.jpg)
ស្ថានភាពប្រកួតបិទទ្វារ គ្មានអ្នកទស្សនា នៅលើសង្វៀនអាស៊ីអាគ្នេយ៍ កាលពីថ្ងៃអាទិត្យ។ រូបថត សហការី
ភ្នំពេញ៖ ការប្រកួតបិទទ្វារជាលើកដំបូងនៅសង្វៀនបាយ័ន CNC, PNN និង អាស៊ីអាគ្នេយ៍ កាលពីចុងសប្តាហ៍នេះ បានក្លាយជាការប្រកួតចុងក្រោយ មុនពេលសង្វៀនប្រដាល់ទាំងអស់ត្រូវបានពន្យារ ឬផ្អាកការប្រកួតជាបណ្តោះអាសន្នទៅតាមការណែនាំរបស់ក្រសួងសុខាភិបាល និងសហព័ន្ធកីឡាប្រដាល់កម្ពុជា ដើម្បីចូលរួមទប់ស្កាត់ និងបង្ហារជំងឺឆ្លងកូវីដ ១៩។
នៅក្នុងវិបត្តិជាលក្ខណៈសកល លោក និងឈានដល់ផ្អាកការប្រកួតនេះបានធ្វើឲ្យមានផលប៉ះពាល់ច្រើនដល់ជីវភាព អ្នកដែលផ្ញើខ្លួនលើប្រដាល់ ប៉ុន្តែគ្រប់ភាគីសុទ្ធតែបង្ហាញនូវអារម្មណ៍ពេញចិត្ត ចំពោះក្រសួងជំនាញ និងស្ថាប័នជាអាណាព្យាបាល ដែលសម្រេចដាក់បម្រាមពន្យារការប្រកួតជាបណ្តោះអាសន្ននេះ។
លោក ញាន សុធី នាយកគ្រប់គ្រងការប្រកួត និងជាអ្នកស្វែងរកទីផ្សារប្រចាំសង្វៀនអាស៊ីអាគ្នេយ៍ បានប្រាប់ភ្នំពេញប៉ុស្តិ៍ថា៖ «នេះជារឿងដែលប៉ះពាល់សុខភាពជាសាធារណៈរបស់ប្រជាពលរដ្ឋ ព្រោះភាពឆ្លងកាចសាហាវរបស់វីរុសកូរ៉ូណានេះ យើងដឹងទាំងអស់គ្នាហើយ គឺឆ្លងលឿនគួរឲ្យភ័យខ្លាច»។
លោកបានបន្ថែមថា៖ «ពួកយើងបាត់ចំណូលដែលទ្រទ្រង់ជីវភាពប្រចាំថ្ងៃ ទាំងកីឡាករ គ្រូបង្វឹក គណៈកម្មការ ចៅក្រមអាជ្ញាកណ្តាល ព្រមទាំងបុគ្គលិកបម្រើការងារផ្សេងៗផងដែរ ប៉ុន្តែយើងបានចំណេញមកវិញនូវការការពារមេរោគ មិនឲ្យចម្លងពីម្នាក់ទៅម្នាក់បាន ព្រោះយើងមើលនឹងភ្នែកធម្មតាមិនឃើញថា នរណាខ្លះដែលផ្ទុកមេរោគនោះទេ។ ហេតុនេះយើងគួរតែអត់ធ្មត់ទាំងអស់គ្នា ដោយរង់ចាំស្ថាប័នជំនាញខាងសុខភាពគ្រប់គ្រងវីរុសនេះបាន ឬគ្រប់គ្រងវាមិនឲ្យរាលដាល ហើយពេលនោះយើងនឹងទទួលបានប្រាក់ចំណូលមកវិញ តាមរយៈការងារនេះ»។
ចំណែកលោក ជឹម ផល្លា គ្រូពេទ្យប្រចាំកីឡាជម្រើសជាតិ និងជាប្រធានគ្រូពេទ្យប្រចាំសង្វៀនប្រដាល់ទាំង ៦ ស្ថានីយបាននិយាយថា៖ «ការផ្អាក ឬពន្យារពេលប្រកួតមួយរយនេះ វាជាការល្អប្រសើរបំផុត ព្រោះផលប៉ះពាល់នៃការឆ្លងនេះ គឺលឿនណាស់ តាមរយៈការជួបជុំគ្នា ហេតុនេះគួរតែផ្អាកទៅតាមសេចក្តីជូនដំណឹងរបស់ក្រសួងសុខាភិបាល ក៏ដូចរាជរដ្ឋាភិបាល ដែលបានហាមឃាត់មិនឲ្យជួបជុំគ្នាច្រើន ដើម្បីកាត់បន្ថយឲ្យតិចបំផុត ឬចៀសវាងឲ្យបាននូវការឆ្លងវីរុសនេះ។
លោកបានបញ្ជាក់ថា៖ «ខ្ញុំគាំទ្រទាំងស្រុងចំពោះការផ្អាកការប្រកួត ទោះបីបាត់ប្រាក់ចំណូលគ្រប់ៗគ្នាក៏ដោយ ប៉ុន្តែវាចំណេញនូវសុខភាពទាំងអស់គ្នា ហើយការប្រកួតថ្ងៃចុងក្រោយនេះ បានដាក់ពេទ្យប្រចាំការពិនិត្យ មុនប្រកួតយ៉ាងហ្មត់ចត់»។
ជាមួយគ្នានេះ ភ្នំពេញប៉ុស្តិ៍ បានសម្ភាសជាមួយគ្រូប្រដាល់ចំនួន ៨ នាក់ ហើយពួកគាត់សុទ្ធតែត្អូញត្អែរ ពីជីវភាពលំបាកបំផុត ក្រោយពេលបិទការប្រកួត។ ទោះបីជាយ៉ាងណា គ្រូបង្វឹកទាំងនោះបានអះអាងថា មានការពេញចិត្តនឹងការបិទនេះ ដើម្បីការពារ ហើយភាគច្រើនសុំឲ្យមានសប្បុរសជនជួយជាអង្ករខ្លះ ដល់កីឡាករ ឬគ្រូបង្វឹក ដែលក្រីក្របំផុត គឺពិតជាសប្បាយចិត្តណាស់ ដើម្បីរស់ប៉ុណ្ណោះ។
លោក ឡុង វិបុល ជាគ្រូបង្វឹកប្រដាល់ម្នាក់បាននិយាយថា៖ «គ្រូប្រដាល់ចូល ៩០ ភាគរយ មិនមានមុខរបរផ្សេងនោះទេ ប៉ុន្តែអ្នកខ្លះ គេមានក្របខ័ណ្ឌកងទ័ព និងនគរបាល មានប្រាក់ខែជួយទប់ ចំណែកខ្ញុំមានការងារសំណង់ជួយខ្លះ ប៉ុន្តែនៅតែបារម្ភមួយទៀតខ្លាចសំណង់បិទទៀតចប់តែម្តង»។
លោកបន្តថា៖ «ពេលពន្យារពេល ឬផ្អាកអ៊ីចឹង គឺជួបបញ្ហាជីវភាពខ្លាំងមែនទែនព្រោះអ្នកធ្លាប់រត់ម៉ូតូកង់បី ឬម៉ូតូឌុប បន្ថែមលើការធ្វើជាគណៈកម្មការក៏រកមិនបានដែរ ដោយពួកគាត់ត្អូញត្អែរដូចៗគ្នា»៕
