ភ្នំពេញៈ សហព័ន្ធកីឡាប្រដាល់សកលកម្ពុជាដែលបានបែកចេញពីសហព័ន្ធកីឡាប្រដាល់គុនខ្មែរតាំងពីខែកុម្ភៈ ឆ្នាំ ២០១៧ និងបានបង្កើតជាសហព័ន្ធកីឡាជាតិស្របច្បាប់ដោយទទួលស្គាល់ពីក្រសួងអប់រំ យុវជន និងកីឡា និងគណៈកម្មាធិការជាតិអូឡាំពិកកម្ពុជា (NOCC) ជិតមួយអាណត្តិហើយនោះ ប៉ុន្តែសកម្មភាពដឹកនាំគ្រប់គ្រងការប្រកួតមិនទាន់បានផ្តាច់ចេញពីគ្នានៅឡើយ។
ជាមួយគ្នានេះសមាសភាពមន្ត្រីថ្នាក់ដឹកនាំរវាងសហព័ន្ធកីឡាប្រដាល់ទាំង ២ នេះគឺ ៩៩ ភាគរយជាមនុស្សតែមួយ ក្រុមមុខដដែល តែឈរឈ្មោះជាគណៈកម្មាធិការប្រតិបត្តិទាំង ២ សហព័ន្ធ ហើយស្ថិតក្នុងស្ថានភាពបែបនេះ មន្ត្រីជំនាញកីឡាបានជំរុញឲ្យប្រដាល់សកលជាប្រភេទកីឡាអូឡាំពិក គប្បីបែកចេញឲ្យដាច់ពីប្រដាល់គុនខ្មែរ ដើម្បីពង្រឹងសមត្ថភាពកីឡាករឆ្ពោះទៅស្វែងរកមេដាយពីការប្រកួតថា្នក់តំបន់ ទ្វីប និងកម្រិតពិភពលោក។
លោក ប៊ុយ សោភ័ណ្ឌ មន្ត្រីជំនាញកីឡា និងជាអគ្គលេខាធិការសហព័ន្ធកីឡាប្រដាល់សកលកម្ពុជានិយាយថា៖ «តាមគោលការណ៍សហព័ន្ធផ្សេងគ្នាគឺត្រូវតែមានសកម្មភាពដាច់ដោយឡែកពីគ្នាតែប្រភពដើមនៃសហព័ន្ធទាំង ២ នៅជាមួយគ្នា ហើយបច្ចុប្បន្នបែកចេញពីគ្នាមានថវិកាទ្រទ្រង់ផ្សេងគ្នាគឺគប្បីចេញពីគ្នា ប៉ុន្តែរឿងនេះនៅលើថ្នាក់ដឹកនាំមានប្រធានសហព័ន្ធជាដើម ទើបសម្រេចបាន»។
លោក សោភ័ណ្ឌ ទទួលស្គាល់ថាពីដំបូងយើងត្រូវការសហការគ្នាដើម្បីជួយឲ្យដំណើរការបាន ព្រោះយើងខ្វះធនធានមនុស្ស ប៉ុន្តែបច្ចុប្បន្នយើងអាចផ្តាច់ចេញពីគ្នាបានហើយ ដោយសារយើងដំណើរការបាន ៣ ឆ្នាំគឺមានសមត្ថភាពដោយខ្លួនឯងបាន។
តាមរយៈការទ្រទ្រង់ថវិកាពីក្រសួងអប់រំ យុវជន និងកីឡា ប្រចាំឆ្នាំក្នុងការអភិវឌ្ឍដូចជាជាបង្កើតឲ្យមានវគ្គបណ្តុះបណ្តាលគ្រូបង្វឹក ជំនាញរដ្ឋបាលកីឡា និងការប្រកួតជើងឯកថ្នាក់ជាតិប្រចាំឆ្នាំផងនោះ សហព័ន្ធកីឡាប្រដាល់សកលកម្ពុជាមានថវិកាខ្ទង់ ៨០ លានរៀល ខណៈសហព័ន្ធកីឡាប្រដាល់គុនខ្មែរមានថវិកាទ្រទ្រង់ចំនួន ១០០ លានរៀល។ ហេតុនេះមន្ត្រីជំនាញកីឡាបានជំរុញថា គួរតែមានសកម្មភាពផ្តាច់ចេញពីគ្នាដើម្បីស្វែងរកភាពរីកចម្រើនដូចគ្នា ព្រោះសហព័ន្ធខុសគ្នាចាយលុយផ្សេងពីគ្នា ហើយសមាសភាពថ្នាក់ដឹកនាំគួរកែសម្រួលកុំឲ្យត្រួតស៊ីគ្នាច្រើនពេក។
លោក តែម ម៉ឺន អគ្គលេខាធិការរង NOCC និងជាប្រធានសហព័ន្ធកីឡាប្រដាល់គុនខ្មែរបានថ្លែងថា៖ «តាមពិតគឺល្មមដល់ពេលប្រដាល់ទាំង ២ មានសកម្មភាពប្រកួតដាច់ចេញពីគ្នាហើយ ចំណែកឯសមាសភាពថ្នាក់ដឹកនាំក៏គួរតែសម្រួលកុំឲ្យមានតួនាទីត្រួតគ្នាច្រើនពេក។ ខ្ញុំគាំទ្រឲ្យដាច់ពីគ្នា ព្រោះថវិកាចំណាយប្រកួតក្តី វគ្គបណ្តុះបណ្តាលក្តីក៏ផ្សេងគ្នាដែរ»។
យ៉ាងណាក៏ដោយនៅក្នុងសេចក្តីសម្រេចរបស់ NOCC ក៏ដូចជាក្រសួងអប់រំ នៅខែកុម្ភៈឆ្នាំ ២០១៩ សមាសភាពថ្នាក់ដឹកនាំសហព័ន្ធកីឡាប្រដាល់សកល និងប្រដាល់គុនខ្មែរ ៩៩ ភាគរយគឺមនុស្សតែមួយ។ ភ័ស្តុតាងដែលនៅជាធរមានបង្ហាញយ៉ាងច្បាស់ថា លោក ឆឹង យ៉ៅយ៉េន ជាប្រធានសហព័ន្ធកីឡាប្រដាល់សកលផង និងជាអនុប្រធានសហព័ន្ធកីឡាប្រដាល់គុនខ្មែរផងលោក វ៉ា ស៊ិនភិរម្យ អនុទី ១ ប្រដាល់សកល និងជាអនុប្រធានប្រដាល់គុនខ្មែរ លោក ម៉ិល កាដូ ជាអគ្គលេខាធិការប្រដាល់គុនខ្មែរ និងជាអនុប្រធានប្រដាល់សកល ហើយគណៈកម្មាធិការប្រតិបត្តិមួយចំនួនដូចជាលោក ប៉ឹង សំអាង លោក និន ភិរម្យ លោក រាជ សុផែន លោក ចាន់ សុទ្ធ លោក មាស សុខគ្រី លោក ទេស សូ លោក ជួន សុខវ៉ាន់ឌី និងលោក ថុក ប៊ុនធឿន មានឈ្មោះនៅក្នុងសហព័ន្ធកីឡាប្រដាល់គុនខ្មែរផង និងនៅសហព័ន្ធកីឡាប្រដាល់សកលផងគឺជាមនុស្សតែមួយ។
លោកវេជ្ជបណ្ឌិត ឆឹង យ៉ៅយ៉េន ប្រធានសហព័ន្ធកីឡាប្រដាល់សកលកម្ពុជា មិនអាចទាក់ទងបានទេកាលពីម្សិលមិញ។ ចំណែកលោក វ៉ាត់ ចំរើន អគ្គលេខាធិការ NOCC និងជាអ្នកជំនាញគ្រប់គ្រងកីឡាបានថ្លែងថា៖ «វាល្មមដល់ពេលសហព័ន្ធទាំង ២ ចែកគ្នាឲ្យដាច់ ព្រោះកីឡាមួយប្រភេទគឺមានលក្ខខណ្ឌ និងច្បាប់ខុសពីគ្នា»។
លោក ចំរើន បន្តថា៖ «តាមទស្សនៈរបស់ខ្ញុំ អ្នកប្រដាល់សកលដែលកំពុងហ្វឹកហាត់ជម្រើសជាតិមិនគប្បីឲ្យទៅប្រកួតគុនខ្មែរនោះទេ វាមិនចំគោលដៅ ដែលយើងបណ្តុះបណ្តាល សម្រួចទៅរកមេដាយ ហើយការបណ្តោយឲ្យគាត់ទៅប្រកួតគុនខ្មែរតាមសង្វៀនឯកជន ដើម្បីរកប្រាក់ វាជារឿងខុសឆ្គងមួយ ដែលគួរតែខិតខំចៀសវាងឲ្យបាន»។
លោក វ៉ាត់ ចំរើន បានបន្ថែមថា៖ «ប្រដាល់សកល បើសិនប្រឹងប្រែងខ្លាំង ប្រកួតដណ្តើមបានមេដាយលើឆាកអន្តរជាតិគឺទទួលបានរង្វាន់ច្រើនណាស់ ប៉ុន្តែកីឡាករយើងបច្ចុប្បន្នមិនសម្លឹងឲ្យឆ្ងាយគឺគិតតែប្រកួតភ្លាមបានលុយភ្លាមក្នុងគុនខ្មែររាល់សប្តាហ៍។ ហេតុនេះ ខ្ញុំលើកទឹកចិត្តឲ្យសហព័ន្ធប្រដាល់ទាំង ២ ខិតខំធ្វើសកម្មភាពដាច់ដោយឡែកពីគ្នាក្នុងការប្រកួត ហើយសមាសភាពថ្នាក់ដឹកនាំគួរតែពិនិត្យឡើងវិញ ព្រោះក្នុងឋានៈជាស្ថាប័នកីឡា NOCC មិនអាចលូកដៃចូលផ្ទៃក្នុងសហព័ន្ធកីឡាជាតិបានទេ»៕