​នៅ​ម៉ោង ​៤ ទៀប​​ភ្លឺ ថ្ងៃ​ទី ​១៨​ ខែ ​មករា​ ឆ្នាំ ​២០២០​ សម្រាប់​វិញ្ញាសា​រត់​ចម្ងាយ​ ១២៨ ​​​គីឡូម៉ែត្រ ​ហើយ​គ្រោង​នឹង​បញ្ចប់​នៅ​ថ្ងៃទី ​១៩​ ខែ ​មករា​​ ឆ្នាំ ​២០២០​ កីឡាករ​-​កីឡាការិនី​ម្នាក់ៗ ​អាច​ចំណាយ​ពេល​វេលា​ប្រមាណ ​២៤ ​​ម៉ោង​ ដើម្បី​រត់​កាត់​វាល​ស្រែ​ផ្លូវលំ ​ផ្លូវ​ព្រៃ​ជុំវិញ​តំបន់​អង្គរ ដោយ​គ្មាន​ការ​ឈប់​សម្រាក​​ឡើយ​»​។

លោក វ៉ាត់ ចំរើន បន្ថែម​ទៀត​ថា​ ចំពោះ​ការ​រត់​ចម្ងាយ​ឆ្ងាយ​លើក​ទី ៥ លើ​ទឹក​ដី​អង្គរ​នេះ គឺ​មាន​កំណើន​អ្នក​ចូលរួម​ច្រើន​រហូត​ដល់​ទៅ​ជាង​ ១ ៣០០ ​នាក់ ​ពោល​គឺ​ច្រើន​ជាង​កាល​ពី​ឆ្នាំ ២០១៩ ​ដែល​មាន​អ្នក​ចូលរួម​ត្រឹម​តែ ​១ ០០០ ​នាក់​ប៉ុណ្ណោះ ​ប៉ុន្ដែ​​បន្ថែម​លើ​ការ​ចូល​រួម​រត់​អត្តពលិក​ម្នាក់ៗ ក៏​មាន​គ្រួសារ​សាច់​ញាតិ ​និង​មិត្តភក្តិ​អម​ដំណើរ​ជាច្រើន​រយ​នាក់​ផង​ដែរ​ ​ជួយ​ជំរុញ​ឲ្យ​មាន​កំណើន​ទេសចរ ​និង​រួម​ចំណែក​លើក​កម្ពស់​ជីវភាព​របស់​ប្រជាពលរដ្ឋ និង​សេដ្ឋកិច្ច​ជាតិ​​។

លោក​បាន​បញ្ជាក់​ថា​៖ «ការ​រៀបចំ​ព្រឹត្តិការណ៍​កីឡា​បែប​ទេសចរណ៍​នេះ​ គឺ​ផ្ដោត​លើ​គោល​បំណង​សំខាន់ៗ​ជា​ច្រើន​​ គឺ​គោលដៅ​ទី​ ១ ​ផ្សព្វផ្សាយ​ឲ្យ​បណ្ដា​ប្រទេស​លើ​ពិភព​លោក​ពិសេស​ភ្ញៀវ​ទេសចរ​ជាង ​៤៤ ​ប្រទេស​ចូលរួម​បាន​ដឹង​ពី​ស្ថេរភាព​សន្ដិភាព និង​ការ​អភិវឌ្ឍ​លើ​គ្រប់​វិស័យ​ក្នុង​ប្រទេស ​កម្ពុជា ក៏​ដូច​ជា​ផ្សព្វផ្សាយ ​និង​ចូល​រួម​ថែ​រក្សា​គោលដៅ​ទេសចរណ៍​ប្រវត្ដិសាស្ដ្រ​របស់​កម្ពុជា គឺ​តំបន់​អង្គរ ខេត្ត​សៀមរាប​។ ទី ២ គឺ​រួម​ចំណែក​ស្វែងរក​មូលនិធិ​សម្រាប់​ជួយ​​ការងារ​មនុស្ស​ធម៌​តាម​អង្គការ ​និង​មន្ទីរ​ពេទ្យ​មួយ​ចំនួន​ និង​ទី ៣ ​គឺ​ទាក់ទាញ​ភ្ញៀវ​ទេសចរ​ឲ្យ​កាន់​តែ​ច្រើន​​ថែម​ទៀត​​​»។

សូម​បញ្ជាក់​ថា​ ព្រឹត្តិការណ៍ ​Angkor Ultra Trail ឆ្នាំ ២០២០ គឺ​បែង​ចែក​ជា ៥ ​វិញ្ញាសា​សម្រាប់​រត់​ដូច​ឆ្នាំ​កន្លង​ទៅ ​ដែរ​រួម​មាន​វិញ្ញសា​រត់​ចម្ងាយ ​១២៨ ​គីឡូម៉ែត្រ ​រត់​ចម្ងាយ​ ៦៤ គីឡូម៉ែត្រ រត់​ចម្ងាយ ៤២ គីឡូម៉ែត្រ ៣២ ​គីឡូម៉ែត្រ និង​រត់​ចម្ងាយ ​១៦ ​គីឡូម៉ែត្រ​ ដែល​ត្រូវ​ចេញ​ដំណើរ​ជា​បន្ដ​បន្ទាប់​៕

អត្ថបទគួរចាប់អារម្មណ៍

  • ជនជាតិ​ភាគតិច និង​សង្គម​ស៊ីវិល​ប្ដឹង​ជំទប់​ឃុំ និង​អភិបាលរង​ខេត្ត ​រឿង​ចេញ​បណ្ណ​សម្គាល់​ដី​ជាន់​លើ​ដី​ព្រៃ

    មណ្ឌលគិរី: ពលរដ្ឋ​សហគមន៍​ជនជាតិ​ដើម​ភាគតិច និង​សង្គម​ស៊ីវិល​ចំនួន ៦ ​នាក់​ បាន​ដាក់​ពាក្យបណ្ដឹង​ចំនួន ២ ​ដាច់​ ដោយឡែក​ពី​គ្នា​ប្ដឹង​មនុស្ស ៤ ​នាក់ ​ទៅ​តុលាការខេត្ត​ក្នុង​នោះ​មាន​ជំទប់​ទី​ ១ ​ឃុំ​ប៊ូស្រា​ម្នាក់ និង​អភិបាលរង​ខេត្តមណ្ឌលគិរី​ម្នាក់​ដោយ​ចោទ​ពាក់ព័ន្ធ​ការចេញ​បណ្ណ​សម្គាល់​ម្ចាស់​ដីធ្លី​ជាន់​លើដី​គម្រប​ព្រៃឈើ និង​បទ​ចោទ​ពាក់ព័ន្ធ​លួច​គាស់​យក​ថ្ម​ធម្មជាតិ​

  • កាណាដា​ពិន័យ VW ១៥០ ​លាន​ដុល្លារ

    ក្រុងតូរ៉ុនតូៈ តុលាការ​ក្នុង​ទីក្រុង​តូរ៉ុនតូ​កាលពី​ថ្ងៃ​ពុធ​បាន​បញ្ជា​ឲ្យ​ក្រុមហ៊ុន Volkswagen (VW) បង់ប្រាក់​ពិន័យ ១៩៦,៥ លាន​ដុល្លារ​កាណាដា (១៥០ ​លាន​ដុល្លារ​អាមេរិក​) បន្ទាប់ពី​ក្រុមហ៊ុន​ផលិត​រថយន្ត​មួយ​នេះ​បាន​សារភាព​កំហុស​ចំពោះ​ការរំលោភច្បាប់​បរិស្ថាន​ក្នុង​រឿងអាស្រូវ​បោក​បន្លំ​ការបញ្ចេញ​កាបូន​។

  • សហជីព​បារាំង​​ព្យាយាម​បន្ត​ការ​តវ៉ា​ប្រឆាំង​ការ​កែ​ទម្រង់​ប្រាក់​សោធននិវត្តន៍​​ ដើម្បី​ដាក់​សម្ពាធ​លើ​រដ្ឋាភិបាល​​

    ក្រុង​ប៉ារីស៖ ក្រុម​សហជីព​បារាំង​កាល​ពី​ថ្ងៃ​ពុធ​ បាន​បន្ត​ធ្វើ​​កូដកម្ម​ជា​ច្រើន​ ដោយ​​មាន​​បំណង​បង្កើន​សម្ពាធ​​​​ទៅ​លើ​រដ្ឋាភិបាល​មុន​នឹង​រដ្ឋាភិបាល​នេះ​ ធ្វើ​ការ​បង្ហាញ​ការ​កែ​ទម្រង់​ប្រាក់​សោធននិវត្តន៍​ចុង​ក្រោយ ​ដែល​បាន​​​ជំរុញ​ឲ្យ​មាន​ការ​តវ៉ា​ពី​បញ្ហា​ការងារ​ធំ​បំផុត​នៅ​បារាំង​ជា​ច្រើន​ទសវត្សរ៍​នោះ​​។ ​

  • លាភ ​រដ្ឋា ​និង ​ផាន់ ​គ្រាន់ ​ប៉ះ​ថៃ​ចំណូល​ថ្មី​

    ភ្នំពេញ៖ ​អ្នក​លេង​កណ្តាប់​ដៃ​របស់​កម្ពុជា​ចំនួន ​២ ​នាក់ គឺ ​លាភ ​រដ្ឋា និង​ ផាន់ ​គ្រាន់​ ​នឹង​​ត្រូវ​បង្ហាញ​ខ្លួន​រួមគ្នា នៅ​​លើ​សង្វៀន​ SEATV នា​រសៀល​ថ្ងៃ​សៅរ៍​ស្អែក​នេះ ​ដោយ​ពួក​គេ​ត្រូវ​ជួប​ជាមួយ​​កីឡាករ​ថៃ​​ចំណូល​ថ្មី​ មិន​ធ្លាប់​មក​ប្រកួត​ក្នុង​សង្វៀន​នៅ​​ប្រទេស ​កម្ពុជា ​នោះ​ទេ​​។